24 shlokas
- 1
अथेध्मात्समिधम् आददान आह अग्नये समिध्यमानायानुब्रूहीति
athedhmātsamidham ādadāna āha agnaye samidhyamānāyānubrūhīti
- 2
अथ यत्र होतुर् अभिजानाति प्र वो वाजा अभिद्यव इति तत्प्रथमाम् अभ्यादधाति
atha yatra hotur abhijānāti pra vo vājā abhidyava iti tatprathamām abhyādadhāti
- 3
प्रणवे प्रणवे ऽभ्यादधाति
praṇave praṇave 'bhyādadhāti
- 4
अथ यत्र होतुर् अभिजानाति समिद्धो अग्न आहुत इति तदन्ततो ऽभ्यादधाति
atha yatra hotur abhijānāti samiddho agna āhuta iti tadantato 'bhyādadhāti
- 5
परि समिधं शिनष्टि
pari samidhaṃ śinaṣṭi
- 6
अथ यत्र होतुर् अभिजानाति आजुहोता दुवस्यत इति तद् एतेन वेदेन त्रिर् आहवनीयम् उपवाजयति
atha yatra hotur abhijānāti ājuhotā duvasyata iti tad etena vedena trir āhavanīyam upavājayati
- 7
अनूक्तासु सामिधेनीषु ध्रुवाज्यात्स्रुवेणोपहत्य वेदेनोपयम्य प्राजापत्यं तिर्यञ्चम् आघारम् आघारयति प्रजापतये स्वाहेति मनसा
anūktāsu sāmidhenīṣu dhruvājyātsruveṇopahatya vedenopayamya prājāpatyaṃ tiryañcam āghāram āghārayati prajāpataye svāheti manasā
- 8
अथ संप्रैषम् आहाग्नीदग्नींस्त्रिस्त्रिः संमृड्ढीति
atha saṃpraiṣam āhāgnīdagnīṃstristriḥ saṃmṛḍḍhīti
- 9
अथैष आग्नीध्र इध्मसंनहनानि स्फ्य उपसंगृह्य परिधीन्संमार्ष्टि त्रिर्मध्यमं त्रिर्दक्षिणार्ध्यं त्रिर् उत्तरार्ध्यं त्रिर् आहवनीयम् उपवाजयत्य् अग्ने वाजजिद्वाजं त्वाग्ने सरिष्यन्तं वाजं जेष्यन्तं वाजिनं वाजजितं वाजजित्यायै संमार्ज्म्य् अग्निम् अन्नादम् अन्नाद्यायेति
athaiṣa āgnīdhra idhmasaṃnahanāni sphya upasaṃgṛhya paridhīnsaṃmārṣṭi trirmadhyamaṃ trirdakṣiṇārdhyaṃ trir uttarārdhyaṃ trir āhavanīyam upavājayaty agne vājajidvājaṃ tvāgne sariṣyantaṃ vājaṃ jeṣyantaṃ vājinaṃ vājajitaṃ vājajityāyai saṃmārjmy agnim annādam annādyāyeti
- 10
अथाग्रेण जुहूपभृतौ प्राञ्चम् अञ्जलिं करोति भुवनम् असि विप्रथस्वाग्ने यष्टर् इदं नम इति
athāgreṇa juhūpabhṛtau prāñcam añjaliṃ karoti bhuvanam asi viprathasvāgne yaṣṭar idaṃ nama iti
- 11
अथादत्ते दक्षिणेन जुहूम्जुह्व् एहि अग्निस्त्वा ह्वयति देवयज्याया इति
athādatte dakṣiṇena juhūmjuhv ehi agnistvā hvayati devayajyāyā iti
- 12
सव्येनोपभृतम् उपभृद् एहि देवस्त्वा सविता ह्वयति देवयज्याया इति
savyenopabhṛtam upabhṛd ehi devastvā savitā hvayati devayajyāyā iti
- 13
सव्येनात्याक्रामञ्जपत्य् अग्नाविष्णू मा वाम् अवक्रमिषं विजिहाथां मा मा संताप्तं लोकं मे लोककृतौ कृणुतम् इति
savyenātyākrāmañjapaty agnāviṣṇū mā vām avakramiṣaṃ vijihāthāṃ mā mā saṃtāptaṃ lokaṃ me lokakṛtau kṛṇutam iti
- 14
स्थानं कल्पयते विष्णो स्थानम् असीति
sthānaṃ kalpayate viṣṇo sthānam asīti
- 15
अन्वारब्धे यजमाने मध्यमे परिधौ संस्पर्श्यर्जुम् आघारम् आघारयति संततं प्राञ्चम् अव्यवच्छिन्दन् इत इन्द्रो अकृणोद्वीर्याणि समारभ्योर्ध्वो अध्वरो दिविस्पृशम् अह्रुतो यज्ञो यज्ञपतेर् इन्द्रावान्त्स्वाहेति
anvārabdhe yajamāne madhyame paridhau saṃsparśyarjum āghāram āghārayati saṃtataṃ prāñcam avyavacchindan ita indro akṛṇodvīryāṇi samārabhyordhvo adhvaro divispṛśam ahruto yajño yajñapater indrāvāntsvāheti
- 16
बृहद्भा इति स्रुचम् उद्गृह्णाति
bṛhadbhā iti srucam udgṛhṇāti
- 17
अथासंस्पर्शयन्स्रुचाव् उदङ्ङ् अत्याक्रामञ्जपति पाहि माग्ने दुश्चरितात् आ मा सुचरिते भजेति
athāsaṃsparśayansrucāv udaṅṅ atyākrāmañjapati pāhi māgne duścaritāt ā mā sucarite bhajeti
- 18
जुह्वा ध्रुवां समनक्ति मखस्य शिरो ऽसि सं ज्योतिषा ज्योतिर् अङ्क्ताम् इति त्रिः
juhvā dhruvāṃ samanakti makhasya śiro 'si saṃ jyotiṣā jyotir aṅktām iti triḥ
- 19
अथ यथायतनं स्रुचौ सादयित्वा प्रवरं प्रवृणीते
atha yathāyatanaṃ srucau sādayitvā pravaraṃ pravṛṇīte
- 20
उत्कर इध्मसंनहनानि स्फ्य उपसंगृह्य पृष्ठम् आग्नीध्रो ऽनूपश्लिष्यति
utkara idhmasaṃnahanāni sphya upasaṃgṛhya pṛṣṭham āgnīdhro 'nūpaśliṣyati
- 21
अथाश्रावयत्य् ओ श्रावय अस्तु श्रौषट् अग्निर्देवो होता देवान्यक्षद्विद्वांश्चिकित्वान्मनुष्वद्भरतवद् अमुवद् अमुवत्ब्रह्मण्वद् एह वक्षत्ब्राह्मणा अस्य यज्ञस्य प्रावितार इति असौ मानुष इति होतुर्नाम गृह्णाति
athāśrāvayaty o śrāvaya astu śrauṣaṭ agnirdevo hotā devānyakṣadvidvāṃścikitvānmanuṣvadbharatavad amuvad amuvatbrahmaṇvad eha vakṣatbrāhmaṇā asya yajñasya prāvitāra iti asau mānuṣa iti hoturnāma gṛhṇāti
- 22
उपोत्थाय होता विमुञ्चति
upotthāya hotā vimuñcati
- 23
विमुक्तो ऽध्वर्युर् उपविशति
vimukto 'dhvaryur upaviśati
- 24
प्रसवम् आकाङ्क्षन्न् आस्ते
prasavam ākāṅkṣann āste

