20 shlokas
- 1
षड्भागभृतो राजा रक्षेत्प्रजाः
ṣaḍbhāgabhṛto rājā rakṣetprajāḥ
- 2
ब्रह्म वै स्वं महिमानं ब्राह्मणेष्व् अदधाद् अध्ययनाध्यापनयजनयाजनदानप्रतिग्रहसंयुक्तं वेदानां गुप्त्यै
brahma vai svaṃ mahimānaṃ brāhmaṇeṣv adadhād adhyayanādhyāpanayajanayājanadānapratigrahasaṃyuktaṃ vedānāṃ guptyai
- 3
क्षत्रे बलम् अध्ययनयजनदानशस्त्रकोशभूतरक्षणसंयुक्तं क्षत्रस्य वृद्ध्यै
kṣatre balam adhyayanayajanadānaśastrakośabhūtarakṣaṇasaṃyuktaṃ kṣatrasya vṛddhyai
- 4
विट्स्व् अध्ययनयजनदानकृषिवाणिज्यपशुपालनसंयुक्तं कर्मणां वृद्ध्यै
viṭsv adhyayanayajanadānakṛṣivāṇijyapaśupālanasaṃyuktaṃ karmaṇāṃ vṛddhyai
- 5
शूद्रेषु पूर्वेषां परिचर्याम्
śūdreṣu pūrveṣāṃ paricaryām
- 6
पत्तो ह्य् असृज्यन्तेति
patto hy asṛjyanteti
- 7
सर्वतोधुरं पुरोहितं वृणुयात्
sarvatodhuraṃ purohitaṃ vṛṇuyāt
- 8
तस्य शासने वर्तेत
tasya śāsane varteta
- 9
संग्रामे न निवर्तेत
saṃgrāme na nivarteta
- 10
न कर्णिभिर्न दिग्धैः प्रहरेत्
na karṇibhirna digdhaiḥ praharet
- 11
भीतमत्तोन्मत्तप्रमत्तविसंनाहस्त्रीबालवृद्धब्राह्मणैर्न युध्येत
bhītamattonmattapramattavisaṃnāhastrībālavṛddhabrāhmaṇairna yudhyeta
- 12
अन्यत्राततायिनः
anyatrātatāyinaḥ
- 13
अथाप्य् उदाहरन्ति
अध्यापकं कुले जातं यो हन्याद् आततायिनम्
न तेन भ्रूणहा भवति मन्युस्तन्मन्युम् ऋच्छति
इति
athāpy udāharanti
adhyāpakaṃ kule jātaṃ yo hanyād ātatāyinam
na tena bhrūṇahā bhavati manyustanmanyum ṛcchati
iti
- 14
सामुद्रशुल्को वरं रूपम् उद्धृत्य दशपणं शतम्
sāmudraśulko varaṃ rūpam uddhṛtya daśapaṇaṃ śatam
- 15
अन्येषाम् अपि सारानुरूप्येणानुपहत्य धर्म्यं प्रकल्पयेत्
anyeṣām api sārānurūpyeṇānupahatya dharmyaṃ prakalpayet
- 16
अब्राह्मणस्य प्रनष्टस्वामिकं रिक्थं संवत्सरं परिपाल्य राजा हरेत्
abrāhmaṇasya pranaṣṭasvāmikaṃ rikthaṃ saṃvatsaraṃ paripālya rājā haret
- 17
अवध्यो वै ब्राह्मणः सर्वापराधेषु
avadhyo vai brāhmaṇaḥ sarvāparādheṣu
- 18
ब्राह्मणस्य ब्रह्महत्यागुरुतल्पगमनसुवर्णस्तेयसुरापानेषु कुसिन्धभगसृगालसुराध्वजांस्तप्तेनायसा ललाटे ऽङ्कयित्वा विषयान्निर्धमनम्
brāhmaṇasya brahmahatyāgurutalpagamanasuvarṇasteyasurāpāneṣu kusindhabhagasṛgālasurādhvajāṃstaptenāyasā lalāṭe 'ṅkayitvā viṣayānnirdhamanam
- 19
क्षत्रियादीनां ब्राह्मणवधे वधः सर्वस्वहरणम्च
kṣatriyādīnāṃ brāhmaṇavadhe vadhaḥ sarvasvaharaṇamca
- 20
तेषाम् एव तुल्यापकृष्टवधे यथाबलम् अनुरूपान्दण्डान्प्रकल्पयेत्
teṣām eva tulyāpakṛṣṭavadhe yathābalam anurūpāndaṇḍānprakalpayet

