16 shlokas
- 1
अणीयस्त्रैधं विभज्य मध्यमं द्विधा कृत्वा जुह्वां निधायावशिष्टयोर् अन्यतरत्स्थवीय उपभृतीतरत्समवत्तधान्यां निदधाति
aṇīyastraidhaṃ vibhajya madhyamaṃ dvidhā kṛtvā juhvāṃ nidhāyāvaśiṣṭayor anyataratsthavīya upabhṛtītaratsamavattadhānyāṃ nidadhāti
- 2
त्रैधं मेदो विभज्य यूष्ण्य् अवधाय तृतीयेन जुहूं प्रोर्णोति तृतीयेनोपभृतं च
traidhaṃ medo vibhajya yūṣṇy avadhāya tṛtīyena juhūṃ prorṇoti tṛtīyenopabhṛtaṃ ca
- 3
उपस्तृतसमवत्तधान्यां हृदयजिह्वावक्षांसि तनिम मतस्नू गुदमेदसोस्तृतीयौ भागौ षड्वनिष्ठुं सप्तमं कृत्वानस्थिभिर् इडां वर्धयति
upastṛtasamavattadhānyāṃ hṛdayajihvāvakṣāṃsi tanima matasnū gudamedasostṛtīyau bhāgau ṣaḍvaniṣṭhuṃ saptamaṃ kṛtvānasthibhir iḍāṃ vardhayati
- 4
क्लोमानं प्लीहानं पुरीततम् इत्यवधाय यूष्णोपसिञ्चति
klomānaṃ plīhānaṃ purītatam ityavadhāya yūṣṇopasiñcati
- 5
शीर्षांसाणूकापरसक्थीन्य् अनवदानीयानि शृतैः संनिधायैन्द्रः प्राण इति संमृशति
śīrṣāṃsāṇūkāparasakthīny anavadānīyāni śṛtaiḥ saṃnidhāyaindraḥ prāṇa iti saṃmṛśati
- 6
अपां त्वौषधीनाम् इति वसाहवन्याम् उपस्तीर्य वसां गृह्णाति
apāṃ tvauṣadhīnām iti vasāhavanyām upastīrya vasāṃ gṛhṇāti
- 7
श्रीर् असीति स्रवन्तीं धारां स्वधितिना सकृच्छिनत्ति द्विः पञ्चावत्तिनः
śrīr asīti sravantīṃ dhārāṃ svadhitinā sakṛcchinatti dviḥ pañcāvattinaḥ
- 8
आपः समरिणन्न् इति पार्श्वेन वसाहोमम् अपिदधाति
āpaḥ samariṇann iti pārśvena vasāhomam apidadhāti
- 9
दैवतेषु सौविष्टकृतेष्व् अवत्तेषु यूष्नोपसिक्तं हिरण्यशकलम् अवधायाभिघार्येन्द्राग्निभ्यां छागस्य हविषो ऽनुब्रूहीति संप्रेष्यति
daivateṣu sauviṣṭakṛteṣv avatteṣu yūṣnopasiktaṃ hiraṇyaśakalam avadhāyābhighāryendrāgnibhyāṃ chāgasya haviṣo 'nubrūhīti saṃpreṣyati
- 10
आश्राव्य प्रत्याश्रावित इन्द्राग्निभ्यां छागस्य हविषः प्रेष्येति संप्रेष्यति
āśrāvya pratyāśrāvita indrāgnibhyāṃ chāgasya haviṣaḥ preṣyeti saṃpreṣyati
- 11
मैत्रावरुणो होतारं प्रेष्यति
maitrāvaruṇo hotāraṃ preṣyati
- 12
याज्याया अर्धर्चान्ते प्रतिप्रस्थातोत्तरतस्तिष्ठन्घृतं घृतपावान इति वसाहोमं जुहोति
yājyāyā ardharcānte pratiprasthātottaratastiṣṭhanghṛtaṃ ghṛtapāvāna iti vasāhomaṃ juhoti
- 13
वसाहोमोच्छेषेण वाजिनवद्दिशः प्रति यजति
vasāhomoccheṣeṇa vājinavaddiśaḥ prati yajati
- 14
अत्रैव तिष्ठन्जुह्वाम् उपस्तीर्य पृषदाज्यात्सकृत्स्रुवेणादाय जुह्वाम् अवदाय द्विर् आघारयति
atraiva tiṣṭhanjuhvām upastīrya pṛṣadājyātsakṛtsruveṇādāya juhvām avadāya dvir āghārayati
- 15
वनस्पतये ऽनुब्रूहीति संप्रेष्यति
vanaspataye 'nubrūhīti saṃpreṣyati
- 16
आश्राव्य प्रत्याश्राविते वनस्पतये प्रेष्येति
āśrāvya pratyāśrāvite vanaspataye preṣyeti

