16 shlokas
- 1
प्रायश्चित्तानि वक्ष्यामो नानार्थानि पृथक्पृथक्
तेषु तेषु च दोषेषु गरीयांसि लघूनि च
prāyaścittāni vakṣyāmo nānārthāni pṛthakpṛthak
teṣu teṣu ca doṣeṣu garīyāṃsi laghūni ca
- 2
यद्य् अत्र हि भवेद्युक्तं तद्धि तत्रैव निर्दिशेत्
भूयो भूयो गरीयःसु लघुष्व् अल्पीयसस्तथा
yady atra hi bhavedyuktaṃ taddhi tatraiva nirdiśet
bhūyo bhūyo garīyaḥsu laghuṣv alpīyasastathā
- 3
विधिना शास्त्रदृष्टेन प्रायश्चित्तानि निर्दिशेत्
vidhinā śāstradṛṣṭena prāyaścittāni nirdiśet
- 4
प्रतिग्रहीष्यमाणस्तु प्रतिगृह्य तथैव च
ऋचस्तरत्समन्द्यस्तु चतस्रः परिवर्तयेत्
pratigrahīṣyamāṇastu pratigṛhya tathaiva ca
ṛcastaratsamandyastu catasraḥ parivartayet
- 5
अभोज्यानां तु सर्वेषाम् अभोज्यान्नस्य भोजने
ऋग्भिस्तरत्समन्दीभिर्मार्जनं पापशोधनम्
abhojyānāṃ tu sarveṣām abhojyānnasya bhojane
ṛgbhistaratsamandībhirmārjanaṃ pāpaśodhanam
- 6
भ्रूणहत्याविधिस्त्व् अन्यस्तं तु वक्ष्याम्य् अतः परम्
विधिना येन मुच्यन्ते पातकेभ्यो ऽपि सर्वशः
bhrūṇahatyāvidhistv anyastaṃ tu vakṣyāmy ataḥ param
vidhinā yena mucyante pātakebhyo 'pi sarvaśaḥ
- 7
प्राणायामान्पवित्राणि व्याहृतीः प्रणवं तथा
जपेद् अघमर्षणं सूक्तं पयसा द्वादश क्षपाः
prāṇāyāmānpavitrāṇi vyāhṛtīḥ praṇavaṃ tathā
japed aghamarṣaṇaṃ sūktaṃ payasā dvādaśa kṣapāḥ
- 8
त्रिरात्रं वायुभक्षो वा क्लिन्नवासाः प्लुतः शुचिः
trirātraṃ vāyubhakṣo vā klinnavāsāḥ plutaḥ śuciḥ
- 9
प्रतिषिद्धांस्तथाचारान् अभ्यस्यापि पुनःपुनः
वारुणीभिर् उपस्थाय सर्वपापैः प्रमुच्यत इति
pratiṣiddhāṃstathācārān abhyasyāpi punaḥpunaḥ
vāruṇībhir upasthāya sarvapāpaiḥ pramucyata iti
- 10
अथावकीर्ण्य् अमावास्यायां निश्य् अग्निम् उपसमाधाय दार्विहोमिकीं परिचेष्टां कृत्वा द्वे आज्याहुती जुहोति
कामावकीर्णो ऽस्म्य् अवकीर्णो ऽस्मि काम कामाय स्वाहा
कामाभिद्रुग्धो ऽस्म्य् अभिद्रुग्धो ऽस्मि काम कामाय स्वाहेति
athāvakīrṇy amāvāsyāyāṃ niśy agnim upasamādhāya dārvihomikīṃ pariceṣṭāṃ kṛtvā dve ājyāhutī juhoti
kāmāvakīrṇo 'smy avakīrṇo 'smi kāma kāmāya svāhā
kāmābhidrugdho 'smy abhidrugdho 'smi kāma kāmāya svāheti
- 11
हुत्वा प्रयताञ्जलिः कवातिर्यङ्ङ् अग्निम् उपतिष्ठेत
सं मा सिञ्चन्तु मरुतः सम् इन्द्रः सं बृहस्पतिः
सं मायम् अग्निः सिञ्चत्व् आयुषा च बलेन चायुष्मन्तं करोतु मेति
प्रति हास्मै मरुतः प्राणान्दधति प्रतीन्द्रो बलं प्रति बृहस्पतिर्ब्रह्मवर्चसं प्रत्य् अग्निर् इतरत्सर्वम्
सर्वतनुर्भूत्वा सर्वम् आयुर् एति
त्रिर् अभिमन्त्रयेत
त्रिषत्या हि देवा इति विज्ञायते
hutvā prayatāñjaliḥ kavātiryaṅṅ agnim upatiṣṭheta
saṃ mā siñcantu marutaḥ sam indraḥ saṃ bṛhaspatiḥ
saṃ māyam agniḥ siñcatv āyuṣā ca balena cāyuṣmantaṃ karotu meti
prati hāsmai marutaḥ prāṇāndadhati pratīndro balaṃ prati bṛhaspatirbrahmavarcasaṃ praty agnir itaratsarvam
sarvatanurbhūtvā sarvam āyur eti
trir abhimantrayeta
triṣatyā hi devā iti vijñāyate
- 12
यो ऽपूत इव मन्येत आत्मानम् उपपातकैः
स हुत्वैतेन विधिना सर्वस्मात्पापात्प्रमुच्यते
yo 'pūta iva manyeta ātmānam upapātakaiḥ
sa hutvaitena vidhinā sarvasmātpāpātpramucyate
- 13
अपि वानाद्यापेयप्रतिषिद्धभोजनेषु दोषवच्च कर्म कृत्वाभिसंधिपूर्वम् अनभिसंधिपूर्वं वा शूद्रायां च रेतः सिक्त्वायोनौ वाब्लिङ्गाभिर्वारुणीभिश्चोपस्पृश्य प्रयतो भवति
api vānādyāpeyapratiṣiddhabhojaneṣu doṣavacca karma kṛtvābhisaṃdhipūrvam anabhisaṃdhipūrvaṃ vā śūdrāyāṃ ca retaḥ siktvāyonau vābliṅgābhirvāruṇībhiścopaspṛśya prayato bhavati
- 14
अथाप्य् उदाहरन्ति
अनाद्यापेयप्रतिषिद्धभोजने विरुद्धधर्माचरिते च कर्मणि
मतिप्रवृत्ते ऽपि च पातकोपमैर्विशुध्यते ऽथापि च सर्वपातकैः
athāpy udāharanti
anādyāpeyapratiṣiddhabhojane viruddhadharmācarite ca karmaṇi
matipravṛtte 'pi ca pātakopamairviśudhyate 'thāpi ca sarvapātakaiḥ
- 15
त्रिरात्रं वाप्य् उपवसंस्त्रिर् अह्नो ऽभ्युपयन्न् अपः
प्राणान् आत्मनि संयम्य त्रिः पठेद् अघमर्षणम्
यथाश्वमेधावभृथ एवं तन्मनुर् अब्रवीत्
trirātraṃ vāpy upavasaṃstrir ahno 'bhyupayann apaḥ
prāṇān ātmani saṃyamya triḥ paṭhed aghamarṣaṇam
yathāśvamedhāvabhṛtha evaṃ tanmanur abravīt
- 16
विज्ञायते च
चरणं पवित्रं विततं पुराणं येन पूतस्तरति दुष्कृतानि
तेन पवित्रेण शुद्धेन पूता अति पाप्मानम् अरातिं तरेमेति
vijñāyate ca
caraṇaṃ pavitraṃ vitataṃ purāṇaṃ yena pūtastarati duṣkṛtāni
tena pavitreṇa śuddhena pūtā ati pāpmānam arātiṃ taremeti

