21 shlokas
- 1
तपस्यम् अपोऽवगाहनम्
tapasyam apo'vagāhanam
- 2
देवतास्तर्पयित्वा पितृतर्पणम्
devatāstarpayitvā pitṛtarpaṇam
- 3
अनुतीर्थम् अप उत्सिञ्चति
ऊर्जं वहन्तीर् इति
anutīrtham apa utsiñcati
ūrjaṃ vahantīr iti
- 4
अथाप्य् उदाहरन्ति
स्रवन्तीष्व् अनिरुद्धासु त्रयो वर्णा द्विजातयः
प्रातरुत्थाय कुर्वीरन्देवर्षिपितृतर्पणम्
athāpy udāharanti
sravantīṣv aniruddhāsu trayo varṇā dvijātayaḥ
prātarutthāya kurvīrandevarṣipitṛtarpaṇam
- 5
निरुद्धासु न कुर्वीरन्न् अंशभाक्तत्र सेतुकृत्
niruddhāsu na kurvīrann aṃśabhāktatra setukṛt
- 6
तस्मात्परकृतान्सेतून्कूपांश्च परिवर्जयेद् इति
tasmātparakṛtānsetūnkūpāṃśca parivarjayed iti
- 7
अथाप्य् उदाहरन्ति
उद्धृत्य वापि त्रीन्पिण्डान्कुर्याद् आपत्सु नो सदा
निरुद्धासु तु मृत्पिण्डान्कूपात्त्रीन् अब्घटांस्तथेति
athāpy udāharanti
uddhṛtya vāpi trīnpiṇḍānkuryād āpatsu no sadā
niruddhāsu tu mṛtpiṇḍānkūpāttrīn abghaṭāṃstatheti
- 8
बहुप्रतिग्राह्यस्याप्रतिग्राह्यस्य वा प्रतिगृह्यायाज्यं वा याजयित्वानाश्यान्नस्य वान्नम् अशित्वा तरत्समन्दीयं जपेद् इति
bahupratigrāhyasyāpratigrāhyasya vā pratigṛhyāyājyaṃ vā yājayitvānāśyānnasya vānnam aśitvā taratsamandīyaṃ japed iti
- 9
अथाप्य् उदाहरन्ति
गुरुसंकरिणश्चैव शिष्यसंकरिणश्च ये
आहारमन्त्रसंकीर्णा दीर्घं तम उपासत इति
athāpy udāharanti
gurusaṃkariṇaścaiva śiṣyasaṃkariṇaśca ye
āhāramantrasaṃkīrṇā dīrghaṃ tama upāsata iti
- 10
अथ स्नातकव्रतानि
atha snātakavratāni
- 11
सायं प्रातर्यद् अशनीयं स्यात्तेनान्नेन वैश्वदेवं बलिम् उपहृत्य ब्राह्मणक्षत्रियविट्शूद्रान् अभ्यागतान्यथाशक्ति पूजयेत्
sāyaṃ prātaryad aśanīyaṃ syāttenānnena vaiśvadevaṃ balim upahṛtya brāhmaṇakṣatriyaviṭśūdrān abhyāgatānyathāśakti pūjayet
- 12
यदि बहूनां न शक्नुयाद् एकस्मै गुणवते दद्यात्
yadi bahūnāṃ na śaknuyād ekasmai guṇavate dadyāt
- 13
यो वा प्रथमम् उपगतः स्यात्
yo vā prathamam upagataḥ syāt
- 14
शूद्रश्चेद् आगतस्तं कर्मणि नियुञ्ज्यात्
śūdraśced āgatastaṃ karmaṇi niyuñjyāt
- 15
श्रोत्रियाय वाग्रं दद्यात्
śrotriyāya vāgraṃ dadyāt
- 16
ये नित्या भाक्तिकाः स्युस्तेषाम् अनुपरोधेन संविभागो विहितः
ye nityā bhāktikāḥ syusteṣām anuparodhena saṃvibhāgo vihitaḥ
- 17
न त्व् एव कदाचिद् अदत्त्वा भुञ्जीत
na tv eva kadācid adattvā bhuñjīta
- 18
अथाप्य् अत्रान्नगीतौ श्लोकाव् उदाहरन्ति
यो माम् अदत्त्वा पितृदेवताभ्यो भृत्यातिथीनां च सुहृज्जनस्य
सम्पन्नम् अश्नन्विषम् अत्ति मोहात्तम् अद्म्य् अहं तस्य च मृत्युर् अस्मि
हुताग्निहोत्रः कृतवैश्वदेवः पूज्यातिथीन्भृत्यजनावशिष्टम्
तुष्टः शुचिः श्रद्दधद् अत्ति यो मां तस्यामृतं स्यां स च मां भुनक्ति
athāpy atrānnagītau ślokāv udāharanti
yo mām adattvā pitṛdevatābhyo bhṛtyātithīnāṃ ca suhṛjjanasya
sampannam aśnanviṣam atti mohāttam admy ahaṃ tasya ca mṛtyur asmi
hutāgnihotraḥ kṛtavaiśvadevaḥ pūjyātithīnbhṛtyajanāvaśiṣṭam
tuṣṭaḥ śuciḥ śraddadhad atti yo māṃ tasyāmṛtaṃ syāṃ sa ca māṃ bhunakti
- 19
सुब्राह्मणश्रोत्रियवेदपारगेभ्यो गुर्वर्थनिवेशौषधार्थवृत्तिक्षीणयक्ष्यमाणाध्ययनाध्वसंयोगवैश्वजितेषु द्रव्यसंविभागो यथाशक्ति कार्यो बहिर्वेदि भिक्षमाणेषु
subrāhmaṇaśrotriyavedapāragebhyo gurvarthaniveśauṣadhārthavṛttikṣīṇayakṣyamāṇādhyayanādhvasaṃyogavaiśvajiteṣu dravyasaṃvibhāgo yathāśakti kāryo bahirvedi bhikṣamāṇeṣu
- 20
कृतान्नम् इतरेषु
kṛtānnam itareṣu
- 21
सुप्रक्षालितपादपाणिर् आचान्तः शुचौ संवृते देशे ऽन्नम् उपहृतम् उपसंगृह्य कामक्रोधद्रोहलोभमोहान् अपहत्य सर्वाभिर् अङ्गुलीभिः शब्दम् अकुर्वन्प्राश्नीयात्
suprakṣālitapādapāṇir ācāntaḥ śucau saṃvṛte deśe 'nnam upahṛtam upasaṃgṛhya kāmakrodhadrohalobhamohān apahatya sarvābhir aṅgulībhiḥ śabdam akurvanprāśnīyāt

