90 shlokas
- 1
अथ विन्ध्यान्तरे तत्र वत्सराजस्य तिष्ठतः
पार्श्वं चण्डमहासेनप्रतीहारः समाययौ
atha vindhyāntare tatra vatsarājasya tiṣṭhataḥ
pārśvaṃ caṇḍamahāsenapratīhāraḥ samāyayau
- 2
स चागत्य प्रणम्यैनं राजानमिदमब्रवीत्
राजा चण्डमहासेनस्तव संदिष्टवानिदम्
sa cāgatya praṇamyainaṃ rājānamidamabravīt
rājā caṇḍamahāsenastava saṃdiṣṭavānidam
- 3
युक्तं वासवदत्ता यत्स्वयमेव त्वया हृता
तदर्थमेव हि मया त्वमानीत इहाभवः
yuktaṃ vāsavadattā yatsvayameva tvayā hṛtā
tadarthameva hi mayā tvamānīta ihābhavaḥ
- 4
संयतस्य च नैवेह दत्तैषा ते मया स्वयम्
नैवमस्मासु ते प्रीतिर्भवेदिति विशङ्किना
saṃyatasya ca naiveha dattaiṣā te mayā svayam
naivamasmāsu te prītirbhavediti viśaṅkinā
- 5
तद् इदानीम् अविधिना ममास्य दुहितुर्यथा
न विवाहो भवेद्राजन्प्रतीक्षेथास्तथा मनाक्
tad idānīm avidhinā mamāsya duhituryathā
na vivāho bhavedrājanpratīkṣethāstathā manāk
- 6
गोपालको हि नचिरादत्रैवैष्यति मत्सुतः
स चास्याः स्वसुरुद्वाहं यथाविधि विधास्यति
gopālako hi nacirādatraivaiṣyati matsutaḥ
sa cāsyāḥ svasurudvāhaṃ yathāvidhi vidhāsyati
- 7
इतीमं वत्सराजाय संदेशमवधाय सः
तत्तद्वासवदत्तायै प्रतीहारो न्यवेदयत्
itīmaṃ vatsarājāya saṃdeśamavadhāya saḥ
tattadvāsavadattāyai pratīhāro nyavedayat
- 8
ततः सानन्दया साकं तया वासवदत्तया
हृष्टो वत्सेश्वरश्चक्रे कौशाम्बीगमने मनः
tataḥ sānandayā sākaṃ tayā vāsavadattayā
hṛṣṭo vatseśvaraścakre kauśāmbīgamane manaḥ
- 9
गोपालकस्यागमनं प्रतीक्षेथां युवामिह
तेनैव सह पश्चाच्च कौशाम्बीमागमिष्यथः
gopālakasyāgamanaṃ pratīkṣethāṃ yuvāmiha
tenaiva saha paścācca kauśāmbīmāgamiṣyathaḥ
- 10
इत्युक्त्वा स्थापयामास स तत्रैव महीपतिः
श्वाशुरं तं प्रतीहारं स्वमित्त्रं च पुलिन्दकम्
ityuktvā sthāpayāmāsa sa tatraiva mahīpatiḥ
śvāśuraṃ taṃ pratīhāraṃ svamittraṃ ca pulindakam
- 11
ततो ऽनुयातो नागेन्द्रैः स्रवद्भिर्मदनिर्झरान्
अनुरागागतैर्विन्ध्यप्राग्भारैरिव जङ्गमैः
tato 'nuyāto nāgendraiḥ sravadbhirmadanirjharān
anurāgāgatairvindhyaprāgbhārairiva jaṅgamaiḥ
- 12
तुरंगसैन्यसंघातखुराघातसशब्दया
स्तूयमान इवोत्क्रान्तबन्दिसन्दर्भया भुवा
turaṃgasainyasaṃghātakhurāghātasaśabdayā
stūyamāna ivotkrāntabandisandarbhayā bhuvā
- 13
नभोविलङ्घिभिः सेनारजोराशिभिर् उद्धतैः
सपक्षभूभृदुल्लासशङ्कां कुर्वञ्शतक्रतोः
nabhovilaṅghibhiḥ senārajorāśibhir uddhataiḥ
sapakṣabhūbhṛdullāsaśaṅkāṃ kurvañśatakratoḥ
- 14
स प्रतस्थे ततो देव्या सह वासवदत्तया
स्वपुरीं प्रति राजेन्द्रः प्रातरेवापरे ऽहनि
sa pratasthe tato devyā saha vāsavadattayā
svapurīṃ prati rājendraḥ prātarevāpare 'hani
- 15
ततश्च दिवसैर्द्वित्रैर्विषयं तमवाप्य सः
विशश्राम निशामेकां रुमण्वन्मन्दिरे नृपः
tataśca divasairdvitrairviṣayaṃ tamavāpya saḥ
viśaśrāma niśāmekāṃ rumaṇvanmandire nṛpaḥ
- 16
अन्येद्युस्तां च कौशाम्बीं चिरात्प्राप्तमहोत्सवः
मार्गोत्सुकोन्मुखजनां प्रविवेश प्रियासखः
anyedyustāṃ ca kauśāmbīṃ cirātprāptamahotsavaḥ
mārgotsukonmukhajanāṃ praviveśa priyāsakhaḥ
- 17
तदा च स्त्रीभिरारब्धमङ्गलस्नानमण्डना
चिरादुपागते पत्यौ बभौ नारीव सा पुरी
tadā ca strībhirārabdhamaṅgalasnānamaṇḍanā
cirādupāgate patyau babhau nārīva sā purī
- 18
ददृशुश्चात्र पौरास्तं वत्सराजं वधूसखम्
प्रशान्तशोकाः शिखिनः सविद्युतमिवाम्बुदम्
dadṛśuścātra paurāstaṃ vatsarājaṃ vadhūsakham
praśāntaśokāḥ śikhinaḥ savidyutamivāmbudam
- 19
हर्म्याग्रस्थाश्च पिदधुः पौरनार्यो मुखैर्नभः
व्योमगङ्गातटोत्फुल्लहेमाम्बुरुहविभ्रमैः
harmyāgrasthāśca pidadhuḥ pauranāryo mukhairnabhaḥ
vyomagaṅgātaṭotphullahemāmburuhavibhramaiḥ
- 20
ततः स्वं राजभवनं वत्सराजो विवेश सः
नृपश्रियेवापरया सह वासवदत्तया
tataḥ svaṃ rājabhavanaṃ vatsarājo viveśa saḥ
nṛpaśriyevāparayā saha vāsavadattayā
- 21
सेवागतनृपाकीर्णं मागधोद्गीतमङ्गलम्
सुप्तप्रबुद्धमिव तद्रेजे राजगृहं तदा
sevāgatanṛpākīrṇaṃ māgadhodgītamaṅgalam
suptaprabuddhamiva tadreje rājagṛhaṃ tadā
- 22
अथ वासवदत्ताया भ्राता गोपालको ऽचिरात्
आययौ सह कृत्वा तौ प्रतीहारपुलिन्दकौ
atha vāsavadattāyā bhrātā gopālako 'cirāt
āyayau saha kṛtvā tau pratīhārapulindakau
- 23
कृतप्रत्युद्गमं राज्ञा तमानन्दमिवापरम्
प्राप वासवदत्ता सा प्रहर्षोत्फुल्ललोचना
kṛtapratyudgamaṃ rājñā tamānandamivāparam
prāpa vāsavadattā sā praharṣotphullalocanā
- 24
अमुं भ्रातरमेतस्याः पश्यन्त्या मा स्म भूत्त्रपा
इत्य् एव तस्यास्तत्कालं रुरोधाश्रु विलोचने
amuṃ bhrātarametasyāḥ paśyantyā mā sma bhūttrapā
ity eva tasyāstatkālaṃ rurodhāśru vilocane
- 25
पितृसंदेशवाक्यैश्च तेन प्रोत्साहिताथ सा
मेने कृतार्थमात्मानं स्वजनेन समागतम्
pitṛsaṃdeśavākyaiśca tena protsāhitātha sā
mene kṛtārthamātmānaṃ svajanena samāgatam
- 26
ततो यथावद्ववृते तस्या वत्सेश्वरस्य च
व्यग्रो गोपालको ऽन्येद्युस्तत्रोद्वाहमहोत्सवे
tato yathāvadvavṛte tasyā vatseśvarasya ca
vyagro gopālako 'nyedyustatrodvāhamahotsave
- 27
रतिवल्लीनवोद्भिन्नमिव पल्लवमुज्ज्वलम्
पाणिं वासवदत्तायाः सो ऽथ वत्सेश्वरो ऽग्रहीत्
rativallīnavodbhinnamiva pallavamujjvalam
pāṇiṃ vāsavadattāyāḥ so 'tha vatseśvaro 'grahīt
- 28
सापि प्रियकरस्पर्शसान्द्रानन्दनिमीलिता
सकम्पस्वेददिग्धाङ्गी गाढरोमाञ्चचर्चिता
sāpi priyakarasparśasāndrānandanimīlitā
sakampasvedadigdhāṅgī gāḍharomāñcacarcitā
- 29
सुसंमोहनवायव्यवारुणास्त्रैर्निरन्तरैः
विद्धेव पुष्पचापेन तत्क्षणं समलक्ष्यत
susaṃmohanavāyavyavāruṇāstrairnirantaraiḥ
viddheva puṣpacāpena tatkṣaṇaṃ samalakṣyata
- 30
दृशि धूमाभिताम्रायां तस्या वह्निप्रदक्षिणे
मदिरा मदमाधुर्यसूत्रपातमिवाकरोत्
dṛśi dhūmābhitāmrāyāṃ tasyā vahnipradakṣiṇe
madirā madamādhuryasūtrapātamivākarot

