13 shlokas
- 1
यथा हि तूलम् ऐषीकम् अग्नौ प्रोतं प्रदीप्यते
तद्वत्सर्वाणि पापानि दह्यन्ते ह्य् आत्मयाजिनः
yathā hi tūlam aiṣīkam agnau protaṃ pradīpyate
tadvatsarvāṇi pāpāni dahyante hy ātmayājinaḥ
- 2
केवलाघो भवति केवलादी
मोघम् अन्नं विन्दते अप्रचेता इति
kevalāgho bhavati kevalādī
mogham annaṃ vindate apracetā iti
- 3
स एवम् एवाहरहः सायं प्रातर्जुहुयात्
sa evam evāharahaḥ sāyaṃ prātarjuhuyāt
- 4
अद्भिर्वा सायम्
adbhirvā sāyam
- 5
अथाप्य् उदाहरन्ति
अग्रे भोजयेद् अतिथीन् अन्तर्वत्नीर् अनन्तरम्
बालवृद्धांस्तथा दीनान्व्याधितांश्च विशेषतः
athāpy udāharanti
agre bhojayed atithīn antarvatnīr anantaram
bālavṛddhāṃstathā dīnānvyādhitāṃśca viśeṣataḥ
- 6
अदत्त्वा तु य एतेभ्यः पूर्वं भुङ्क्ते यथाविधि
भुज्यमानो न जानाति न स भुङ्क्ते स भुज्यते
adattvā tu ya etebhyaḥ pūrvaṃ bhuṅkte yathāvidhi
bhujyamāno na jānāti na sa bhuṅkte sa bhujyate
- 7
पितृदैवतभृत्यानां मातापित्रोर्गुरोस्तथा
वाग्यतो विघसम् अश्नीयाद् एवं धर्मो विधीयत इति
pitṛdaivatabhṛtyānāṃ mātāpitrorgurostathā
vāgyato vighasam aśnīyād evaṃ dharmo vidhīyata iti
- 8
अथाप्य् उदाहरन्ति
अष्टौ ग्रासा मुनेर्भक्ष्याः षोडशारण्यवासिनः
द्वात्रिंशत्तु गृहस्थस्यामितं ब्रह्मचारिणः
athāpy udāharanti
aṣṭau grāsā munerbhakṣyāḥ ṣoḍaśāraṇyavāsinaḥ
dvātriṃśattu gṛhasthasyāmitaṃ brahmacāriṇaḥ
- 9
आहिताग्निर् अनड्वांश्च ब्रह्मचारी च ते त्रयः
अश्नन्त एव सिध्यन्ति नैषां सिद्धिर् अनश्नताम् इति
āhitāgnir anaḍvāṃśca brahmacārī ca te trayaḥ
aśnanta eva sidhyanti naiṣāṃ siddhir anaśnatām iti
- 10
गृहस्थो ब्रह्मचारी वा यो ऽनश्नंस्तु तपश्चरेत्
प्राणाग्निहोत्रलोपेन अवकीर्णी भवेत्तु सः
gṛhastho brahmacārī vā yo 'naśnaṃstu tapaścaret
prāṇāgnihotralopena avakīrṇī bhavettu saḥ
- 11
अन्यत्र प्रायश्चित्तात्
प्रायश्चित्ते तद् एव विधानम्
anyatra prāyaścittāt
prāyaścitte tad eva vidhānam
- 12
अथाप्य् उदाहरन्ति
अन्तरा प्रातराशं च सायमाशं तथैव च
सदोपवासी भवति यो न भुङ्क्ते कदाचन
athāpy udāharanti
antarā prātarāśaṃ ca sāyamāśaṃ tathaiva ca
sadopavāsī bhavati yo na bhuṅkte kadācana
- 13
प्राणाग्निहोत्रमन्त्रांस्तु निरुद्धे भोजने जपेत्
त्रेताग्निहोत्रमन्त्रांस्तु द्रव्यालाभे यथा जपेद् इति
एवम् आचरन्ब्रह्मभूयाय कल्पते
ब्रह्मभूयाय कल्पत इति
prāṇāgnihotramantrāṃstu niruddhe bhojane japet
tretāgnihotramantrāṃstu dravyālābhe yathā japed iti
evam ācaranbrahmabhūyāya kalpate
brahmabhūyāya kalpata iti

