257 shlokas
- 1
तं श्रीमत्कृष्णचैतन्यं वन्दे जगद्गुरुम्
यस्यानुकम्पया श्वापि महाब्धिं संतरेत्सुखम्
taṃ śrīmatkṛṣṇacaitanyaṃ vande jagadgurum
yasyānukampayā śvāpi mahābdhiṃ saṃtaretsukham
- 2
अथ दीक्षाविधिः
दीक्षाविधिर्लिख्यतेऽत्रानुसृत्य क्रमदीपिकाम्
विना दीक्षां हि पूजायां नाधिकारो ऽस्ति कर्हिचित्
atha dīkṣāvidhiḥ
dīkṣāvidhirlikhyate'trānusṛtya kramadīpikām
vinā dīkṣāṃ hi pūjāyāṃ nādhikāro 'sti karhicit
- 3
आगमे
द्विजानाम् अनुपेतानां स्वकर्माध्ययनादिषु
यथाधिकारो नास्तीह स्याच्चोपनयनाद् अनु
āgame
dvijānām anupetānāṃ svakarmādhyayanādiṣu
yathādhikāro nāstīha syāccopanayanād anu
- 4
तथात्रादीक्षितानां तु मन्त्रदेवार्चनादिषु
नाधिकारो ऽस्त्य् अतः कुर्याद् आत्मानं शिवसंस्तुतम्
tathātrādīkṣitānāṃ tu mantradevārcanādiṣu
nādhikāro 'sty ataḥ kuryād ātmānaṃ śivasaṃstutam
- 5
स्कान्दे कार्त्तिकप्रसङ्गे श्रीब्रह्मनारदसंवादे
ते नराः पशवो लोके किं तेषां जीवने फलम्
यैर्न लब्धा हरेर्दीक्षा नार्चितो वा जनार्दनः
skānde kārttikaprasaṅge śrībrahmanāradasaṃvāde
te narāḥ paśavo loke kiṃ teṣāṃ jīvane phalam
yairna labdhā harerdīkṣā nārcito vā janārdanaḥ
- 6
तत्रैव श्रीरुक्माङ्गदमोहिनीसंवादे विष्णुयामले च
अदीक्षितस्य वामोरु कृतं सर्वं निरर्थकम्
पशुयोनिम् अवाप्नोति दीक्षाविरहितो जनः
tatraiva śrīrukmāṅgadamohinīsaṃvāde viṣṇuyāmale ca
adīkṣitasya vāmoru kṛtaṃ sarvaṃ nirarthakam
paśuyonim avāpnoti dīkṣāvirahito janaḥ
- 7
विशेषतो विष्णुयामले
स्नेहाद्वा लोभतो वापि यो गृह्णीयाद् अदीक्षया
तस्मिन्गुरौ सशिष्ये तु देवताशाप आपतेत्
viśeṣato viṣṇuyāmale
snehādvā lobhato vāpi yo gṛhṇīyād adīkṣayā
tasmingurau saśiṣye tu devatāśāpa āpatet
- 8
विष्णुरहस्ये च
अविज्ञाय विधानोक्तं हरिपूजाविधिक्रियाम्
कुर्वन्भक्त्या समाप्नोति शतभागं विधानतः
viṣṇurahasye ca
avijñāya vidhānoktaṃ haripūjāvidhikriyām
kurvanbhaktyā samāpnoti śatabhāgaṃ vidhānataḥ
- 9
दिव्यं ज्ञानं यतो दद्यात्कुर्यात्पापस्य सङ्क्षयम्
तस्माद्दीक्षेति सा प्रोक्ता देशिकैस्तत्त्वकोविदैः
divyaṃ jñānaṃ yato dadyātkuryātpāpasya saṅkṣayam
tasmāddīkṣeti sā proktā deśikaistattvakovidaiḥ
- 10
अतो गुरुं प्रणम्यैवं सर्वस्वं विनिवेद्य च
गृह्णीयाद्वैष्णवं मन्त्रं दीक्षापूर्वं विधानतः
ato guruṃ praṇamyaivaṃ sarvasvaṃ vinivedya ca
gṛhṇīyādvaiṣṇavaṃ mantraṃ dīkṣāpūrvaṃ vidhānataḥ
- 11
स्कान्दे तत्रैव श्रीब्रह्मनारदसंवादे
तपस्विनः कर्मनिष्ठाः श्रेष्ठास्ते वै नरा भुवि
प्राप्ता यैस्तु हरेर्दीक्षा सर्वदुःखविमोचिनी
skānde tatraiva śrībrahmanāradasaṃvāde
tapasvinaḥ karmaniṣṭhāḥ śreṣṭhāste vai narā bhuvi
prāptā yaistu harerdīkṣā sarvaduḥkhavimocinī
- 12
तन्त्रसागरे च
यथा काञ्चनतां याति कांस्यं रसविधानतः
तथा दीक्षाविधानेन द्विजत्वं जायते नृणाम्
tantrasāgare ca
yathā kāñcanatāṃ yāti kāṃsyaṃ rasavidhānataḥ
tathā dīkṣāvidhānena dvijatvaṃ jāyate nṛṇām
- 13
आगमे
मन्त्रस्वीकरणं चैत्रे बहुदुःखफलप्रदम्
वैशाखे रत्नलाभः स्याज्ज्यैष्ठे तु मरणं ध्रुवम्
āgame
mantrasvīkaraṇaṃ caitre bahuduḥkhaphalapradam
vaiśākhe ratnalābhaḥ syājjyaiṣṭhe tu maraṇaṃ dhruvam
- 14
आषाढे बन्धुनाशाय श्रावणे तु भयावहम्
प्रजाहानिर्भाद्रपदे सर्वत्र शुभम् आश्विने
āṣāḍhe bandhunāśāya śrāvaṇe tu bhayāvaham
prajāhānirbhādrapade sarvatra śubham āśvine
- 15
कार्त्तिके धनवृद्धिः स्यान्मार्गशीर्षे शुभप्रदम्
पौषे तु ज्ञानहानिः स्यान्माघे मेधाविवर्धनम्
फाल्गुने सर्ववश्यत्वम् आचार्यैः परिकीर्तितम्
kārttike dhanavṛddhiḥ syānmārgaśīrṣe śubhapradam
pauṣe tu jñānahāniḥ syānmāghe medhāvivardhanam
phālgune sarvavaśyatvam ācāryaiḥ parikīrtitam
- 16
क्वचिच्च
समृद्धिः श्रावणे नूनं ज्ञानं स्यात्कार्त्तिके तथा
फाल्गुनेऽपि समृद्धिः स्यान्मलमासं परित्यजेत्
kvacicca
samṛddhiḥ śrāvaṇe nūnaṃ jñānaṃ syātkārttike tathā
phālgune'pi samṛddhiḥ syānmalamāsaṃ parityajet
- 17
गौतमीये
मन्त्रारम्भस्तु चैत्रे स्यात्समस्तपुरुषार्थदः
वैशाखे रत्नलाभः स्यात्ज्यैष्ठे तु मरणं ध्रुवम्
gautamīye
mantrārambhastu caitre syātsamastapuruṣārthadaḥ
vaiśākhe ratnalābhaḥ syātjyaiṣṭhe tu maraṇaṃ dhruvam
- 18
आषाढे बन्धुनाशः स्यात्पूर्णायुः श्रावणे भवेत्
प्रजानाशो भवेद्भाद्रे आश्विने रत्नसञ्चयः
āṣāḍhe bandhunāśaḥ syātpūrṇāyuḥ śrāvaṇe bhavet
prajānāśo bhavedbhādre āśvine ratnasañcayaḥ
- 19
कार्त्तिके मन्त्रसिद्धिः स्यात्मार्गशीर्षे तथा भवेत्
पौषे तु शत्रुपीडा स्यात्माघे मेधाविवर्धनम्
फाल्गुने सर्वकामाः स्युर्मलमासं परित्यजेत्
kārttike mantrasiddhiḥ syātmārgaśīrṣe tathā bhavet
pauṣe tu śatrupīḍā syātmāghe medhāvivardhanam
phālgune sarvakāmāḥ syurmalamāsaṃ parityajet
- 20
स्कान्दे तत्रैव श्रीरुक्माङ्गदमोहिनीसंवादे
कार्त्तिके तु कृता दीक्षा नॄणां जन्मनिकृन्तनी
तस्मात्सर्वप्रयत्नेन दीक्षां कुर्वीत कार्त्तिके
skānde tatraiva śrīrukmāṅgadamohinīsaṃvāde
kārttike tu kṛtā dīkṣā nṝṇāṃ janmanikṛntanī
tasmātsarvaprayatnena dīkṣāṃ kurvīta kārttike
- 21
श्रीमद्गोपालमन्त्राणां दीक्षायां तु न दुष्यति
चैत्रमासे यद् उक्ता तद्दीक्षा तत्रैव देशिकैः
śrīmadgopālamantrāṇāṃ dīkṣāyāṃ tu na duṣyati
caitramāse yad uktā taddīkṣā tatraiva deśikaiḥ
- 22
रवौ गुरौ तथा सोमे कर्तव्यं बुधशुक्रयोः
ravau gurau tathā some kartavyaṃ budhaśukrayoḥ
- 23
नारदतन्त्रे
रोहिणी श्रवणार्द्रा च धनिष्ठा चोत्तरात्रयः
पुष्यं शतभिषश्चैव दीक्षानक्षत्रम् उच्यते
nāradatantre
rohiṇī śravaṇārdrā ca dhaniṣṭhā cottarātrayaḥ
puṣyaṃ śatabhiṣaścaiva dīkṣānakṣatram ucyate
- 24
क्वचिच्च
अश्विनीरोहिणीस्वातिविशाखाहस्तभेषु च
ज्येष्ठोत्तरात्रयेष्व् एव कुर्यान्मन्त्राभिषेचनम्
kvacicca
aśvinīrohiṇīsvātiviśākhāhastabheṣu ca
jyeṣṭhottarātrayeṣv eva kuryānmantrābhiṣecanam
- 25
सारसङ्ग्रहे
द्वितीया पञ्चमी चैव षष्ठी चैव विशेषतः
द्वादश्याम् अपि कर्तव्यं त्रयोदश्याम् अथापि च
sārasaṅgrahe
dvitīyā pañcamī caiva ṣaṣṭhī caiva viśeṣataḥ
dvādaśyām api kartavyaṃ trayodaśyām athāpi ca
- 26
क्वचिच्च
पूर्णिमा पञ्चमी चैव द्वितीया सप्तमी तथा
त्रयोदशी च दशमी प्रशस्ता सर्वकामदा
kvacicca
pūrṇimā pañcamī caiva dvitīyā saptamī tathā
trayodaśī ca daśamī praśastā sarvakāmadā
- 27
एवं शुद्धे दिने शुक्लपक्षे शुक्रगुरूदये
सल्लग्ने चन्द्रतारानुकूले दीक्षा प्रशस्यते
evaṃ śuddhe dine śuklapakṣe śukragurūdaye
sallagne candratārānukūle dīkṣā praśasyate
- 28
रुद्रयामले
सत्तीर्थेऽर्कविधुग्रासे तन्तुदामनपर्वणोः
मन्त्रदीक्षां प्रकुर्वीत मासर्क्षादि न शोधयेत्
rudrayāmale
sattīrthe'rkavidhugrāse tantudāmanaparvaṇoḥ
mantradīkṣāṃ prakurvīta māsarkṣādi na śodhayet
- 29
सुलग्नचन्द्रतारादिबलम् अत्र सदैव हि
लब्धो ऽत्र मन्त्रो दीर्घायुःसम्पत्सन्ततिवर्धनः
sulagnacandratārādibalam atra sadaiva hi
labdho 'tra mantro dīrghāyuḥsampatsantativardhanaḥ
- 30
सूर्यग्रहणकालेन समानो नास्ति कश्चन
यत्र यद्यत्कृतं सर्वम् अनन्तफलदं भवेत्
न मासतिथिवारादिशोधनं सूर्यपर्वणि
sūryagrahaṇakālena samāno nāsti kaścana
yatra yadyatkṛtaṃ sarvam anantaphaladaṃ bhavet
na māsatithivārādiśodhanaṃ sūryaparvaṇi

