358 shlokas
- 1
वन्देऽनन्ताद्भुतैश्वर्यं श्रीचैतन्यं महाप्रभुम्
नीचो ऽपि यत्प्रसादात्स्यात्सदाचारप्रवर्तकः
vande'nantādbhutaiśvaryaṃ śrīcaitanyaṃ mahāprabhum
nīco 'pi yatprasādātsyātsadācārapravartakaḥ
- 2
पुंसो गृहीतदीक्षस्य श्रीकृष्णं पूजयिष्यतः
आचारो लिख्यते कृत्यं श्रुतिस्मृत्यनुसारतः
puṃso gṛhītadīkṣasya śrīkṛṣṇaṃ pūjayiṣyataḥ
ācāro likhyate kṛtyaṃ śrutismṛtyanusārataḥ
- 3
लब्ध्वा मन्त्रं तु यो नित्यं नार्चयेन्मन्त्रदेवताम्
सर्वकर्मफलं तस्यानिष्टं यच्छति देवता
labdhvā mantraṃ tu yo nityaṃ nārcayenmantradevatām
sarvakarmaphalaṃ tasyāniṣṭaṃ yacchati devatā
- 4
न किंचित्कस्यचित्सिध्येत्सदाचारं विना यतः
तस्माद् अवश्यं सर्वत्र सदाचारो ह्य् अपेक्ष्यते
na kiṃcitkasyacitsidhyetsadācāraṃ vinā yataḥ
tasmād avaśyaṃ sarvatra sadācāro hy apekṣyate
- 5
विष्णुपुराणे
वर्णाश्रमाचारवता पुरुषेण परः पुमान्
विष्णुर् आराध्यते पन्था नान्यत्तत्तोषकारणम्
viṣṇupurāṇe
varṇāśramācāravatā puruṣeṇa paraḥ pumān
viṣṇur ārādhyate panthā nānyattattoṣakāraṇam
- 6
मार्कण्डेयपुराणे श्रीमदालसालर्कसंवादे
गृहस्थेन सदा कार्यम् आचारपरिपालनम्
न ह्य् आचारविहीनस्य सुखम् अत्र परत्र च
mārkaṇḍeyapurāṇe śrīmadālasālarkasaṃvāde
gṛhasthena sadā kāryam ācāraparipālanam
na hy ācāravihīnasya sukham atra paratra ca
- 7
यज्ञदानतपांसीह पुरुषस्य न भूतये
भवन्ति यः सदाचारं समुल्लङ्घ्य प्रवर्तते
yajñadānatapāṃsīha puruṣasya na bhūtaye
bhavanti yaḥ sadācāraṃ samullaṅghya pravartate
- 8
भविष्योत्तरे च श्रीकृष्णयुधिष्ठिरसंवादे
आचारहीनं न पुनन्ति वेदाः यद्यप्य् अधीताः सह षड्भिर् अङ्गैः
छन्दांस्य् एनं मृत्युकाले त्यजन्ति नीडं शकुन्ता इव जातपक्षाः
bhaviṣyottare ca śrīkṛṣṇayudhiṣṭhirasaṃvāde
ācārahīnaṃ na punanti vedāḥ yadyapy adhītāḥ saha ṣaḍbhir aṅgaiḥ
chandāṃsy enaṃ mṛtyukāle tyajanti nīḍaṃ śakuntā iva jātapakṣāḥ
- 9
कपालस्थं यथा तोयं श्वदृतौ वा यथा पयः
दुष्टं स्यात्स्थानदोषेण वृत्तहीने तथाशुभम्
आचाररहितो राजन्नेह नामुत्र निन्दति
kapālasthaṃ yathā toyaṃ śvadṛtau vā yathā payaḥ
duṣṭaṃ syātsthānadoṣeṇa vṛttahīne tathāśubham
ācārarahito rājanneha nāmutra nindati
- 10
लेख्येन स्मरणादीनां नित्यत्वेनैव सेत्स्यति
स्मरणाद्यात्मकस्यापि सदाचारस्य नित्यता
lekhyena smaraṇādīnāṃ nityatvenaiva setsyati
smaraṇādyātmakasyāpi sadācārasya nityatā
- 11
विष्णुपुराणे तत्रैव गृहिधर्मप्रसङ्गे
सदाचारवता पुंसा जितौ लोकाव् उभाव् अपि
viṣṇupurāṇe tatraiva gṛhidharmaprasaṅge
sadācāravatā puṃsā jitau lokāv ubhāv api
- 12
साधवः क्षीणदोषास्तु सच्छब्दः साधुवाचकः
तेषाम् आचरणं यत्तु सदाचारः स उच्यते
sādhavaḥ kṣīṇadoṣāstu sacchabdaḥ sādhuvācakaḥ
teṣām ācaraṇaṃ yattu sadācāraḥ sa ucyate
- 13
काशीखण्डे स्कन्दागस्त्यसंवादे
अनध्ययनशीलं च सदाचारविलङ्घिनम्
सालस्यं च दुरन्नादं ब्राह्मणं बाधतेऽन्तकः
kāśīkhaṇḍe skandāgastyasaṃvāde
anadhyayanaśīlaṃ ca sadācāravilaṅghinam
sālasyaṃ ca durannādaṃ brāhmaṇaṃ bādhate'ntakaḥ
- 14
ततो ऽभ्यसेत्प्रयत्नेन सदाचारं सदा द्विजः
तीर्थान्य् अप्य् अभिलष्यन्ति सदाचारसमागमम्
tato 'bhyasetprayatnena sadācāraṃ sadā dvijaḥ
tīrthāny apy abhilaṣyanti sadācārasamāgamam
- 15
भविष्योत्तरे च तत्रैव
आचारप्रभवो धर्मः सन्तश्चाचारलक्षणाः
साधूनां च यथा वृत्तं स सदाचार इष्यते
bhaviṣyottare ca tatraiva
ācāraprabhavo dharmaḥ santaścācāralakṣaṇāḥ
sādhūnāṃ ca yathā vṛttaṃ sa sadācāra iṣyate
- 16
तस्मात्कुर्यात्सदाचारं य इच्छेद्गतिम् आत्मनः
सर्वलक्षणहीनो ऽपि समुचाचारवान्नृप
श्रद्दधानो ऽनसूयश्च सर्वान्कामान् अवाप्नुयात्
tasmātkuryātsadācāraṃ ya icchedgatim ātmanaḥ
sarvalakṣaṇahīno 'pi samucācāravānnṛpa
śraddadhāno 'nasūyaśca sarvānkāmān avāpnuyāt
- 17
किंच
आचार एव धर्मस्य मूलं राजन्कुलस्य च
आचाराद्विच्युतो जन्तुर्न कुलीनो न धार्मिकः
kiṃca
ācāra eva dharmasya mūlaṃ rājankulasya ca
ācārādvicyuto janturna kulīno na dhārmikaḥ
- 18
किंच
आचारो भूतिजनन आचारः कीर्तिवर्धनः
आचाराद्वर्धते ह्य् आयुर् आचारो हन्त्य् अलक्षणम्
kiṃca
ācāro bhūtijanana ācāraḥ kīrtivardhanaḥ
ācārādvardhate hy āyur ācāro hanty alakṣaṇam
- 19
आचार एव नृपपुङ्गव सेव्यमानो धर्मार्थकामफलदो भवितेह पुंसाम्
तस्मात्सदैव विदुषावहितेन राजन्शास्त्रोदितो ह्य् अनुदिनं परिपालनीयः
ācāra eva nṛpapuṅgava sevyamāno dharmārthakāmaphalado bhaviteha puṃsām
tasmātsadaiva viduṣāvahitena rājanśāstrodito hy anudinaṃ paripālanīyaḥ
- 20
ब्राह्मे मुहूर्त उत्थाय कृष्ण कृष्णेति कीर्तयन्
प्रक्षाल्य पाणिपादौ च दन्तधावनम् आचरेत्
brāhme muhūrta utthāya kṛṣṇa kṛṣṇeti kīrtayan
prakṣālya pāṇipādau ca dantadhāvanam ācaret
- 21
आचम्य वसनं रात्रेस्त्यक्त्वान्यत्परिधाय च
पुनर् आचमने कुर्याल्लेख्येन विधिनाग्रतः
ācamya vasanaṃ rātrestyaktvānyatparidhāya ca
punar ācamane kuryāllekhyena vidhināgrataḥ
- 22
अथेच्छन्परमां शुद्धिं मूर्ध्नि ध्यात्वा गुरोः पदौ
स्तुत्वा च कीर्तयन्कृष्णं स्मरंश्चैतद् उदीरयेत्
athecchanparamāṃ śuddhiṃ mūrdhni dhyātvā guroḥ padau
stutvā ca kīrtayankṛṣṇaṃ smaraṃścaitad udīrayet
- 23
जयति जननिवासो देवकीजन्मवादो यदुवरपरिषत्स्वैर्दोर्भिर् अस्यन्न् अधर्मम्
स्थिरचरवृजिनघ्नः सुस्मित श्रीमुखेन व्रजपुरवनितानां वर्धयन्कामदेवम्
jayati jananivāso devakījanmavādo yaduvarapariṣatsvairdorbhir asyann adharmam
sthiracaravṛjinaghnaḥ susmita śrīmukhena vrajapuravanitānāṃ vardhayankāmadevam
- 24
स्मृते सकलकल्याणभाजनं यत्र जायते
पुरुषस्तम् अजं नित्यं व्रजामि शरणं हरिम्
smṛte sakalakalyāṇabhājanaṃ yatra jāyate
puruṣastam ajaṃ nityaṃ vrajāmi śaraṇaṃ harim
- 25
विदग्धगोपालविलासिनीनां सम्भोगचिह्नाङ्कितसर्वगात्रम्
पवित्रम् आम्नायगिराम् अगम्यं ब्रह्म प्रपद्ये नवनीतचौरम्
vidagdhagopālavilāsinīnāṃ sambhogacihnāṅkitasarvagātram
pavitram āmnāyagirām agamyaṃ brahma prapadye navanītacauram
- 26
दशमस्कन्धे
उद्गायतीनाम् अरविन्दलोचनं व्रजाङ्गनानां दिवम् अस्पृशद्ध्वनिः
दध्नश्च निर्मन्थनशब्दमिश्रितो निरस्यते येन दिशाम् अमङ्गलम्
daśamaskandhe
udgāyatīnām aravindalocanaṃ vrajāṅganānāṃ divam aspṛśaddhvaniḥ
dadhnaśca nirmanthanaśabdamiśrito nirasyate yena diśām amaṅgalam
- 27
पठेत्पुनश्च साधूनां सम्प्रदायानुसारतः
चतुःश्लोकीम् इमां सर्वदोषशान्त्यै शुभाप्तये
paṭhetpunaśca sādhūnāṃ sampradāyānusārataḥ
catuḥślokīm imāṃ sarvadoṣaśāntyai śubhāptaye
- 28
प्रातः स्मरामि भवभीतिमहार्तिशान्त्यै नारायणं गरुडवाहनम् अब्जनाभम्
ग्राहाभिभूतवरवारिवारणमुक्तिहेतुं चक्रायुधं तरुणवारिजपत्रनेत्रम्
prātaḥ smarāmi bhavabhītimahārtiśāntyai nārāyaṇaṃ garuḍavāhanam abjanābham
grāhābhibhūtavaravārivāraṇamuktihetuṃ cakrāyudhaṃ taruṇavārijapatranetram
- 29
प्रातर्नमामि मनसा वचसा च मूर्ध्ना पादारविन्दयुगलं परमस्य पुंसः
नारायणस्य नरकार्णवतारणस्य पारायणप्रवणविप्रपरायणस्य
prātarnamāmi manasā vacasā ca mūrdhnā pādāravindayugalaṃ paramasya puṃsaḥ
nārāyaṇasya narakārṇavatāraṇasya pārāyaṇapravaṇavipraparāyaṇasya
- 30
प्रातर्भजामि भजताम् अभयङ्करं तं प्राक्सर्वजन्मकृतपापभयावहत्यै
यो ग्राहवक्त्रपतिताङ्घ्रिगजेन्द्रघोरशोकप्रणाशम् अकरोद्धृतशङ्खचक्रः
prātarbhajāmi bhajatām abhayaṅkaraṃ taṃ prāksarvajanmakṛtapāpabhayāvahatyai
yo grāhavaktrapatitāṅghrigajendraghoraśokapraṇāśam akaroddhṛtaśaṅkhacakraḥ

