19 shlokas
- 1
या दैवीश्चतस्रः प्रदिशो वातपत्नीरभि सूर्यो विचष्टे
तासां त्वा जरस आदधामि प्र यक्ष्म एतु निरृतिं पराचैः
इति
yā daivīścatasraḥ pradiśo vātapatnīrabhi sūryo vicaṣṭe
tāsāṃ tvā jarasa ādadhāmi pra yakṣma etu nirṛtiṃ parācaiḥ
iti
- 2
आधायाभिमन्त्रयते
मा ते पुत्रं रक्षो हिंसीन्मा धेनुरतिसारिणी
प्रिया धनस्य भूया एधमाना स्वे वश इति
ādhāyābhimantrayate
mā te putraṃ rakṣo hiṃsīnmā dhenuratisāriṇī
priyā dhanasya bhūyā edhamānā sve vaśa iti
- 3
प्रक्षाल्य दक्षिणं स्तनमाधापयति
अयं कुमारो जरां धयतु सर्वमायुरेतु
तस्मै स्तनं प्रप्यायस्वायुः कीर्तिर्वर्चो यशो बलम्
इति
prakṣālya dakṣiṇaṃ stanamādhāpayati
ayaṃ kumāro jarāṃ dhayatu sarvamāyuretu
tasmai stanaṃ prapyāyasvāyuḥ kīrtirvarco yaśo balam
iti
- 4
एवमुत्तरम्
evamuttaram
- 5
नामयति न रुदति यत्र वयं वदामो यत्र वाभिमृशामसीत्युभावभिमृश्याथास्यै शिरस्त उदकुम्भमपिहितं निदधाति
आपो गृहेषु जाग्रत यथा देवेषु जाग्रथ
एवमस्यै सुपुत्रायै जाग्रत
इति
nāmayati na rudati yatra vayaṃ vadāmo yatra vābhimṛśāmasītyubhāvabhimṛśyāthāsyai śirasta udakumbhamapihitaṃ nidadhāti
āpo gṛheṣu jāgrata yathā deveṣu jāgratha
evamasyai suputrāyai jāgrata
iti
- 6
द्वादश्यां मातापुत्रौ स्नातः
dvādaśyāṃ mātāputrau snātaḥ
- 7
शुच्यगारं कुर्वन्ति
śucyagāraṃ kurvanti
- 8
उपनिर्हरन्ति सूतिकाग्निम् अतिहरन्त्यौपासनम्
upanirharanti sūtikāgnim atiharantyaupāsanam
- 9
तमग्निमुपसमाधाय व्याहृतिपर्यन्तं कृत्वा
धाता ददातु नो रयिम्
इति द्वादशाहुतीर्जुहोति
त्रयोदशेत्येकेषाम्
tamagnimupasamādhāya vyāhṛtiparyantaṃ kṛtvā
dhātā dadātu no rayim
iti dvādaśāhutīrjuhoti
trayodaśetyekeṣām
- 10
इमं मे वरुण
तत्त्वा यामि
त्वं नो अग्ने
स त्वं नो अग्ने
त्वमग्ने अयासि
प्रजापते
यदस्य कर्मणो ऽत्यरीरिचम्
इति चात्रैके जयाभ्यातानान्राष्ट्रभृत इत्युपजुह्वति यथा पुरस्तात्
ब्राह्मणानन्नेन परिविष्य पुण्याहं स्वस्त्ययनमृद्धिमिति वाचयित्वा पुत्रस्य नाम दध्याद्द्व्यक्षरं चतुरक्षरं वा घोषवदाद्यन्तरन्तस्थं दीर्घाभिनिष्ठानान्तं यत्र वा स्वित्युपसर्गः स्यात्
तद्धि प्रतिष्ठितमिति विज्ञायते
imaṃ me varuṇa
tattvā yāmi
tvaṃ no agne
sa tvaṃ no agne
tvamagne ayāsi
prajāpate
yadasya karmaṇo 'tyarīricam
iti cātraike jayābhyātānānrāṣṭrabhṛta ityupajuhvati yathā purastāt
brāhmaṇānannena pariviṣya puṇyāhaṃ svastyayanamṛddhimiti vācayitvā putrasya nāma dadhyāddvyakṣaraṃ caturakṣaraṃ vā ghoṣavadādyantarantasthaṃ dīrghābhiniṣṭhānāntaṃ yatra vā svityupasargaḥ syāt
taddhi pratiṣṭhitamiti vijñāyate
- 11
पिता मातेत्य् अग्रे ऽभिव्याहरेयाताम्
विज्ञायते च मम नाम प्रथमं जातवेद इति
pitā mātety agre 'bhivyāhareyātām
vijñāyate ca mama nāma prathamaṃ jātaveda iti
- 12
द्वे नामनी कुर्यात्
विज्ञायते च तस्माद्द्विनामा ब्राह्मणो ऽर्धुक इति
dve nāmanī kuryāt
vijñāyate ca tasmāddvināmā brāhmaṇo 'rdhuka iti
- 13
नक्षत्रनाम द्वितीयं स्याद् अन्यतरद्गुह्यं स्यात्
nakṣatranāma dvitīyaṃ syād anyataradguhyaṃ syāt
- 14
अन्यतरेणैनम् आमन्त्रयीरन्
anyatareṇainam āmantrayīran
- 15
सोमयाजी तृतीयं नाम कुर्वीतेति विज्ञायते
somayājī tṛtīyaṃ nāma kurvīteti vijñāyate
- 16
प्रवासादेत्यागतं वा पुत्रमभिमृशति
सोमस्य त्वा द्युम्नेनाभिमृशाम्यग्नेस्तेजसा सूर्यस्य वर्चसा
इति
pravāsādetyāgataṃ vā putramabhimṛśati
somasya tvā dyumnenābhimṛśāmyagnestejasā sūryasya varcasā
iti
- 17
पशूनां त्वा हुंकारेणाभिजिघ्राम्यसावायुषे वर्चसे हुम्
इति मूर्ध्न्यभिजिघ्र्य
paśūnāṃ tvā huṃkāreṇābhijighrāmyasāvāyuṣe varcase hum
iti mūrdhnyabhijighrya
- 18
अथास्य दक्षिणेन हस्तेन दक्षिणं हस्तं साङ्गुष्ठं गृह्णाति
अग्निरायुष्मान्
इति पञ्चभिः पर्यायैः
athāsya dakṣiṇena hastena dakṣiṇaṃ hastaṃ sāṅguṣṭhaṃ gṛhṇāti
agnirāyuṣmān
iti pañcabhiḥ paryāyaiḥ
- 19
आयुष्टे विश्वतो दधद् इति दक्षिणे कर्णे जपति
यथा पुरस्तात्
āyuṣṭe viśvato dadhad iti dakṣiṇe karṇe japati
yathā purastāt

