19 shlokas
- 1
सर्वविद्यानाम् अप्य् उपनिषदाम् उपाकृत्यानध्ययनं तद् अहः
sarvavidyānām apy upaniṣadām upākṛtyānadhyayanaṃ tad ahaḥ
- 2
अधीत्य चाविक्रमणं सद्यः
adhītya cāvikramaṇaṃ sadyaḥ
- 3
यदि त्वरेत गुरोः समीक्षायां स्वाध्यायम् अधीत्य कामं गच्छेत्
एवम् उभयोः शिवं भवति
yadi tvareta guroḥ samīkṣāyāṃ svādhyāyam adhītya kāmaṃ gacchet
evam ubhayoḥ śivaṃ bhavati
- 4
समावृत्तं चेद् आचार्यो ऽभ्यागच्छेत्तम् अभिमुखो ऽभ्यागम्य तस्योपसंगृह्य न बीभत्समान उदकम् उपस्पृशेत्पुरस्कृत्योपस्थाप्य यथोपदेशं पूजयेत्
samāvṛttaṃ ced ācāryo 'bhyāgacchettam abhimukho 'bhyāgamya tasyopasaṃgṛhya na bībhatsamāna udakam upaspṛśetpuraskṛtyopasthāpya yathopadeśaṃ pūjayet
- 5
आसने शयने भक्ष्ये भोज्ये वाससि वा संनिहिते निहीनतरवृत्तिः स्यात्
āsane śayane bhakṣye bhojye vāsasi vā saṃnihite nihīnataravṛttiḥ syāt
- 6
तिष्ठन्सव्येन पाणिनानुगृह्याचार्यम् आचमयेत्
tiṣṭhansavyena pāṇinānugṛhyācāryam ācamayet
- 7
अन्यं वा समुदेतम्
anyaṃ vā samudetam
- 8
स्थानासनचङ्क्रमणस्मितेष्व् अनुचिकीर्षन्
sthānāsanacaṅkramaṇasmiteṣv anucikīrṣan
- 9
संनिहिते मूत्रपुरीषवातकर्मोच्चैर्भाषाहासष्ठेवनदन्तस्कवननिःशृङ्खणभ्रुक्षेपणतालननिष्ठ्यानीति
saṃnihite mūtrapurīṣavātakarmoccairbhāṣāhāsaṣṭhevanadantaskavananiḥśṛṅkhaṇabhrukṣepaṇatālananiṣṭhyānīti
- 10
दारे प्रजायां चोपस्पर्शनभाषा विस्रम्भपूर्वाः परिवर्जयेत्
dāre prajāyāṃ copasparśanabhāṣā visrambhapūrvāḥ parivarjayet
- 11
वाक्येन वाक्यस्य प्रतीघातम् आचार्यस्य वर्जयेत्
vākyena vākyasya pratīghātam ācāryasya varjayet
- 12
श्रेयसां च
śreyasāṃ ca
- 13
सर्वभूतपरीवादाक्रोशांश्च
sarvabhūtaparīvādākrośāṃśca
- 14
विद्यया च विद्यानाम्
vidyayā ca vidyānām
- 15
यया विद्यया न विरोचेत पुनर् आचार्यम् उपेत्य नियमेन साधयेत्
yayā vidyayā na viroceta punar ācāryam upetya niyamena sādhayet
- 16
उपाकरणाद् ओत्सर्जनाद् अध्यापयितुर्नियमः
लोमसंहरणं मांसं श्राद्धं मैथुनम् इति च वर्जयेत्
upākaraṇād otsarjanād adhyāpayiturniyamaḥ
lomasaṃharaṇaṃ māṃsaṃ śrāddhaṃ maithunam iti ca varjayet
- 17
ऋत्वे वा जायाम्
ṛtve vā jāyām
- 18
यथागमं शिष्येभ्यो विद्यासंप्रदाने नियमेषु च युक्तः स्यात्
एवं वर्तमानः पूर्वापरान्संबन्धान् आत्मानं च क्षेमे युनक्ति
yathāgamaṃ śiṣyebhyo vidyāsaṃpradāne niyameṣu ca yuktaḥ syāt
evaṃ vartamānaḥ pūrvāparānsaṃbandhān ātmānaṃ ca kṣeme yunakti
- 19
मनसा वाचा प्राणेन चक्षुषा श्रोत्रेण त्वक्शिश्नोदरारम्भणान् आस्रावान्परिवृञ्जानो ऽमृतत्वाय कल्पते
manasā vācā prāṇena cakṣuṣā śrotreṇa tvakśiśnodarārambhaṇān āsrāvānparivṛñjāno 'mṛtatvāya kalpate

