14 shlokas
- 1
अथ हस्तौ प्रक्षाल्य कमण्डलुं मृत्पिण्डं च संगृह्य तीर्थं गत्वा त्रिः पादौ प्रक्षालयते त्रिर् आत्मानं
atha hastau prakṣālya kamaṇḍaluṃ mṛtpiṇḍaṃ ca saṃgṛhya tīrthaṃ gatvā triḥ pādau prakṣālayate trir ātmānaṃ
- 2
अथ हैके ब्रुवते
श्मशानम् आपो देवगृहं गोष्ठं यत्र च ब्राह्मणा अप्रक्षाल्य पादौ तन्न प्रवेष्टव्यम् इति
atha haike bruvate
śmaśānam āpo devagṛhaṃ goṣṭhaṃ yatra ca brāhmaṇā aprakṣālya pādau tanna praveṣṭavyam iti
- 3
अथापो ऽभिप्रपद्यते
हिरण्यशृङ्गं वरुणं प्रपद्ये तीर्थं मे देहि याचितः
यन्मया भुक्तम् असाधूनां पापेभ्यश्च प्रतिग्रहः
यन्मे मनसा वाचा कर्मणा वा दुष्कृतं कृतम्
तन्न इन्द्रो वरुणो बृहस्पतिः सविता च पुनन्तु पुनःपुनर् इति
athāpo 'bhiprapadyate
hiraṇyaśṛṅgaṃ varuṇaṃ prapadye tīrthaṃ me dehi yācitaḥ
yanmayā bhuktam asādhūnāṃ pāpebhyaśca pratigrahaḥ
yanme manasā vācā karmaṇā vā duṣkṛtaṃ kṛtam
tanna indro varuṇo bṛhaspatiḥ savitā ca punantu punaḥpunar iti
- 4
अथाञ्जलिनाप उपहन्ति
सुमित्रा न आप ओषधयः सन्त्व् इति
athāñjalināpa upahanti
sumitrā na āpa oṣadhayaḥ santv iti
- 5
तां दिशं निरुक्षति यस्याम् अस्य दिशि द्वेष्यो भवति
दुर्मित्रास्तस्मै भूयासुर्यो ऽस्मान्द्वेष्टि यं च वयं द्विष्म इति
tāṃ diśaṃ nirukṣati yasyām asya diśi dveṣyo bhavati
durmitrāstasmai bhūyāsuryo 'smāndveṣṭi yaṃ ca vayaṃ dviṣma iti
- 6
अथाप उपस्पृश्य त्रिः प्रदक्षिणम् उदकम् आवर्तयति
यद् अपां क्रूरं यद् अमेध्यं यद् अशान्तं तद् अपगच्छताद् इति
athāpa upaspṛśya triḥ pradakṣiṇam udakam āvartayati
yad apāṃ krūraṃ yad amedhyaṃ yad aśāntaṃ tad apagacchatād iti
- 7
अप्सु निमज्ज्योन्मज्ज्य
apsu nimajjyonmajjya
- 8
नाप्सु सतः प्रयमणं विद्यते न वासःपल्पूलनं नोपस्पर्शनम्
nāpsu sataḥ prayamaṇaṃ vidyate na vāsaḥpalpūlanaṃ nopasparśanam
- 9
यद्य् उपरुद्धाः स्युर् एतेनोपतिष्ठते
नमो ऽग्नये ऽप्सुमते नम इन्द्राय नमो वरुणाय नमो वारुण्यै नमो ऽद्भ्य इति
yady uparuddhāḥ syur etenopatiṣṭhate
namo 'gnaye 'psumate nama indrāya namo varuṇāya namo vāruṇyai namo 'dbhya iti
- 10
उत्तीर्याचम्याचान्तः पुनर् आचामेत्
आपः पुनन्तु पृथिवीं पृथिवी पूता पुनातु माम्
पुनन्तु ब्रह्मणस्पतिर्ब्रह्म पूता पुनातु माम्
यद् उच्छिष्टम् अभोज्यं यद्वा दुश्चरितं मम
सर्वं पुनन्तु माम् आपो ऽसतां च प्रतिग्रहं स्वाहेति
uttīryācamyācāntaḥ punar ācāmet
āpaḥ punantu pṛthivīṃ pṛthivī pūtā punātu mām
punantu brahmaṇaspatirbrahma pūtā punātu mām
yad ucchiṣṭam abhojyaṃ yadvā duścaritaṃ mama
sarvaṃ punantu mām āpo 'satāṃ ca pratigrahaṃ svāheti
- 11
पवित्रे कृत्वाद्भिर्मार्जयति
आपो हि ष्ठा मयोभुव इति तिसृभिः
हिरण्यवर्णाः शुचयः पावका इति चतसृभिः
पवमानः सुवर्जन इति
एतेनानुवाकेन मार्जयित्वान्तर्जलगतो ऽघमर्षणेन त्रीन्प्राणायामान्धारयित्वोत्तीर्य वासः पीडयित्वा प्रक्षालितोपवातान्य् अक्लिष्टानि वासांसि परिधायाप आचम्य दर्भेष्व् आसीनो दर्भान्धारयमाणः प्राङ्मुखः सावित्रीं सहस्रकृत्व आवर्तयेच्छतकृत्वो ऽपरिमितकृत्वो वा दशावरम्
pavitre kṛtvādbhirmārjayati
āpo hi ṣṭhā mayobhuva iti tisṛbhiḥ
hiraṇyavarṇāḥ śucayaḥ pāvakā iti catasṛbhiḥ
pavamānaḥ suvarjana iti
etenānuvākena mārjayitvāntarjalagato 'ghamarṣaṇena trīnprāṇāyāmāndhārayitvottīrya vāsaḥ pīḍayitvā prakṣālitopavātāny akliṣṭāni vāsāṃsi paridhāyāpa ācamya darbheṣv āsīno darbhāndhārayamāṇaḥ prāṅmukhaḥ sāvitrīṃ sahasrakṛtva āvartayecchatakṛtvo 'parimitakṛtvo vā daśāvaram
- 12
अथादित्यम् उपतिष्ठते
उद्वयं तमसस्परि
उद् उ त्यम्
चित्रम्
तच्चक्षुर्देवहितम्
य उदगाद् इति
athādityam upatiṣṭhate
udvayaṃ tamasaspari
ud u tyam
citram
taccakṣurdevahitam
ya udagād iti
- 13
अथाप्य् उदाहरन्ति
प्रणवो व्याहृतयः सावित्री चेत्य् एते पञ्च ब्रह्मयज्ञा अहरहर्ब्राह्मणं किल्बिषात्पावयन्ति
athāpy udāharanti
praṇavo vyāhṛtayaḥ sāvitrī cety ete pañca brahmayajñā aharaharbrāhmaṇaṃ kilbiṣātpāvayanti
- 14
पूतः पञ्चभिर्ब्रह्मयज्ञैर् अथोत्तरं देवतास्तर्पयति
pūtaḥ pañcabhirbrahmayajñair athottaraṃ devatāstarpayati

