10 shlokas
- 1
समाधुच्छन्दसा रुद्रा गायत्री प्रणवान्विता
सप्त व्याहृतयश्चैव जप्याः पापविनाशनाः
samādhucchandasā rudrā gāyatrī praṇavānvitā
sapta vyāhṛtayaścaiva japyāḥ pāpavināśanāḥ
- 2
मृगारेष्टिः पवित्रेष्टिस्त्रिहविः पावमान्य् अपि
इष्टयः पापनाशिन्यो वैश्वानर्या समन्विताः
mṛgāreṣṭiḥ pavitreṣṭistrihaviḥ pāvamāny api
iṣṭayaḥ pāpanāśinyo vaiśvānaryā samanvitāḥ
- 3
इदं चैवापरं गुह्यम् उच्यमानं निबोधत
मुच्यते सर्वपापेभ्यो महतः पातकाद् ऋते
idaṃ caivāparaṃ guhyam ucyamānaṃ nibodhata
mucyate sarvapāpebhyo mahataḥ pātakād ṛte
- 4
पवित्रैर्मार्जनं कुर्वन्रुद्रैकादशिनीं जपन्
पवित्राणि घृतैर्जुह्वत्प्रयच्छन्हेमगोतिलान्
pavitrairmārjanaṃ kurvanrudraikādaśinīṃ japan
pavitrāṇi ghṛtairjuhvatprayacchanhemagotilān
- 5
यो ऽश्नीयाद्यावकं पक्वं गोमूत्रे सशकृद्रसे
सदधिक्षीरसर्पिष्के मुच्यते सो ऽंहसः क्षणात्
yo 'śnīyādyāvakaṃ pakvaṃ gomūtre saśakṛdrase
sadadhikṣīrasarpiṣke mucyate so 'ṃhasaḥ kṣaṇāt
- 6
प्रसूतो यश्च शूद्रायां येनागम्या च लङ्घिता
सप्तरात्रात्प्रमुच्येते विधिनैतेन ताव् उभौ
prasūto yaśca śūdrāyāṃ yenāgamyā ca laṅghitā
saptarātrātpramucyete vidhinaitena tāv ubhau
- 7
रेतोमूत्रपुरीषाणां प्राशने ऽभोज्यभोजने
पर्याधानेज्ययोर् एतत्परिवित्ते च भेषजम्
retomūtrapurīṣāṇāṃ prāśane 'bhojyabhojane
paryādhānejyayor etatparivitte ca bheṣajam
- 8
अपातकानि कर्माणि कृत्वैव सुबहून्य् अपि
मुच्यते सर्वपापेभ्य इत्य् एतद्वचनं सताम्
apātakāni karmāṇi kṛtvaiva subahūny api
mucyate sarvapāpebhya ity etadvacanaṃ satām
- 9
मन्त्रमार्गप्रमाणं तु विधानं समुदीरितम्
भरद्वाजादयो येन ब्रह्मणः सात्मतां गताः
mantramārgapramāṇaṃ tu vidhānaṃ samudīritam
bharadvājādayo yena brahmaṇaḥ sātmatāṃ gatāḥ
- 10
प्रसन्नहृदयो विप्रः प्रयोगाद् अस्य कर्मणः
कामांस्तांस्तान् अवाप्नोति ये ये कामा हृदि स्थिताः
ये ये कामा हृदि स्थिता इति
prasannahṛdayo vipraḥ prayogād asya karmaṇaḥ
kāmāṃstāṃstān avāpnoti ye ye kāmā hṛdi sthitāḥ
ye ye kāmā hṛdi sthitā iti

