24 shlokas
- 1
सं वरत्रा दधातन निर् आहावान्कृणोतन
सिञ्चामहा अवटम् उद्रिणं वयं विश्वाहाजस्रम् अक्षितम्
निष्कृताहावम् अवटं सुवरत्रं सुषेचनम्
उद्रिणं सिञ्चे अक्षितम्
इति युगवरत्राणि सम्बध्नाति
saṃ varatrā dadhātana nir āhāvānkṛṇotana
siñcāmahā avaṭam udriṇaṃ vayaṃ viśvāhājasram akṣitam
niṣkṛtāhāvam avaṭaṃ suvaratraṃ suṣecanam
udriṇaṃ siñce akṣitam
iti yugavaratrāṇi sambadhnāti
- 2
पूषा युनक्त्व् इति युनक्ति
pūṣā yunaktv iti yunakti
- 3
लाङ्गलं पवीरवम् इति कृषति
lāṅgalaṃ pavīravam iti kṛṣati
- 4
पुच्छाद् अधि शिरः शिरस्तः पुच्छं पुच्छतः शिरस्तिस्रः सीताः सम्पादयति
pucchād adhi śiraḥ śirastaḥ pucchaṃ pucchataḥ śirastisraḥ sītāḥ sampādayati
- 5
एतेन धर्मेण दक्षिणावर्तो दक्षिणस्मात्पक्षाद् उत्तरम् उत्तरस्याः श्रोण्या दक्षिणम् अंसं दक्षिणस्या उत्तरम्
etena dharmeṇa dakṣiṇāvarto dakṣiṇasmātpakṣād uttaram uttarasyāḥ śroṇyā dakṣiṇam aṃsaṃ dakṣiṇasyā uttaram
- 6
द्वादश सीताः सम्पाद्य प्राच उत्सृजन्ति विमुच्यध्वम् अघ्न्या इति
dvādaśa sītāḥ sampādya prāca utsṛjanti vimucyadhvam aghnyā iti
- 7
विसृज्याध्वर्यवे वैकर्षणान्ददाति
visṛjyādhvaryave vaikarṣaṇāndadāti
- 8
कृष्टे सर्वान्नानि यवांश्च मधूद्युतान्वपति या ओषधय इति चतुर्दशभिः
kṛṣṭe sarvānnāni yavāṃśca madhūdyutānvapati yā oṣadhaya iti caturdaśabhiḥ
- 9
यस्य न वपेत्तन्मनसा ध्यायेत्
yasya na vapettanmanasā dhyāyet
- 10
तस्येध्मे ऽपि कुर्यात्
tasyedhme 'pi kuryāt
- 11
ये वनस्पतीनाम् आप्तफलास्तेषाम् अग्नीषोमीयायेध्मे संनह्येत्
ye vanaspatīnām āptaphalāsteṣām agnīṣomīyāyedhme saṃnahyet
- 12
शिष्टान्मनसा ध्यायेत्
śiṣṭānmanasā dhyāyet
- 13
व्युत्कृष्टो लोष्टादिस्तेभ्यो यथाहृतां मध्याय संभरति मा नो हिंसीद् इति चतसृभिः
vyutkṛṣṭo loṣṭādistebhyo yathāhṛtāṃ madhyāya saṃbharati mā no hiṃsīd iti catasṛbhiḥ
- 14
यां जनतां क्षुध्यन्तीम् इच्छेत्तां प्रतीषम् ऊर्जम् इत्य् उक्त्वाददीत
yāṃ janatāṃ kṣudhyantīm icchettāṃ pratīṣam ūrjam ity uktvādadīta
- 15
यथा मन्येत तस्यां निहनिष्यतीत्य् एवम् उपक्रमेत
yathā manyeta tasyāṃ nihaniṣyatīty evam upakrameta
- 16
कामं कामदुघे धुक्ष्वेति लोष्टान्कृष्टां चाभिमृशति
kāmaṃ kāmadughe dhukṣveti loṣṭānkṛṣṭāṃ cābhimṛśati
- 17
व्याघारणान्ताम् उत्तरवेदिं करोति
vyāghāraṇāntām uttaravediṃ karoti
- 18
अग्निर् उत्तरवेदिः
agnir uttaravediḥ
- 19
एतेन धर्मेणापरिमिताभिः शर्कराभिर् अग्निं परिश्रयति
etena dharmeṇāparimitābhiḥ śarkarābhir agniṃ pariśrayati
- 20
वज्रं कृणुध्वं स हि वो नृपाणो वर्म सीव्यध्वं बहुला पृथूनि
पुरः कृणुध्वम् आयसीर् अधृष्टा मा वः सुस्रोच्चमसो दृंहत तम्
परि त्रिविष्टपध्वरं यात्य् अग्नी रथीर् इव
आ देवेषु प्रयो दधत्
परि वाजपतिर् इति परिश्रितम् अभिमन्त्र्याग्ने तव श्रवो वय इति सिकता निवपति
vajraṃ kṛṇudhvaṃ sa hi vo nṛpāṇo varma sīvyadhvaṃ bahulā pṛthūni
puraḥ kṛṇudhvam āyasīr adhṛṣṭā mā vaḥ susroccamaso dṛṃhata tam
pari triviṣṭapadhvaraṃ yāty agnī rathīr iva
ā deveṣu prayo dadhat
pari vājapatir iti pariśritam abhimantryāgne tava śravo vaya iti sikatā nivapati
- 21
संज्ञानम् असीत्य् ऊषान्न्युप्याप्यायस्व
सं ते पयांसीति व्यूहति
saṃjñānam asīty ūṣānnyupyāpyāyasva
saṃ te payāṃsīti vyūhati
- 22
सीतामध्ये कुम्भेष्टका उपदधाति षट्कुम्भा द्वे द्वे कृपं च कृष्णी च चतस्रो ऽपचतः स्वयमातृण्णालोके द्वे दिक्षु सम् अन्या यन्तीति यजुषो षट्
sītāmadhye kumbheṣṭakā upadadhāti ṣaṭkumbhā dve dve kṛpaṃ ca kṛṣṇī ca catasro 'pacataḥ svayamātṛṇṇāloke dve dikṣu sam anyā yantīti yajuṣo ṣaṭ
- 23
प्रथमयाद्भिः पूरयित्वोत्तराभिर्द्वादशोपधाय द्वाभ्याम् उपतिष्ठेत
prathamayādbhiḥ pūrayitvottarābhirdvādaśopadhāya dvābhyām upatiṣṭheta
- 24
दिवि श्रयस्वेति नैवारं चरुं पयसि शृतम् उपदधाति
divi śrayasveti naivāraṃ caruṃ payasi śṛtam upadadhāti

