13 shlokas
- 1
अथ कर्मभिर् आत्मकृतैर्गुरुम् इवात्मानं मन्येतात्मार्थे प्रसृतियावकं श्रपयेद् उदितेषु नक्षत्रेषु
atha karmabhir ātmakṛtairgurum ivātmānaṃ manyetātmārthe prasṛtiyāvakaṃ śrapayed uditeṣu nakṣatreṣu
- 2
न ततो ऽग्नौ जुहुयात्
na tato 'gnau juhuyāt
- 3
न चात्र बलिकर्म
na cātra balikarma
- 4
अशृतं श्रप्यमाणं शृतं चाभिमन्त्रयेत
aśṛtaṃ śrapyamāṇaṃ śṛtaṃ cābhimantrayeta
- 5
यवो ऽसि धान्यराजो ऽसि वारुणो मधुसंयुतः
निर्णोदः सर्वपापानां पवित्रम् ऋषिभिः स्मृतम्
घृतं यवा मधु यवा आपो वा अमृतं यवाः
सर्वं पुनीत मे पापं यन्मया दुष्कृतं कृतम्
वाचा कृतं कर्म कृतं मनसा दुर्विचिन्तितम्
अलक्ष्मीं कालकर्णीं च सर्वं पुनीत मे यवाः
श्वसूकरावधूतं च काकोच्छिष्टहतं च यत्
मातापित्रोर् अशुश्रूषां सर्वं पुनीत मे यवाः
महापातकसंयुक्तं दारुणं राजकिल्बिषम्
बालवृद्धम् अधर्मं च सर्वं पुनीत मे यवाः
सुवर्णस्तैन्यम् अव्रत्यम् अयाज्यस्य च याजनम्
ब्राह्मणानां परीवादं सर्वं पुनीत मे यवाः
गणान्नं गणिकान्नं च शूद्रान्नं श्राद्धसूतकम्
चोरस्यान्नं नवश्राद्धं सर्वं पुनीत मे यवा इति
yavo 'si dhānyarājo 'si vāruṇo madhusaṃyutaḥ
nirṇodaḥ sarvapāpānāṃ pavitram ṛṣibhiḥ smṛtam
ghṛtaṃ yavā madhu yavā āpo vā amṛtaṃ yavāḥ
sarvaṃ punīta me pāpaṃ yanmayā duṣkṛtaṃ kṛtam
vācā kṛtaṃ karma kṛtaṃ manasā durvicintitam
alakṣmīṃ kālakarṇīṃ ca sarvaṃ punīta me yavāḥ
śvasūkarāvadhūtaṃ ca kākocchiṣṭahataṃ ca yat
mātāpitror aśuśrūṣāṃ sarvaṃ punīta me yavāḥ
mahāpātakasaṃyuktaṃ dāruṇaṃ rājakilbiṣam
bālavṛddham adharmaṃ ca sarvaṃ punīta me yavāḥ
suvarṇastainyam avratyam ayājyasya ca yājanam
brāhmaṇānāṃ parīvādaṃ sarvaṃ punīta me yavāḥ
gaṇānnaṃ gaṇikānnaṃ ca śūdrānnaṃ śrāddhasūtakam
corasyānnaṃ navaśrāddhaṃ sarvaṃ punīta me yavā iti
- 6
श्रप्यमाणे रक्षां कुर्यात्
नमो रुद्राय भूताधिपतये
द्यौः शान्ता
कृणुष्व पाजः प्रसितिं न पृथ्वीम् इत्य् एतेनानुवाकेन
ये देवाः पुरःसदो ऽग्निनेत्रा रक्षोहण इति पञ्चभिः पर्यायैः
मा नस्तोके
ब्रह्मा देवानाम् इति द्वाभ्याम्
śrapyamāṇe rakṣāṃ kuryāt
namo rudrāya bhūtādhipataye
dyauḥ śāntā
kṛṇuṣva pājaḥ prasitiṃ na pṛthvīm ity etenānuvākena
ye devāḥ puraḥsado 'gninetrā rakṣohaṇa iti pañcabhiḥ paryāyaiḥ
mā nastoke
brahmā devānām iti dvābhyām
- 7
शृतं च लघ्व् अश्नीयात्प्रयतः पात्रे निषिच्य
śṛtaṃ ca laghv aśnīyātprayataḥ pātre niṣicya
- 8
ये देवा मनोजाता मनोयुजः सुदक्षा दक्षपितारस्ते नः पान्तु ते नो ऽवन्तु तेभ्यो नमस्तेभ्यः स्वाहेति
आत्मनि जुहुयात्
ye devā manojātā manoyujaḥ sudakṣā dakṣapitāraste naḥ pāntu te no 'vantu tebhyo namastebhyaḥ svāheti
ātmani juhuyāt
- 9
त्रिरात्रं मेधार्थी
trirātraṃ medhārthī
- 10
षड्रात्रं पीत्वा पापकृच्छुद्धो भवति
ṣaḍrātraṃ pītvā pāpakṛcchuddho bhavati
- 11
सप्तरात्रं पीत्वा भ्रूणहननं गुरुतल्पगमनं सुवर्णस्तैन्यं सुरापानम् इति च पुनाति
saptarātraṃ pītvā bhrūṇahananaṃ gurutalpagamanaṃ suvarṇastainyaṃ surāpānam iti ca punāti
- 12
एकादशरात्रं पीत्वा पूर्वपुरुषकृतम् अपि पापं निर्णुदति
ekādaśarātraṃ pītvā pūrvapuruṣakṛtam api pāpaṃ nirṇudati
- 13
अपि वा गोनिष्क्रान्तानां यवानाम् एकविंशतिरात्रं पीत्वा गणान्पश्यति गणाधिपतिं पश्यति विद्यां पश्यति विद्याधिपतिं पश्यतीत्य् आह भगवान्बौधायनः
api vā goniṣkrāntānāṃ yavānām ekaviṃśatirātraṃ pītvā gaṇānpaśyati gaṇādhipatiṃ paśyati vidyāṃ paśyati vidyādhipatiṃ paśyatīty āha bhagavānbaudhāyanaḥ

