19 shlokas
- 1
आग्नेयमध्याद् अधिहत्याङ्गुष्ठेनोपमध्यमया च यवमात्रं प्राशित्रम् अवद्यति
āgneyamadhyād adhihatyāṅguṣṭhenopamadhyamayā ca yavamātraṃ prāśitram avadyati
- 2
अनुपस्तृणन्न् अभिघार्याग्रेणोत्तरं वेद्यंसम् अप उपनिनीय व्यूह्यौषधीः सादयति
anupastṛṇann abhighāryāgreṇottaraṃ vedyaṃsam apa upaninīya vyūhyauṣadhīḥ sādayati
- 3
सर्वेषां हविषां द्विर्द्विर् इडां समवदाय सादयति
sarveṣāṃ haviṣāṃ dvirdvir iḍāṃ samavadāya sādayati
- 4
आग्नेयस्य दक्षिणार्धाद् अवदाय पूर्वार्धाद् अणुं दीर्घं यजमानभागम् अवद्यति
āgneyasya dakṣiṇārdhād avadāya pūrvārdhād aṇuṃ dīrghaṃ yajamānabhāgam avadyati
- 5
मध्यात्सम्भिन्दन्द्वितीयाम् इडाम्
madhyātsambhindandvitīyām iḍām
- 6
अग्रेण हवींषि पश्चार्धेन स्रुचः परिहृत्य प्रत्यङ्मुख आसीनो होत्र इडां प्रयच्छति
agreṇa havīṃṣi paścārdhena srucaḥ parihṛtya pratyaṅmukha āsīno hotra iḍāṃ prayacchati
- 7
अग्रेण होतारम् अपरेणेडां दक्षिणातिक्रम्यानतिक्रम्य वा होतुर् अङ्गुलिपर्वणी अनक्त्य् अपरं पूर्वम्
agreṇa hotāram apareṇeḍāṃ dakṣiṇātikramyānatikramya vā hotur aṅguliparvaṇī anakty aparaṃ pūrvam
- 8
इडाया होत्रे ऽवान्तरेडां हस्ते ऽवद्यति होता पूर्वम् अध्वर्युर् उत्तरम्
iḍāyā hotre 'vāntareḍāṃ haste 'vadyati hotā pūrvam adhvaryur uttaram
- 9
अध्वर्युर् आग्नीध्रो ब्रह्मयजमानाव् इत्य् अन्वारभन्ते
adhvaryur āgnīdhro brahmayajamānāv ity anvārabhante
- 10
उपहूतायाम् इडायां दक्षिणतः परीतोत्तरतः परीतेति संप्रेष्यति
upahūtāyām iḍāyāṃ dakṣiṇataḥ parītottarataḥ parīteti saṃpreṣyati
- 11
यजमानपञ्चमा ऋत्विजो व्यतिक्रम्य भक्षयित्वेडां प्रस्तरे मार्जयन्ते
मनो ज्योतिर्जुषताम् आज्यस्य विच्छिन्नं यज्ञं सम् इमं दधातु
बृहस्पतिस्तनुताम् इमं नो यज्ञं विश्वे देवा इह मादयन्ताम्
इति
yajamānapañcamā ṛtvijo vyatikramya bhakṣayitveḍāṃ prastare mārjayante
mano jyotirjuṣatām ājyasya vicchinnaṃ yajñaṃ sam imaṃ dadhātu
bṛhaspatistanutām imaṃ no yajñaṃ viśve devā iha mādayantām
iti
- 12
व्युद्दिष्टस्य द्वैधम् आग्नीध्रभागं पृथक्पाण्योर् अवद्यत्य् उपहूता पृथिवी मातोप मां पृथिवी माता ह्वयताम् अग्निर् आग्नीध्रात्स्वाहा
उपहूतो द्यौः पितोप मां द्यौः पिता ह्वयताम् अग्निर् आग्नीध्रात्स्वाहेत्य् उपहूय पृथिव्यास्त्वा दात्रा प्राश्नाम्य् अन्तरिक्षस्य त्वा दात्रा प्राश्नामि दिवस्त्वा दात्रा प्राश्नामि दिशां त्वा दात्रा प्राश्नामीति प्राश्नाति
vyuddiṣṭasya dvaidham āgnīdhrabhāgaṃ pṛthakpāṇyor avadyaty upahūtā pṛthivī mātopa māṃ pṛthivī mātā hvayatām agnir āgnīdhrātsvāhā
upahūto dyauḥ pitopa māṃ dyauḥ pitā hvayatām agnir āgnīdhrātsvāhety upahūya pṛthivyāstvā dātrā prāśnāmy antarikṣasya tvā dātrā prāśnāmi divastvā dātrā prāśnāmi diśāṃ tvā dātrā prāśnāmīti prāśnāti
- 13
वेदेन ब्रह्मभागयजमानभागाव् अग्रेणाहवनीयं परिहृत्य दक्षिणतः प्राशित्रहरणे ऽन्तर्वेदि ब्रह्मभागं सादयत्य् अपरं बहिर्वेदि यजमानभागम्
vedena brahmabhāgayajamānabhāgāv agreṇāhavanīyaṃ parihṛtya dakṣiṇataḥ prāśitraharaṇe 'ntarvedi brahmabhāgaṃ sādayaty aparaṃ bahirvedi yajamānabhāgam
- 14
अन्वाहार्यम् अनु हवींष्य् उद्वासयति
anvāhāryam anu havīṃṣy udvāsayati
- 15
अनुयाजसमिधम् आदायाह ब्रह्मन्प्रस्थास्यामः समिधम् आधायाग्नीत्परिधींश्चाग्निं च सकृत्सकृत्संमृड्ढीति संप्रेष्यति
anuyājasamidham ādāyāha brahmanprasthāsyāmaḥ samidham ādhāyāgnītparidhīṃścāgniṃ ca sakṛtsakṛtsaṃmṛḍḍhīti saṃpreṣyati
- 16
इध्मसंनहनैः संमार्ष्टि आजिं त्वाग्ने ससृवांसं सनिं ससनिवांसं वाजं जिगिवांसं देवेभ्यो हव्यम् ऊहिवांसं वाजिनं त्वा वाजजितं संमार्ज्म्य् अग्ने वाजम् अजैषीर् इति
idhmasaṃnahanaiḥ saṃmārṣṭi ājiṃ tvāgne sasṛvāṃsaṃ saniṃ sasanivāṃsaṃ vājaṃ jigivāṃsaṃ devebhyo havyam ūhivāṃsaṃ vājinaṃ tvā vājajitaṃ saṃmārjmy agne vājam ajaiṣīr iti
- 17
विस्रस्याभ्युक्ष्य संमार्गान् अग्नाव् अनुप्रहरति
यो भूतानाम् अधिपती रुद्रस्तन्तिचरो वृषा
पशून् अस्माकं मा हिंसीर् एतद् अस्तु हुतं तव स्वाहा
इति
visrasyābhyukṣya saṃmārgān agnāv anupraharati
yo bhūtānām adhipatī rudrastanticaro vṛṣā
paśūn asmākaṃ mā hiṃsīr etad astu hutaṃ tava svāhā
iti
- 18
औपभृतं जुह्वाम् आनीय त्रीन् अनुयाजान्यजति देवान्यजेति प्रथमे यज यजेत्य् उत्तरौ
aupabhṛtaṃ juhvām ānīya trīn anuyājānyajati devānyajeti prathame yaja yajety uttarau
- 19
समिध्य् अपरम् अपरम् इष्ट्वोत्तमेनेतराव् अनुसंभिद्यायतने स्रुचौ सादयति
samidhy aparam aparam iṣṭvottamenetarāv anusaṃbhidyāyatane srucau sādayati

