17 shlokas
- 1
स एष प्राजापत्यः कुटुम्बिनो यज्ञो नित्यप्रततः
sa eṣa prājāpatyaḥ kuṭumbino yajño nityapratataḥ
- 2
यो ऽतिथीनाम् अग्निः स आहवनीयो यः कुटुम्बे स गार्हपत्यो यस्मिन्पच्यते सो ऽन्वाहार्यपचनः
yo 'tithīnām agniḥ sa āhavanīyo yaḥ kuṭumbe sa gārhapatyo yasminpacyate so 'nvāhāryapacanaḥ
- 3
ऊर्जं पुष्टिं प्रजां पशून् इष्टापूर्तम् इति गृहाणाम् अश्नाति यः पूर्वो ऽतिथेर् अश्नाति
ūrjaṃ puṣṭiṃ prajāṃ paśūn iṣṭāpūrtam iti gṛhāṇām aśnāti yaḥ pūrvo 'tither aśnāti
- 4
पयौपसेचनम् अन्नम् अग्निष्टोमसंमितं सर्पिषोक्थ्यसंमितं मधुनातिरात्रसंमितं मांसेन द्वादशाहसंमितम् उदकेन प्रजावृद्धिर् आयुषश्च
payaupasecanam annam agniṣṭomasaṃmitaṃ sarpiṣokthyasaṃmitaṃ madhunātirātrasaṃmitaṃ māṃsena dvādaśāhasaṃmitam udakena prajāvṛddhir āyuṣaśca
- 5
प्रिया अप्रियाश्चातिथयः स्वर्गं लोकं गमयन्तीति विज्ञायते
priyā apriyāścātithayaḥ svargaṃ lokaṃ gamayantīti vijñāyate
- 6
स यत्प्रातर्मध्यंदिने सायम् इति ददाति सवनान्य् एव तानि भवन्ति
sa yatprātarmadhyaṃdine sāyam iti dadāti savanāny eva tāni bhavanti
- 7
यद् अनुतिष्ठत्य् उदवस्यत्य् एव तत्
yad anutiṣṭhaty udavasyaty eva tat
- 8
यत्सान्त्वयति सा दक्षिणाप्रशंसा
yatsāntvayati sā dakṣiṇāpraśaṃsā
- 9
यत्संसाधयति ते विष्णुक्रमाः
yatsaṃsādhayati te viṣṇukramāḥ
- 10
यद् उपावर्तते सो ऽवभृथः
yad upāvartate so 'vabhṛthaḥ
- 11
इति हि ब्राह्मणम्
iti hi brāhmaṇam
- 12
राजानं चेद् अतिथिर् अभ्यागच्छेच्छ्रेयसीम् अस्मै पूजाम् आत्मनः कारयेत्
rājānaṃ ced atithir abhyāgacchecchreyasīm asmai pūjām ātmanaḥ kārayet
- 13
आहिताग्निं चेद् अतिथिर् अभ्यागच्छेत्स्वयम् एनम् अभ्युदेत्य ब्रूयात्
व्रात्य क्वावात्सीर् इति
व्रात्य उदकम् इति
व्रात्य तर्पयंस्त्व् इति
āhitāgniṃ ced atithir abhyāgacchetsvayam enam abhyudetya brūyāt
vrātya kvāvātsīr iti
vrātya udakam iti
vrātya tarpayaṃstv iti
- 14
पुराग्निहोत्रस्य होमाद् उपांशु जपेत्
व्रात्य यथा ते मनस्तथास्त्विति
व्रात्य यथा ते वशस्तथास्त्विति
व्रात्य यथा ते प्रियं तथास्त्विति
व्रात्य यथा ते निकामस्तथास्त्विति
purāgnihotrasya homād upāṃśu japet
vrātya yathā te manastathāstviti
vrātya yathā te vaśastathāstviti
vrātya yathā te priyaṃ tathāstviti
vrātya yathā te nikāmastathāstviti
- 15
यस्योद्धृतेष्व् अहुतेष्व् अग्निष्व् अतिथिर् अभ्यागच्छेत्स्वयम् एनम् अभ्युदेत्य ब्रूयाद्व्रात्य अतिसृज होष्यामि
इत्य् अतिसृष्टेन होतव्यम्
अनतिसृष्टश्चेज्जुहुयाद्दोषं ब्राह्मणम् आह
yasyoddhṛteṣv ahuteṣv agniṣv atithir abhyāgacchetsvayam enam abhyudetya brūyādvrātya atisṛja hoṣyāmi
ity atisṛṣṭena hotavyam
anatisṛṣṭaścejjuhuyāddoṣaṃ brāhmaṇam āha
- 16
एकरात्रं चेद् अतिथीन्वासयेत्पार्थिवांल्लोकान् अभिजयति द्वितीययान्तरिक्ष्यांस्तृतीयया दिव्यांश्चतुर्थ्या परावतो लोकान् अपरिमिताभिर् अपरिमितांल्लोकान् अभिजयतीति विज्ञायते
ekarātraṃ ced atithīnvāsayetpārthivāṃllokān abhijayati dvitīyayāntarikṣyāṃstṛtīyayā divyāṃścaturthyā parāvato lokān aparimitābhir aparimitāṃllokān abhijayatīti vijñāyate
- 17
असमुदेतश्चेद् अतिथिर्ब्रुवाण आगच्छेद् आसनम् उदकम् अन्नं श्रोत्रियाय ददामीत्य् एव दद्यात्
एवम् अस्य समृद्धं भवति
asamudetaśced atithirbruvāṇa āgacched āsanam udakam annaṃ śrotriyāya dadāmīty eva dadyāt
evam asya samṛddhaṃ bhavati

