27 shlokas
- 1
अथ शालीनयायावरचक्रचरधर्मकाङ्क्षिणां नवभिर्वृत्तिभिर्वर्तमानानाम्
atha śālīnayāyāvaracakracaradharmakāṅkṣiṇāṃ navabhirvṛttibhirvartamānānām
- 2
तेषां तद्वर्तनाद्वृत्तिर् इत्य् उच्यते
teṣāṃ tadvartanādvṛttir ity ucyate
- 3
शालाश्रयत्वाच्छालीनत्वम्
śālāśrayatvācchālīnatvam
- 4
वृत्त्या वरया यातीति यायावरत्वम्
vṛttyā varayā yātīti yāyāvaratvam
- 5
अनुक्रमेण चरणाच्चक्रचरत्वम्
anukrameṇa caraṇāccakracaratvam
- 6
ता अनुव्याख्यास्यामः
tā anuvyākhyāsyāmaḥ
- 7
षण्णिवर्तनी कौद्दाली ध्रुवा संप्रक्षालनी समूहा पालनी शिलोञ्छा कापोता सिद्धेच्छेति नवैताः
ṣaṇṇivartanī kauddālī dhruvā saṃprakṣālanī samūhā pālanī śiloñchā kāpotā siddheccheti navaitāḥ
- 8
तासाम् एव वान्यापि दशमी वृत्तिर्भवति
tāsām eva vānyāpi daśamī vṛttirbhavati
- 9
आ नववृत्तेः
ā navavṛtteḥ
- 10
केशश्मश्रुलोमनखानि वापयित्वोपकल्पयते
keśaśmaśrulomanakhāni vāpayitvopakalpayate
- 11
कृष्णाजिनं कमण्डलुं यष्टिं वीवधं कुतपहारम् इति
kṛṣṇājinaṃ kamaṇḍaluṃ yaṣṭiṃ vīvadhaṃ kutapahāram iti
- 12
त्रैधातवीयेनेष्ट्वा प्रस्थास्यति वैश्वानर्या वा
traidhātavīyeneṣṭvā prasthāsyati vaiśvānaryā vā
- 13
अथ प्रातर् उदित आदित्ये यथासूत्रम् अग्नीन्प्रज्वाल्य गार्हपत्य आज्यं विलाप्योत्पूय स्रुक्स्रुवं निष्टप्य संमृज्य स्रुचि चतुर्गृहीतं गृहीत्वाहवनीये वास्तोष्पतीयं जुहोति
atha prātar udita āditye yathāsūtram agnīnprajvālya gārhapatya ājyaṃ vilāpyotpūya sruksruvaṃ niṣṭapya saṃmṛjya sruci caturgṛhītaṃ gṛhītvāhavanīye vāstoṣpatīyaṃ juhoti
- 14
वास्तोष्पते प्रति जानीह्य् अस्मान् इति पुरोनुवाक्याम् अनूच्य
वास्तोष्पते शग्मया संसदा त इति याज्यया जुहोति
vāstoṣpate prati jānīhy asmān iti puronuvākyām anūcya
vāstoṣpate śagmayā saṃsadā ta iti yājyayā juhoti
- 15
सर्व एवाहिताग्निर् इत्य् एके
sarva evāhitāgnir ity eke
- 16
यायावर इत्य् एके
yāyāvara ity eke
- 17
निर्गत्य ग्रामान्ते ग्रामसीमान्ते वावतिष्ठते
तत्र कुटीं मठं वा करोति कृतं वा प्रविशति
nirgatya grāmānte grāmasīmānte vāvatiṣṭhate
tatra kuṭīṃ maṭhaṃ vā karoti kṛtaṃ vā praviśati
- 18
कृष्णाजिनादीनाम् उपकॢप्तानां यस्मिन्न् अर्थे येन येन यत्प्रयोजनं तेन तेन तत्कुर्यात्
kṛṣṇājinādīnām upakḷptānāṃ yasminn arthe yena yena yatprayojanaṃ tena tena tatkuryāt
- 19
प्रसिद्धम् अग्नीनां परिचरणम्
प्रसिद्धं दर्शपूर्णमासाभ्यां यजनम्
प्रसिद्धः पञ्चानां महतां यज्ञानाम् अनुप्रयोगः
उत्पन्नानाम् ओषधीनां निर्वापणं दृष्टं भवति
prasiddham agnīnāṃ paricaraṇam
prasiddhaṃ darśapūrṇamāsābhyāṃ yajanam
prasiddhaḥ pañcānāṃ mahatāṃ yajñānām anuprayogaḥ
utpannānām oṣadhīnāṃ nirvāpaṇaṃ dṛṣṭaṃ bhavati
- 20
विश्वेभ्यो देवेभ्यो जुष्टं निर्वपामीति वा तूष्णीं वा ताः संस्कृत्य साधयति
viśvebhyo devebhyo juṣṭaṃ nirvapāmīti vā tūṣṇīṃ vā tāḥ saṃskṛtya sādhayati
- 21
तस्याध्यापनयाजनप्रतिग्रहा निवर्तन्ते ऽन्ये च यज्ञक्रतव इति
tasyādhyāpanayājanapratigrahā nivartante 'nye ca yajñakratava iti
- 22
हविष्यं च व्रतोपायनीयं दृष्टं भवति
haviṣyaṃ ca vratopāyanīyaṃ dṛṣṭaṃ bhavati
- 23
तद्यथा सर्पिर्मिश्रं दधिमिश्रम् अक्षारलवणम् अपिशितम् अपर्युषितम्
tadyathā sarpirmiśraṃ dadhimiśram akṣāralavaṇam apiśitam aparyuṣitam
- 24
ब्रह्मचर्यम् ऋतौ वा गच्छति
brahmacaryam ṛtau vā gacchati
- 25
पर्वणि पर्वणि केशश्मश्रुलोमनखवापनं शौचविधिश्च
parvaṇi parvaṇi keśaśmaśrulomanakhavāpanaṃ śaucavidhiśca
- 26
अथाप्य् उदाहरन्ति
श्रूयते द्विविधं शौचं यच्छिष्टैः पर्युपासितम्
बाह्यं निर्लेपनिर्गन्धम् अन्तःशौचम् अहिंसकम्
athāpy udāharanti
śrūyate dvividhaṃ śaucaṃ yacchiṣṭaiḥ paryupāsitam
bāhyaṃ nirlepanirgandham antaḥśaucam ahiṃsakam
- 27
अद्भिः शुध्यन्ति गात्राणि बुद्धिर्ज्ञानेन शुध्यति
अहिंसया च भूतात्मा मनः सत्येन शुध्यतीति
adbhiḥ śudhyanti gātrāṇi buddhirjñānena śudhyati
ahiṃsayā ca bhūtātmā manaḥ satyena śudhyatīti

