377 shlokas
- 1
स्नात्वा श्रीकृष्णचैतन्यनामतीर्थोत्तमे सकृत्
नित्याशुचिः शुचीन्द्रः सन्स्वधर्मं वक्तुम् अर्हति
snātvā śrīkṛṣṇacaitanyanāmatīrthottame sakṛt
nityāśuciḥ śucīndraḥ sansvadharmaṃ vaktum arhati
- 2
अथ स्वगृहम् आगच्छेद् आदौ नत्वेष्टदेवताम्
गुरून्ज्येष्ठांश्च पुष्पैधःकुशाम्भोधारकेतरान्
atha svagṛham āgacched ādau natveṣṭadevatām
gurūnjyeṣṭhāṃśca puṣpaidhaḥkuśāmbhodhāraketarān
- 3
तथा च श्रीनृसिंहपुराणे
जले देवं नमस्कृत्य ततो गच्छेद्गृहं पुमान्
पौरुषेण तु सूक्तेन ततो विष्णुं समर्चयेत्
tathā ca śrīnṛsiṃhapurāṇe
jale devaṃ namaskṛtya tato gacchedgṛhaṃ pumān
pauruṣeṇa tu sūktena tato viṣṇuṃ samarcayet
- 4
मन्दिरं मार्जयेद्विष्णोर्विधायाचमनादिकम्
कृष्णं पश्यन्कीर्तयंश्च दास्येनात्मानम् अर्पयेत्
mandiraṃ mārjayedviṣṇorvidhāyācamanādikam
kṛṣṇaṃ paśyankīrtayaṃśca dāsyenātmānam arpayet
- 5
शुद्धं गोमयम् आदाय ततो मृत्स्नां जलं तथा
भक्त्या तत्परितो लिम्पेद् अभ्युक्षेच्च तदङ्गनम्
śuddhaṃ gomayam ādāya tato mṛtsnāṃ jalaṃ tathā
bhaktyā tatparito limped abhyukṣecca tadaṅganam
- 6
तथा च नवमस्कन्धे श्रीमदम्बरीषोपाख्याने
स वै मनः कृष्णपदारविन्दयोर्वचांसि वैकुण्ठगुणानुवर्णने करौ हरेर्मन्दिरमार्जनादिषु श्रुतिं चकाराच्युतसत्कथोदये
tathā ca navamaskandhe śrīmadambarīṣopākhyāne
sa vai manaḥ kṛṣṇapadāravindayorvacāṃsi vaikuṇṭhaguṇānuvarṇane karau harermandiramārjanādiṣu śrutiṃ cakārācyutasatkathodaye
- 7
एकादशस्कन्धे श्रीभगवदुद्धवसंवादे भगवद्धर्मकथने
सम्मार्जनोपलेपाभ्यां सेकमण्डलवर्तनैः
गृहशुश्रूषणं मह्यं दासवद्यद् अमायया
ekādaśaskandhe śrībhagavaduddhavasaṃvāde bhagavaddharmakathane
sammārjanopalepābhyāṃ sekamaṇḍalavartanaiḥ
gṛhaśuśrūṣaṇaṃ mahyaṃ dāsavadyad amāyayā
- 8
श्रीनृसिंहपुराणे
नरसिंहगृहे नित्यं यं सम्मार्जनम् आचरेत्
समस्तपापनिर्मुक्तो विष्णुलोके स मोदते
śrīnṛsiṃhapurāṇe
narasiṃhagṛhe nityaṃ yaṃ sammārjanam ācaret
samastapāpanirmukto viṣṇuloke sa modate
- 9
श्रीविष्णुधर्मोत्तरे
संमार्जनं तु यः कुर्यात्पुरुषः केशवालये
रजस्तमोभ्यां निर्मुक्तः स भवेन्नात्र संशयः
śrīviṣṇudharmottare
saṃmārjanaṃ tu yaḥ kuryātpuruṣaḥ keśavālaye
rajastamobhyāṃ nirmuktaḥ sa bhavennātra saṃśayaḥ
- 10
पांशूनां यावतां राजन्कुर्यात्संमार्जनं नरः
तावन्त्य् अब्दानि स सुखी नाकम् आसाद्य मोदते
pāṃśūnāṃ yāvatāṃ rājankuryātsaṃmārjanaṃ naraḥ
tāvanty abdāni sa sukhī nākam āsādya modate
- 11
श्रीवाराहे
यावत्कानि प्रहाराणि भूमिसंमार्जने ददुः
तावद्वर्षसहस्राणि शाकद्वीपे महीयते
śrīvārāhe
yāvatkāni prahārāṇi bhūmisaṃmārjane daduḥ
tāvadvarṣasahasrāṇi śākadvīpe mahīyate
- 12
जायते मम भक्तश्च सर्वधर्मसमन्वितः
शुचिर्भागवतः शुद्धो ह्य् अपराधविवर्जितः
jāyate mama bhaktaśca sarvadharmasamanvitaḥ
śucirbhāgavataḥ śuddho hy aparādhavivarjitaḥ
- 13
ततो भुक्त्वा सर्वभोगान्तीर्त्वा संसारसागरम्
शाकद्वीपात्परिभ्रष्टः स्वर्गलोकं स गच्छति
tato bhuktvā sarvabhogāntīrtvā saṃsārasāgaram
śākadvīpātparibhraṣṭaḥ svargalokaṃ sa gacchati
- 14
नन्दनं वनम् आश्रित्य मोदते चाप्सरैः सह
नन्दनाच्च परिभ्रष्टो मम कर्मव्यवस्थितः
सर्वसङ्गात्परित्यज्य मम लोकं तु गच्छति
nandanaṃ vanam āśritya modate cāpsaraiḥ saha
nandanācca paribhraṣṭo mama karmavyavasthitaḥ
sarvasaṅgātparityajya mama lokaṃ tu gacchati
- 15
तत्रैव
गोमयं गृह्य वै भूमिं मम वेश्मोपलेपयेत्
यावतस्तु पदांस्तत्र समन्ताद् उपलेपयेत्
तावद्वर्षसहस्राणि मद्भक्तो जायते तथा
tatraiva
gomayaṃ gṛhya vai bhūmiṃ mama veśmopalepayet
yāvatastu padāṃstatra samantād upalepayet
tāvadvarṣasahasrāṇi madbhakto jāyate tathā
- 16
समीपे यदि वा दूरे यश्चालयति गोमयम्
यावत्तस्य पदाग्राणि तावत्स्वर्गे महीयते
samīpe yadi vā dūre yaścālayati gomayam
yāvattasya padāgrāṇi tāvatsvarge mahīyate
- 17
शाल्मलौ तत्परिभ्रष्टो राजा भवति धार्मिकः
मद्भक्तश्चैव जायते सर्वशास्त्रविशारदः
śālmalau tatparibhraṣṭo rājā bhavati dhārmikaḥ
madbhaktaścaiva jāyate sarvaśāstraviśāradaḥ
- 18
यश्चालेपयते भूमिं गोमयेन दृढव्रतः
तस्य दृष्ट्वानुलेपं तु मम तुष्टिः प्रजायते
yaścālepayate bhūmiṃ gomayena dṛḍhavrataḥ
tasya dṛṣṭvānulepaṃ tu mama tuṣṭiḥ prajāyate
- 19
गोश्च यस्याः पुरीषेण क्रियते भूमिलेपनम्
एकेनैव तु लेपेन गोयोन्या विप्रमुच्यते
gośca yasyāḥ purīṣeṇa kriyate bhūmilepanam
ekenaiva tu lepena goyonyā vipramucyate
- 20
स्थानोपलेपने भूमे सलिलं यो ददाति मे
तस्य पुण्यं महाभागे शृणु तत्त्वेन निष्कलम्
sthānopalepane bhūme salilaṃ yo dadāti me
tasya puṇyaṃ mahābhāge śṛṇu tattvena niṣkalam
- 21
यावन्ति जलबिन्दूनि लिप्यमानस्य सुन्दरि
तावद्वर्षसहस्राणि स्वर्गलोके महीयते
yāvanti jalabindūni lipyamānasya sundari
tāvadvarṣasahasrāṇi svargaloke mahīyate
- 22
यावन्तो बिन्दवः केचित्पानीयस्य वसुन्धरे
तावद्वर्षसहस्राणि क्रौञ्चद्वीपे महीयते
yāvanto bindavaḥ kecitpānīyasya vasundhare
tāvadvarṣasahasrāṇi krauñcadvīpe mahīyate
- 23
क्रौञ्चद्वीपात्परिभ्रष्टः सर्वधर्मपरायणः
सर्वसङ्गान्परित्यज्य मम लोकं च गच्छति
krauñcadvīpātparibhraṣṭaḥ sarvadharmaparāyaṇaḥ
sarvasaṅgānparityajya mama lokaṃ ca gacchati
- 24
श्रीविष्णुधर्मोत्तरे
कृत्वोपलेपनं विष्णोर्नरस्त्व् आयतने सदा
गोमयेन शुभान्लोकान् अयत्नाद् एव गच्छति
śrīviṣṇudharmottare
kṛtvopalepanaṃ viṣṇornarastv āyatane sadā
gomayena śubhānlokān ayatnād eva gacchati
- 25
हस्तप्रमाणं भूभागम् उपलिप्य नराधिप
देवरामाशतं नाके लभते सततं नरः
hastapramāṇaṃ bhūbhāgam upalipya narādhipa
devarāmāśataṃ nāke labhate satataṃ naraḥ
- 26
नारसिंहे
गोमयेन मृदा तोयैर्यः कुर्याद् उपलेपनम्
चान्द्रायणफलं प्राप्य विष्णुलोके महीयते
nārasiṃhe
gomayena mṛdā toyairyaḥ kuryād upalepanam
cāndrāyaṇaphalaṃ prāpya viṣṇuloke mahīyate
- 27
तत्रैव श्रीधर्मराजस्य दूतानुशासने
संमार्जनं यः कुरुते गोमयेनोपलेपनम्
करोति भवने विष्णोस्त्याज्यं तेषां कुलत्रयम्
tatraiva śrīdharmarājasya dūtānuśāsane
saṃmārjanaṃ yaḥ kurute gomayenopalepanam
karoti bhavane viṣṇostyājyaṃ teṣāṃ kulatrayam
- 28
श्रीविष्णुधर्मोत्तरे
अभ्युक्षणं तु यः कुर्यात्पानीयेन सुरालये
स शान्ततापो भवति नात्र कार्या विचारणा
śrīviṣṇudharmottare
abhyukṣaṇaṃ tu yaḥ kuryātpānīyena surālaye
sa śāntatāpo bhavati nātra kāryā vicāraṇā
- 29
अभ्युक्षणं तु यः कुर्याद्देवदेवाजिरे नरः
सर्वपापविनिर्मुक्तो वारुणं लोकम् अश्नुते
abhyukṣaṇaṃ tu yaḥ kuryāddevadevājire naraḥ
sarvapāpavinirmukto vāruṇaṃ lokam aśnute
- 30
सर्वतोभद्रपद्मादीन् अभिज्ञः स्वस्तिकानि च
विरचय्य विचित्राणि मण्डयेद्धरिमन्दिरम्
sarvatobhadrapadmādīn abhijñaḥ svastikāni ca
viracayya vicitrāṇi maṇḍayeddharimandiram

