19 shlokas
- 1
मृन्मयानां पात्राणाम् उच्छिष्टसमन्वारब्धानाम् अवकूलनम्
mṛnmayānāṃ pātrāṇām ucchiṣṭasamanvārabdhānām avakūlanam
- 2
उच्छिष्टलेपोपहतानां पुनर्दहनम्
ucchiṣṭalepopahatānāṃ punardahanam
- 3
मूत्रपुरीषलोहितरेतःप्रभृत्युपहतानाम् उत्सर्गः
mūtrapurīṣalohitaretaḥprabhṛtyupahatānām utsargaḥ
- 4
तैजसानां पात्राणां पूर्ववत्परिमृष्टानां प्रक्षालनम्
taijasānāṃ pātrāṇāṃ pūrvavatparimṛṣṭānāṃ prakṣālanam
- 5
परिमार्जनद्रव्याणि गोशकृन्मृद्भस्मेति
parimārjanadravyāṇi gośakṛnmṛdbhasmeti
- 6
मूत्रपुरीषलोहितरेतःप्रभृत्युपहतानां पुनःकरणम्
mūtrapurīṣalohitaretaḥprabhṛtyupahatānāṃ punaḥkaraṇam
- 7
गोमूत्रे वा सप्तरात्रं परिशायनं महानद्यां वा
gomūtre vā saptarātraṃ pariśāyanaṃ mahānadyāṃ vā
- 8
एवम् अश्ममयानाम्
evam aśmamayānām
- 9
अलाबुबिल्वविनाडानां गोवालैः परिमार्जनम्
alābubilvavināḍānāṃ govālaiḥ parimārjanam
- 10
नडवेणुशरकुशव्यूतानां गोमयेनाद्भिर् इति प्रक्षालनम्
naḍaveṇuśarakuśavyūtānāṃ gomayenādbhir iti prakṣālanam
- 11
व्रीहीणाम् उपघाते प्रक्षाल्यावशोषणम्
vrīhīṇām upaghāte prakṣālyāvaśoṣaṇam
- 12
बहूनां तु प्रोक्षणम्
bahūnāṃ tu prokṣaṇam
- 13
तण्डुलानाम् उत्सर्गः
taṇḍulānām utsargaḥ
- 14
एवं सिद्धहविषाम्
evaṃ siddhahaviṣām
- 15
महतां श्ववायसप्रभृत्युपहतानां तं देशं पुरुषान्नम् उद्धृत्य
पवमानः सुवर्जन इति
एतेनानुवाकेनाभ्युक्षणम्
mahatāṃ śvavāyasaprabhṛtyupahatānāṃ taṃ deśaṃ puruṣānnam uddhṛtya
pavamānaḥ suvarjana iti
etenānuvākenābhyukṣaṇam
- 16
मधूदके पयोविकारे च पात्रात्पात्रान्तरानयने शौचम्
madhūdake payovikāre ca pātrātpātrāntarānayane śaucam
- 17
एवं तैलसर्पिषी उच्छिष्टसमन्वारब्धे उदके ऽवधायोपयोजयेत्
evaṃ tailasarpiṣī ucchiṣṭasamanvārabdhe udake 'vadhāyopayojayet
- 18
अमेध्याभ्याधाने समारोप्याग्निं मथित्वा पवमानेष्टिः
amedhyābhyādhāne samāropyāgniṃ mathitvā pavamāneṣṭiḥ
- 19
शौचदेशमन्त्रावृदर्थद्रव्यसंस्कारकालभेदेषु पूर्वपूर्वप्राधान्यम्
पूर्वपूर्वप्राधान्यम्
śaucadeśamantrāvṛdarthadravyasaṃskārakālabhedeṣu pūrvapūrvaprādhānyam
pūrvapūrvaprādhānyam

