23 shlokas
- 1
आर्याः प्रयता वैश्वदेवे ऽन्नसंस्कर्तारः स्युः
āryāḥ prayatā vaiśvadeve 'nnasaṃskartāraḥ syuḥ
- 2
भाषां कासं क्षवथुम् इत्य् अभिमुखो ऽन्नं वर्जयेत्
bhāṣāṃ kāsaṃ kṣavathum ity abhimukho 'nnaṃ varjayet
- 3
केशान् अङ्गं वासश्चालभ्याप उपस्पृशेत्
keśān aṅgaṃ vāsaścālabhyāpa upaspṛśet
- 4
आर्याधिष्ठिता वा शूद्राः संस्कर्तारः स्युः
āryādhiṣṭhitā vā śūdrāḥ saṃskartāraḥ syuḥ
- 5
तेषां स एवाचमनकल्पः
teṣāṃ sa evācamanakalpaḥ
- 6
अधिकम् अहर् अहः केशश्मश्रुलोमनखवापनम्
adhikam ahar ahaḥ keśaśmaśrulomanakhavāpanam
- 7
उदकोपस्पर्शनं च सह वाससा
udakopasparśanaṃ ca saha vāsasā
- 8
अपि वाष्टमीष्व् एव पर्वसु वा वपेरन्
api vāṣṭamīṣv eva parvasu vā vaperan
- 9
परोक्षम् अन्नं संस्कृतम् अग्नाव् अधिश्रित्याद्भिः प्रोक्षेत्
तद्देवपवित्रम् इत्य् आचक्षते
parokṣam annaṃ saṃskṛtam agnāv adhiśrityādbhiḥ prokṣet
taddevapavitram ity ācakṣate
- 10
सिद्धे ऽन्ने तिष्ठन्भूतम् इति स्वामिने प्रब्रूयात्
siddhe 'nne tiṣṭhanbhūtam iti svāmine prabrūyāt
- 11
तत्सुभूतं विराड् अन्नं तन्मा क्षायीति प्रतिवचनः
tatsubhūtaṃ virāḍ annaṃ tanmā kṣāyīti prativacanaḥ
- 12
गृहमेधिनोर्यद् अशनीयस्य होमा बलयश्च स्वर्गपुष्टिसंयुक्ताः
gṛhamedhinoryad aśanīyasya homā balayaśca svargapuṣṭisaṃyuktāḥ
- 13
तेषां मन्त्राणाम् उपयोगे द्वादशाहम् अधःशय्या ब्रह्मचर्यं क्षारलवणवर्जनं च
teṣāṃ mantrāṇām upayoge dvādaśāham adhaḥśayyā brahmacaryaṃ kṣāralavaṇavarjanaṃ ca
- 14
उत्तमस्यैकरात्रम् उपवासः
uttamasyaikarātram upavāsaḥ
- 15
बलीनां तस्य तस्य देशे संस्कारो हस्तेन परिमृज्यावोक्ष्य न्युप्य पश्चात्परिषेचनम्
balīnāṃ tasya tasya deśe saṃskāro hastena parimṛjyāvokṣya nyupya paścātpariṣecanam
- 16
औपासने पचने वा षड्भिर् आद्यैः प्रतिमन्त्रं हस्तेन जुहुयात्
aupāsane pacane vā ṣaḍbhir ādyaiḥ pratimantraṃ hastena juhuyāt
- 17
उभयतः परिषेचनं यथा पुरस्तात्
ubhayataḥ pariṣecanaṃ yathā purastāt
- 18
एवं बलीनां देशे देशे समवेतानां सकृत्सकृद् अन्ते परिषेचनम्
evaṃ balīnāṃ deśe deśe samavetānāṃ sakṛtsakṛd ante pariṣecanam
- 19
सति सूपसंसृष्टेन कार्याः
sati sūpasaṃsṛṣṭena kāryāḥ
- 20
अपरेणाग्निं सप्तमाष्टमाभ्याम् उदगपवर्गम्
apareṇāgniṃ saptamāṣṭamābhyām udagapavargam
- 21
उदधानसंनिधौ नवमेन
udadhānasaṃnidhau navamena
- 22
मध्ये ऽगारस्य दशमैकादशाभ्यां प्रागपवर्गम्
madhye 'gārasya daśamaikādaśābhyāṃ prāgapavargam
- 23
उत्तरपूर्वदेशे ऽगारस्योत्तरैश्चतुर्भिः
uttarapūrvadeśe 'gārasyottaraiścaturbhiḥ

