10 shlokas
- 1
निवृत्तः पापकर्मभ्यः प्रवृत्तः पुण्यकर्मसु
यो विप्रस्तस्य सिध्यन्ति विना यन्त्रैर् अपि क्रियाः
nivṛttaḥ pāpakarmabhyaḥ pravṛttaḥ puṇyakarmasu
yo viprastasya sidhyanti vinā yantrair api kriyāḥ
- 2
ब्राह्मणा ऋजवस्तस्माद्यद्यद् इच्छन्ति चेतसा
तत्तद् आसादयन्त्य् आशु संशुद्धा ऋजुकर्मभिः
brāhmaṇā ṛjavastasmādyadyad icchanti cetasā
tattad āsādayanty āśu saṃśuddhā ṛjukarmabhiḥ
- 3
एवम् एतानि यन्त्राणि तावत्कार्याणि धीमता
कालेन यावतोपैति विग्रहः शुद्धिम् आत्मनः
evam etāni yantrāṇi tāvatkāryāṇi dhīmatā
kālena yāvatopaiti vigrahaḥ śuddhim ātmanaḥ
- 4
एभिर्यन्त्रैर्विशुद्धात्मा त्रिरात्रोपोषितस्ततः
तद् आरभेत येनर्द्धिं कर्मणा प्राप्तुम् इच्छति
ebhiryantrairviśuddhātmā trirātropoṣitastataḥ
tad ārabheta yenarddhiṃ karmaṇā prāptum icchati
- 5
क्ष्मापवित्रः सहस्राक्षो मृगारो ऽंहोमुचौ गणौ
पावमान्यश्च कूश्माण्ड्यो वैश्वानर्य ऋचश्च याः
kṣmāpavitraḥ sahasrākṣo mṛgāro 'ṃhomucau gaṇau
pāvamānyaśca kūśmāṇḍyo vaiśvānarya ṛcaśca yāḥ
- 6
घृतौदनेन ता जुह्वत्सप्ताहं सवनत्रयम्
मौनव्रती हविष्याशी निगृहीतेन्द्रियक्रियः
ghṛtaudanena tā juhvatsaptāhaṃ savanatrayam
maunavratī haviṣyāśī nigṛhītendriyakriyaḥ
- 7
सिंहे म इत्य् अपां पूर्णे पात्रे ऽवेक्ष्य चतुष्पथे
मुच्यते सर्वपापेभ्यो महतः पातकाद् अपि
siṃhe ma ity apāṃ pūrṇe pātre 'vekṣya catuṣpathe
mucyate sarvapāpebhyo mahataḥ pātakād api
- 8
वृद्धत्वे यौवने बाल्ये यः कृतः पापसंचयः
पूर्वजन्मसु चाज्ञानात्तस्माद् अपि विमुच्यते
vṛddhatve yauvane bālye yaḥ kṛtaḥ pāpasaṃcayaḥ
pūrvajanmasu cājñānāttasmād api vimucyate
- 9
भोजयित्वा द्विजान् अन्ते पायसेन ससर्पिषा
गोभूमितिलहेमानि भुक्तवद्भ्यः प्रदाय च
bhojayitvā dvijān ante pāyasena sasarpiṣā
gobhūmitilahemāni bhuktavadbhyaḥ pradāya ca
- 10
विप्रो भवति पूतात्मा निर्दग्धवृजिनेन्धनः
काम्यानां कर्मणां योग्यस्तथाधानादिकर्मणाम्
vipro bhavati pūtātmā nirdagdhavṛjinendhanaḥ
kāmyānāṃ karmaṇāṃ yogyastathādhānādikarmaṇām

