21 shlokas
- 1
अथातो ऽनश्नत्पारायणविधिं व्याख्यास्यामः
athāto 'naśnatpārāyaṇavidhiṃ vyākhyāsyāmaḥ
- 2
शुचिवासाः स्याच्चीरवासा वा
śucivāsāḥ syāccīravāsā vā
- 3
हविष्यम् अन्नम् इच्छेद् अपः फलानि वा
haviṣyam annam icched apaḥ phalāni vā
- 4
ग्रामात्प्राचीं वोदीचीं वा दिशम् उपनिष्क्रम्य गोमयेन गोचर्ममात्रं चतुरश्रं स्थण्डिलम् उपलिप्य प्रोक्ष्य लक्षणम् उल्लिख्य अद्भिर् अभ्युक्ष्य अग्निम् उपसमाधाय संपरिस्तीर्यैताभ्यो देवताभ्यो जुहुयात्
अग्नये स्वाहा
प्रजापतये स्वाहा
सोमाय स्वाहा विश्वेभ्यो देवेभ्यः स्वयंभुव ऋग्भ्यो यजुर्भ्यः सामभ्यो ऽथर्वभ्यः श्रद्धायै प्रज्ञायै मेधायै श्रियै ह्रियै सवित्रे सावित्र्यै सदसस्पतये ऽनुमतये च
grāmātprācīṃ vodīcīṃ vā diśam upaniṣkramya gomayena gocarmamātraṃ caturaśraṃ sthaṇḍilam upalipya prokṣya lakṣaṇam ullikhya adbhir abhyukṣya agnim upasamādhāya saṃparistīryaitābhyo devatābhyo juhuyāt
agnaye svāhā
prajāpataye svāhā
somāya svāhā viśvebhyo devebhyaḥ svayaṃbhuva ṛgbhyo yajurbhyaḥ sāmabhyo 'tharvabhyaḥ śraddhāyai prajñāyai medhāyai śriyai hriyai savitre sāvitryai sadasaspataye 'numataye ca
- 5
हुत्वा वेदादिम् आरभेत संततम् अधीयीत
hutvā vedādim ārabheta saṃtatam adhīyīta
- 6
नान्तरा व्याहरेन्न चान्तरा विरमेत्
nāntarā vyāharenna cāntarā viramet
- 7
अथान्तरा व्याहरेद् अथान्तरा विरमेत्त्रिः प्राणान् आयम्य वृत्तान्ताद् एवारभेत
athāntarā vyāhared athāntarā viramettriḥ prāṇān āyamya vṛttāntād evārabheta
- 8
अप्रतिभायां यावता कालेन न वेद तावन्तं कालं तद् अधीयीत स यदा जानीयाद् ऋक्तो यजुष्टः सामत इति
apratibhāyāṃ yāvatā kālena na veda tāvantaṃ kālaṃ tad adhīyīta sa yadā jānīyād ṛkto yajuṣṭaḥ sāmata iti
- 9
तद्ब्राह्मणं तच्छान्दसं तद्दैवतम् अधीयीत
tadbrāhmaṇaṃ tacchāndasaṃ taddaivatam adhīyīta
- 10
द्वादश वेदसंहिता अधीयीत
यद् अनेनानध्याये ऽधीयीत यद्गुरवः कोपिता यान्य् अकार्याणि भवन्ति ताभिः पुनीते
शुद्धम् अस्य पूतं ब्रह्म भवति
dvādaśa vedasaṃhitā adhīyīta
yad anenānadhyāye 'dhīyīta yadguravaḥ kopitā yāny akāryāṇi bhavanti tābhiḥ punīte
śuddham asya pūtaṃ brahma bhavati
- 11
अत ऊर्ध्वं संचयः
ata ūrdhvaṃ saṃcayaḥ
- 12
अपरा द्वादश वेदसंहिता अधीत्य ताभिर् उशनसो लोकम् अवाप्नोति
aparā dvādaśa vedasaṃhitā adhītya tābhir uśanaso lokam avāpnoti
- 13
अपरा द्वादश वेदसंहिता अधीत्य ताभिर्बृहस्पतेर्लोकम् अवाप्नोति
aparā dvādaśa vedasaṃhitā adhītya tābhirbṛhaspaterlokam avāpnoti
- 14
अपरा द्वादश वेदसंहिता अधीत्य ताभिः प्रजापतेर्लोकम् अवाप्नोति
aparā dvādaśa vedasaṃhitā adhītya tābhiḥ prajāpaterlokam avāpnoti
- 15
अनश्नन्संहितासहस्रम् अधीयीत
ब्रह्मभूतो विरजो ब्रह्म भवति
anaśnansaṃhitāsahasram adhīyīta
brahmabhūto virajo brahma bhavati
- 16
संवत्सरं भैक्षं प्रयुञ्जानो दिव्यं चक्षुर्लभते
saṃvatsaraṃ bhaikṣaṃ prayuñjāno divyaṃ cakṣurlabhate
- 17
षण्मासान्यावकभक्षश्चतुरो मासान् उदकसक्तुभक्षो द्वौ मासौ फलभक्षो मासम् अब्भक्षो द्वादशरात्रं वाप्राश्नन्क्षिप्रम् अन्तर्धीयते ज्ञातीन्पुनाति सप्तावरान्सप्त पूर्वान् आत्मानं पञ्चदशं पङ्क्तिं च पुनाति
ṣaṇmāsānyāvakabhakṣaścaturo māsān udakasaktubhakṣo dvau māsau phalabhakṣo māsam abbhakṣo dvādaśarātraṃ vāprāśnankṣipram antardhīyate jñātīnpunāti saptāvarānsapta pūrvān ātmānaṃ pañcadaśaṃ paṅktiṃ ca punāti
- 18
ताम् एतां देवनिश्रयणीत्य् आचक्षते
tām etāṃ devaniśrayaṇīty ācakṣate
- 19
एतया वै देवा देवत्वम् अगच्छन्न् ऋषय ऋषित्वम्
etayā vai devā devatvam agacchann ṛṣaya ṛṣitvam
- 20
तस्य ह वा एतस्य यज्ञस्य त्रिविध एवारम्भकालः प्रातःसवने माध्यंदिने सवने ब्राह्मे वापररात्रे
tasya ha vā etasya yajñasya trividha evārambhakālaḥ prātaḥsavane mādhyaṃdine savane brāhme vāpararātre
- 21
तं वा एतं प्रजापतिः सप्तर्षिभ्यः प्रोवाच सप्तर्षयो महाजज्ञवे महाजज्ञुर्ब्राह्मणेभ्यः
ब्राह्मणेभ्यः
taṃ vā etaṃ prajāpatiḥ saptarṣibhyaḥ provāca saptarṣayo mahājajñave mahājajñurbrāhmaṇebhyaḥ
brāhmaṇebhyaḥ

