239 shlokas
- 1
चैतन्यदेवं भगवन्तम् आश्रये श्रीवैष्णवानां प्रमुदेऽञ्जसा लिखन्
आवश्यकं कर्म विचार्य साधुभिः सार्धं समाहृत्य समस्तशास्त्रतः
caitanyadevaṃ bhagavantam āśraye śrīvaiṣṇavānāṃ pramude'ñjasā likhan
āvaśyakaṃ karma vicārya sādhubhiḥ sārdhaṃ samāhṛtya samastaśāstrataḥ
- 2
भक्तेर्विलासांश्चिनुते प्रबोधानन्दस्य शिष्यो भगवत्प्रियस्य
गोपालभट्टो रघुनाथदासं संतोषयन्रूपसनातनौ च
bhaktervilāsāṃścinute prabodhānandasya śiṣyo bhagavatpriyasya
gopālabhaṭṭo raghunāthadāsaṃ saṃtoṣayanrūpasanātanau ca
- 3
मथुरानाथपादाब्जप्रेमभक्तिविलासतः
जातं भक्तिविलासाख्यं तद्भक्ताः शीलयन्त्व् इमम्
mathurānāthapādābjapremabhaktivilāsataḥ
jātaṃ bhaktivilāsākhyaṃ tadbhaktāḥ śīlayantv imam
- 4
जीयासुर् आत्यन्तिकभक्तिनिष्ठाः श्रीवैष्णवा माथुरमण्डलेऽत्र
काशीश्वरः कृष्णवने चकास्तु श्रीकृष्णदासश्च सलोकनाथः
jīyāsur ātyantikabhaktiniṣṭhāḥ śrīvaiṣṇavā māthuramaṇḍale'tra
kāśīśvaraḥ kṛṣṇavane cakāstu śrīkṛṣṇadāsaśca salokanāthaḥ
- 5
आदौ सकारणं लेख्यं श्रीगुर्वाश्रयणं ततः
गुरुः शिष्यः परीक्षादिर्भगवान्मनवो ऽस्य च
ādau sakāraṇaṃ lekhyaṃ śrīgurvāśrayaṇaṃ tataḥ
guruḥ śiṣyaḥ parīkṣādirbhagavānmanavo 'sya ca
- 6
मन्त्राधिकारी सिद्ध्यादिशोधनं मन्त्रसंस्क्रियाः
दीक्षा नित्यं ब्राह्मकाले शुभोत्थानं पवित्रता
प्रातः स्मृत्यादि कृष्णस्य वाद्यादैश्च प्रबोधनम्
mantrādhikārī siddhyādiśodhanaṃ mantrasaṃskriyāḥ
dīkṣā nityaṃ brāhmakāle śubhotthānaṃ pavitratā
prātaḥ smṛtyādi kṛṣṇasya vādyādaiśca prabodhanam
- 7
निर्माल्योत्तारणाद्यादौ मङ्गलारात्रिकं ततः
मैत्रादिकृत्यं शौचाचमनं दन्तस्य धावनम्
nirmālyottāraṇādyādau maṅgalārātrikaṃ tataḥ
maitrādikṛtyaṃ śaucācamanaṃ dantasya dhāvanam
- 8
स्नानं तान्त्रिकसन्ध्यादि देवसद्मादिसंस्क्रिया
snānaṃ tāntrikasandhyādi devasadmādisaṃskriyā
- 9
तुलस्याद्याहृतिर्गेहस्नानम् उष्णोदकादिकम्
वस्त्रं पीठं चोर्ध्वपुण्ड्रं श्रीगोपीचन्दनादिकम्
tulasyādyāhṛtirgehasnānam uṣṇodakādikam
vastraṃ pīṭhaṃ cordhvapuṇḍraṃ śrīgopīcandanādikam
- 10
चक्रादिमुद्रा माला च गृहसन्ध्यार्चनं गुरोः
माहात्म्यं चाथ कृष्णस्य द्वारवेश्मान्तरार्चनम्
cakrādimudrā mālā ca gṛhasandhyārcanaṃ guroḥ
māhātmyaṃ cātha kṛṣṇasya dvāraveśmāntarārcanam
- 11
पूजार्थासनम् अर्घ्यादिस्थापनं विघ्नवारणम्
श्रीगुर्वादिनतिर्भूतशुद्धिः प्राणविशोधनम्
pūjārthāsanam arghyādisthāpanaṃ vighnavāraṇam
śrīgurvādinatirbhūtaśuddhiḥ prāṇaviśodhanam
- 12
न्यासमुद्रापञ्चकं च कृष्णध्यानान्तरार्चने
पूजा पदानि श्रीमूर्तिशालग्रामशिलास्तथा
nyāsamudrāpañcakaṃ ca kṛṣṇadhyānāntarārcane
pūjā padāni śrīmūrtiśālagrāmaśilāstathā
- 13
द्वारकोद्भवचक्राणि शुद्धयः पीठपूजनम्
आवाहनादि तन्मुद्रा आसनादिसमर्पणम्
dvārakodbhavacakrāṇi śuddhayaḥ pīṭhapūjanam
āvāhanādi tanmudrā āsanādisamarpaṇam
- 14
स्नपनं शङ्खघण्टादिवाद्यं नामसहस्रकम्
पुराणपाठो वसनम् उपवीतं विभूषणम्
snapanaṃ śaṅkhaghaṇṭādivādyaṃ nāmasahasrakam
purāṇapāṭho vasanam upavītaṃ vibhūṣaṇam
- 15
गन्धः श्रीतुलसीकाष्ठचन्दनं कुसुमानि च
पत्राणि तुलसी चाङ्गोपाङ्गावरणपूजनम्
gandhaḥ śrītulasīkāṣṭhacandanaṃ kusumāni ca
patrāṇi tulasī cāṅgopāṅgāvaraṇapūjanam
- 16
धूपो दीपश्च नैवेद्यं पानं होमो बलिक्रिया
अवगण्डूषाद्यास्यवासो दिव्यगन्धादिकं पुनः
dhūpo dīpaśca naivedyaṃ pānaṃ homo balikriyā
avagaṇḍūṣādyāsyavāso divyagandhādikaṃ punaḥ
- 17
राजोपचारा गीतादि महानीराजनं तथा
शङ्खादिवादनं साम्बुशङ्खनीराजनं स्तुतिः
rājopacārā gītādi mahānīrājanaṃ tathā
śaṅkhādivādanaṃ sāmbuśaṅkhanīrājanaṃ stutiḥ
- 18
नतिः प्रदक्षिणा कर्माद्यर्पणं जपयाचने
आगःक्षमापणं नानागांसि निर्माल्यधारणम्
natiḥ pradakṣiṇā karmādyarpaṇaṃ japayācane
āgaḥkṣamāpaṇaṃ nānāgāṃsi nirmālyadhāraṇam
- 19
शङ्खाम्बुतीर्थं तुलसीपूजा तन्मृत्तिकादि च
धात्रीस्नाननिषेधस्य कालो वृत्तेर् उपार्जनम्
śaṅkhāmbutīrthaṃ tulasīpūjā tanmṛttikādi ca
dhātrīsnānaniṣedhasya kālo vṛtter upārjanam
- 20
मध्याह्ने वैशदेवादिश्राद्धं चानर्प्यम् अच्युते
विनार्चाम् अशने दोषास्तथानर्पितभोजने
madhyāhne vaiśadevādiśrāddhaṃ cānarpyam acyute
vinārcām aśane doṣāstathānarpitabhojane
- 21
नैवेद्यभक्षणं सन्तः सत्सङ्गो ऽसदसङ्गतिः
असद्गतिर्वैष्णवोपहासनिन्दादिदुष्फलम्
naivedyabhakṣaṇaṃ santaḥ satsaṅgo 'sadasaṅgatiḥ
asadgatirvaiṣṇavopahāsanindādiduṣphalam
- 22
सतां भक्तिर्विष्णुशास्त्रं श्रीमद्भागवतं तथा
लीलाकथा च भगवद्धर्माः सायं निजक्रियाः
satāṃ bhaktirviṣṇuśāstraṃ śrīmadbhāgavataṃ tathā
līlākathā ca bhagavaddharmāḥ sāyaṃ nijakriyāḥ
- 23
कर्मपातपरीहारस्त्रिकालार्चा विशेषतः
नक्तं कृत्यान्यथो पूजाफलसिद्ध्यादिदर्शनम्
karmapātaparīhārastrikālārcā viśeṣataḥ
naktaṃ kṛtyānyatho pūjāphalasiddhyādidarśanam
- 24
विष्ण्वर्थदानं विविधोपचारा न्यूनपूरणम्
शयनं महिमार्चायाः श्रीमन्नाम्नस्तथाद्भुतः
viṣṇvarthadānaṃ vividhopacārā nyūnapūraṇam
śayanaṃ mahimārcāyāḥ śrīmannāmnastathādbhutaḥ
- 25
नामापराधा भक्तिश्च प्रेमाथाश्रयणादयः
पक्षेष्व् एकादशी साङ्गा श्रीद्वादश्यष्टकं महत्
nāmāparādhā bhaktiśca premāthāśrayaṇādayaḥ
pakṣeṣv ekādaśī sāṅgā śrīdvādaśyaṣṭakaṃ mahat
- 26
कृत्यानि मार्गशीर्षादिमासेषु द्वादशेष्व् अपि
पुरश्चरणकृत्यानि मन्त्रं सिद्धस्य लक्षणम्
kṛtyāni mārgaśīrṣādimāseṣu dvādaśeṣv api
puraścaraṇakṛtyāni mantraṃ siddhasya lakṣaṇam
- 27
मूर्त्याविर्भावनं मूर्तिप्रतिष्ठा कृष्णमन्दिरम्
जीर्णोद्धृतिः श्रीतुलसीविवाहो ऽनन्यकर्म च
mūrtyāvirbhāvanaṃ mūrtipratiṣṭhā kṛṣṇamandiram
jīrṇoddhṛtiḥ śrītulasīvivāho 'nanyakarma ca
- 28
कृपया कृष्णदेवस्य तद्भक्तजनसङ्गतः
भक्तेर्माहात्म्यम् आकर्ण्य ताम् इच्छन्सद्गुरुं भजेत्
kṛpayā kṛṣṇadevasya tadbhaktajanasaṅgataḥ
bhaktermāhātmyam ākarṇya tām icchansadguruṃ bhajet
- 29
अत्रानुभूयते नित्यं दुःखश्रेणी परत्र च
दुःसहा श्रूयते शास्त्रात्तितीर्षेद् अपि तां सुधीः
atrānubhūyate nityaṃ duḥkhaśreṇī paratra ca
duḥsahā śrūyate śāstrāttitīrṣed api tāṃ sudhīḥ
- 30
तथा चोक्तम् एकादशस्कन्धे लब्ध्वा सुदुर्लभम् इदं बहुसम्भवान्ते मानुष्यम् अर्थदम् अनित्यम् अपीह धीरः
तूर्णं यतेत न पतेद् अनुमृत्यु यावन्निःश्रेयसाय विषयः खलु सर्वतः स्यात्
tathā coktam ekādaśaskandhe labdhvā sudurlabham idaṃ bahusambhavānte mānuṣyam arthadam anityam apīha dhīraḥ
tūrṇaṃ yateta na pated anumṛtyu yāvanniḥśreyasāya viṣayaḥ khalu sarvataḥ syāt

