19 shlokas
- 1
संयच्च प्रचेताश्चाग्नेः सोमस्य सूर्यस्य ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
उग्रा च भीमा च पितॄणां यमस्येन्द्रस्य ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
प्राची च प्रतीची च वसूनां रुद्राणाम् आदित्यानां ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
यन्त्री च यमनी च मित्रावरुणयोर्मित्रस्य धातुस्ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
ध्रुवा च पृथिवी च सवितुर्मरुतां वरुणस्य ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
उर्वी चाधिपत्नी च बृहस्पतेर्विश्वेषां देवानां ते ते ऽधिपतयस्ते यं द्विष्मो यश्च नो द्वेष्टि तम् एषां जम्भे दधामि
इति वैश्वदेवीः प्रथमा व्रतस्य
saṃyacca pracetāścāgneḥ somasya sūryasya te te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
ugrā ca bhīmā ca pitṝṇāṃ yamasyendrasya te te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
prācī ca pratīcī ca vasūnāṃ rudrāṇām ādityānāṃ te te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
yantrī ca yamanī ca mitrāvaruṇayormitrasya dhātuste te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
dhruvā ca pṛthivī ca saviturmarutāṃ varuṇasya te te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
urvī cādhipatnī ca bṛhaspaterviśveṣāṃ devānāṃ te te 'dhipatayaste yaṃ dviṣmo yaśca no dveṣṭi tam eṣāṃ jambhe dadhāmi
iti vaiśvadevīḥ prathamā vratasya
- 2
प्राच्या त्वा दिशा सादयामीति पञ्चात्मेष्टका एकैकां लोकेषु
prācyā tvā diśā sādayāmīti pañcātmeṣṭakā ekaikāṃ lokeṣu
- 3
इन्द्रो दधीचो अस्थभिर् इति दशाथर्वशिरो नव पूर्वार्ध एकां मध्ये
indro dadhīco asthabhir iti daśātharvaśiro nava pūrvārdha ekāṃ madhye
- 4
तिस्रो गायत्रीः पुरस्ताद् आयाहि सुषुमा हि त इति
tisro gāyatrīḥ purastād āyāhi suṣumā hi ta iti
- 5
रथन्तरं द्वे द्वे तिस्रः कृत्वोपदधाति
अभि त्वा शूर नोनुमो ऽदुग्धा इव धेनवः
ईशानम् अस्य जगतः स्वर्दृशम् ईशानम् इन्द्र तस्थुषः
न त्वावं अन्यो दिव्यो न पार्थिवो न जातो न जनिष्यते
अश्वायन्तो मघवन्न् इन्द्र वाजिनो गव्यन्तस्त्वा हवामहे
इति रथन्तरम्
rathantaraṃ dve dve tisraḥ kṛtvopadadhāti
abhi tvā śūra nonumo 'dugdhā iva dhenavaḥ
īśānam asya jagataḥ svardṛśam īśānam indra tasthuṣaḥ
na tvāvaṃ anyo divyo na pārthivo na jāto na janiṣyate
aśvāyanto maghavann indra vājino gavyantastvā havāmahe
iti rathantaram
- 6
द्वे द्वे चित्याम् उपदधाति
dve dve cityām upadadhāti
- 7
त्वाम् अग्ने वृषभं चेकितानं पुनर्युवानं जनयन्न् उपागाम्
अस्थूरि नौ गार्हपत्यानि सन्तु तिग्मेन नस्तेजसा संशिशाधि
इत्य् ऋषभम् उपधाय लोकंपृणया चितिं संछादयति
tvām agne vṛṣabhaṃ cekitānaṃ punaryuvānaṃ janayann upāgām
asthūri nau gārhapatyāni santu tigmena nastejasā saṃśiśādhi
ity ṛṣabham upadhāya lokaṃpṛṇayā citiṃ saṃchādayati
- 8
चित्यां चित्यां हिरण्यशकलम् अप्यस्यति
cityāṃ cityāṃ hiraṇyaśakalam apyasyati
- 9
अश्वं श्यावम् आलभते
aśvaṃ śyāvam ālabhate
- 10
पृष्टो दिवीति चात्वालात्पुरीषम् अतिहृत्य व्यूहति
pṛṣṭo divīti cātvālātpurīṣam atihṛtya vyūhati
- 11
अग्निहोमचितिहोमान्जुहोति
agnihomacitihomānjuhoti
- 12
अग्ने कह्येति पञ्चाग्निहोमाः
agne kahyeti pañcāgnihomāḥ
- 13
या ते इषुर् इति सर्वत्रानुषजेत्
yā te iṣur iti sarvatrānuṣajet
- 14
तेषाम् एकैकेन चित्यां चित्यां जुहोति
teṣām ekaikena cityāṃ cityāṃ juhoti
- 15
यो अप्स्व् अन्तर् अग्निर् इति पञ्च चितिहोमाः
yo apsv antar agnir iti pañca citihomāḥ
- 16
अग्ने देवं इहावह जज्ञानो वृक्तबर्हिषे
असि होता न ईड्यः
अगन्म महा नमसा यविष्ठं यो दीदाय समिद्धः स्वे दुरोणे
चित्रभानुं रोदसी अन्तर् उर्वी स्वाहुतं विश्वतः प्रत्यञ्चम्
मेधाकारं विदथस्य प्रसाधनम् अग्निं होतारं परिभूतमं मतिम्
त्वाम् अर्थस्य हविषः समानमित्त्वां महो वृणते नान्यं त्वत्
मनुष्वत्त्वा निधीमहि मनुष्वत्समिधीमहि
अग्ने मनुष्वद् अङ्गिरो देवान्देवयते यज
अग्निर्हि वाजिनं विशे ददाति विश्वचर्षणिः
अग्नी राये स्वाभुवं स प्रीतो याति वीर्यम् इषं स्तोतृभ्य आभर
इति पञ्च
agne devaṃ ihāvaha jajñāno vṛktabarhiṣe
asi hotā na īḍyaḥ
aganma mahā namasā yaviṣṭhaṃ yo dīdāya samiddhaḥ sve duroṇe
citrabhānuṃ rodasī antar urvī svāhutaṃ viśvataḥ pratyañcam
medhākāraṃ vidathasya prasādhanam agniṃ hotāraṃ paribhūtamaṃ matim
tvām arthasya haviṣaḥ samānamittvāṃ maho vṛṇate nānyaṃ tvat
manuṣvattvā nidhīmahi manuṣvatsamidhīmahi
agne manuṣvad aṅgiro devāndevayate yaja
agnirhi vājinaṃ viśe dadāti viśvacarṣaṇiḥ
agnī rāye svābhuvaṃ sa prīto yāti vīryam iṣaṃ stotṛbhya ābhara
iti pañca
- 17
तासाम् एकैकया चितिं चितिम् अभिमृशत्य् अग्ने धामानीति च
tāsām ekaikayā citiṃ citim abhimṛśaty agne dhāmānīti ca
- 18
व्रतप्रभृत्यभिमर्शनान्तं सर्वचितिषु
vrataprabhṛtyabhimarśanāntaṃ sarvacitiṣu
- 19
अनूपसदम् अग्निं चिन्वन्ति चिन्वन्ति
anūpasadam agniṃ cinvanti cinvanti

