8 shlokas
- 1
प्रायश्चित्तानि वक्ष्यामो ऽविख्यातानि विशेषतः
समाहितानां युक्तानां प्रमादेषु कथं भवेत्
prāyaścittāni vakṣyāmo 'vikhyātāni viśeṣataḥ
samāhitānāṃ yuktānāṃ pramādeṣu kathaṃ bhavet
- 2
ॐपूर्वाभिर्व्याहृतिभिः सर्वाभिः सर्वपातकेष्व् आचामेत्
oṃpūrvābhirvyāhṛtibhiḥ sarvābhiḥ sarvapātakeṣv ācāmet
- 3
यत्प्रथमम् आचामति तेनर्ग्वेदं प्रीणाति यद्द्वितीयं तेन यजुर्वेदं यत्तृतीयं तेन सामवेदम्
yatprathamam ācāmati tenargvedaṃ prīṇāti yaddvitīyaṃ tena yajurvedaṃ yattṛtīyaṃ tena sāmavedam
- 4
यत्प्रथमं परिमार्ष्टि तेनाथर्ववेदं यद्द्वितीयं तेनेतिहासपुराणम्
yatprathamaṃ parimārṣṭi tenātharvavedaṃ yaddvitīyaṃ tenetihāsapurāṇam
- 5
यत्सव्यं पाणिं प्रोक्षति पादौ शिरो हृदयं नासिके चक्षुषी श्रोत्रे नाभिं चोपस्पृशति तेनौषधिवनस्पतयः सर्वाश्च देवताः प्रीणाति
तस्माद् आचमनाद् एव सर्वस्मात्पापात्प्रमुच्यते
yatsavyaṃ pāṇiṃ prokṣati pādau śiro hṛdayaṃ nāsike cakṣuṣī śrotre nābhiṃ copaspṛśati tenauṣadhivanaspatayaḥ sarvāśca devatāḥ prīṇāti
tasmād ācamanād eva sarvasmātpāpātpramucyate
- 6
अष्टौ वा समिध आदध्यात्
देवकृतस्यैनसो ऽवयजनम् असि स्वाहा
मनुष्यकृतस्यैनसो ऽवयजनम् असि स्वाहा
पितृकृतस्यैनसो ऽवयजनम् असि स्वाहा
आत्मकृतस्यैनसो ऽवयजनम् असि स्वाहा
यद्दिवा च नक्तं चैनश्चकृम तस्यावयजनम् असि स्वाहा
यत्स्वपन्तश्च जाग्रतश्चैनश्चकृम तस्यावयजनम् असि स्वाहा
यद्विद्वांसश्चाविद्वांसश्चैनश्चकृम तस्यावयजनम् असि स्वाहा
एनस एनसो ऽवयजनम् असि स्वाहेति
aṣṭau vā samidha ādadhyāt
devakṛtasyainaso 'vayajanam asi svāhā
manuṣyakṛtasyainaso 'vayajanam asi svāhā
pitṛkṛtasyainaso 'vayajanam asi svāhā
ātmakṛtasyainaso 'vayajanam asi svāhā
yaddivā ca naktaṃ cainaścakṛma tasyāvayajanam asi svāhā
yatsvapantaśca jāgrataścainaścakṛma tasyāvayajanam asi svāhā
yadvidvāṃsaścāvidvāṃsaścainaścakṛma tasyāvayajanam asi svāhā
enasa enaso 'vayajanam asi svāheti
- 7
एतैर् अष्टाभिर्हुत्वा सर्वस्मात्पापात्प्रमुच्यते
etair aṣṭābhirhutvā sarvasmātpāpātpramucyate
- 8
अथाप्य् उदाहरन्ति
अघमर्षणं देवकृतं शुद्धवत्यस्तरत्समाः
कूश्माण्ड्यः पावमान्यश्च विरजा मृत्युलाङ्गलम्
दुर्गा व्याहृतयो रुद्रा महादोषविनाशनाः
महादोषविनाशना इति
athāpy udāharanti
aghamarṣaṇaṃ devakṛtaṃ śuddhavatyastaratsamāḥ
kūśmāṇḍyaḥ pāvamānyaśca virajā mṛtyulāṅgalam
durgā vyāhṛtayo rudrā mahādoṣavināśanāḥ
mahādoṣavināśanā iti

