10 shlokas
- 1
अयनानुकूलगमनं हितम् अर्केन्द्वोर्द्वयोर् असंपत्तौ
द्युनिशं जयाय यायाद्विपर्यये क्लेशभङ्गवधाः
ayanānukūlagamanaṃ hitam arkendvordvayor asaṃpattau
dyuniśaṃ jayāya yāyādviparyaye kleśabhaṅgavadhāḥ
- 2
उदितो यतो यतश्च भ्रमणे यद्वारभेषु चारगते
तद्रि?बिधं प्रतिशुक्रं त्याज्यस्तत्रोदयो यत्नात्
udito yato yataśca bhramaṇe yadvārabheṣu cāragate
tadri?bidhaṃ pratiśukraṃ tyājyastatrodayo yatnāt
- 3
न प्रतिशुक्रे सिद्धिं स्वल्पो ऽप्य् अर्थः प्रयाति यातॄणाम्
कामं व्रजेत्प्रतिभृगुं जिजीविषुर्नास्तगे शुक्रे
na pratiśukre siddhiṃ svalpo 'py arthaḥ prayāti yātṝṇām
kāmaṃ vrajetpratibhṛguṃ jijīviṣurnāstage śukre
- 4
कलुषि वपुषि ग्रहहते प्रतिलोमे नीचगे ऽस्तगे च भृगौ
बलसम्पन्नो ऽपि नृपो याता शत्रोर्वशं याति
kaluṣi vapuṣi grahahate pratilome nīcage 'stage ca bhṛgau
balasampanno 'pi nṛpo yātā śatrorvaśaṃ yāti
- 5
ललाटो ऽग्निभयंकरो ऽदितिनकृत्कोशक्षयं लोहितः शत्रूणां विजय शशाङ्कतनयः सैन्योपभेभं गुरुः
मृत्युं भास्करनन्दनो नरपतेयोधक्षयविप्रराट्सर्वाण्य् ऐव सुरारिमन्त्रिवृषभः संपिण्डिता भार्गवः
lalāṭo 'gnibhayaṃkaro 'ditinakṛtkośakṣayaṃ lohitaḥ śatrūṇāṃ vijaya śaśāṅkatanayaḥ sainyopabhebhaṃ guruḥ
mṛtyuṃ bhāskaranandano narapateyodhakṣayaviprarāṭsarvāṇy aiva surārimantrivṛṣabhaḥ saṃpiṇḍitā bhārgavaḥ
- 6
नक्षत्रं तिथियस्तथैव करणं वारस्तथा गोचरं द्रेकाणं सनवांशग्रहदिनं लग्नं मुहूर्तो ऽपि वा
ये चान्ये शकुनादयो निगदिताः सर्वे ऽपि ते शोभना ललाटो भृगुनन्दस्य न तदा शकुरो ऽपि जीवेन्दतः
nakṣatraṃ tithiyastathaiva karaṇaṃ vārastathā gocaraṃ drekāṇaṃ sanavāṃśagrahadinaṃ lagnaṃ muhūrto 'pi vā
ye cānye śakunādayo nigaditāḥ sarve 'pi te śobhanā lalāṭo bhṛgunandasya na tadā śakuro 'pi jīvendataḥ
- 7
सुरम् अपि विजयेच्छुःपृष्ठतीकृत्य शुक्रः समरविजयतृष्णो यो नृपः सम्प्रयाति
रिपुबलरुधिरौदैस्तर्पयित्वा तु भूमिं प्रथितविपुलकीर्तिदीर्घकालं भुनक्ति
suram api vijayecchuḥpṛṣṭhatīkṛtya śukraḥ samaravijayatṛṣṇo yo nṛpaḥ samprayāti
ripubalarudhiraudaistarpayitvā tu bhūmiṃ prathitavipulakīrtidīrghakālaṃ bhunakti
- 8
नौर् इव विकर्णधरा विवेद वधूर्विभास्करेव द्यौः
भूर् इव विपन्नसस्या प्रोषितशुक्रा भवति यात्रा
naur iva vikarṇadharā viveda vadhūrvibhāskareva dyauḥ
bhūr iva vipannasasyā proṣitaśukrā bhavati yātrā
- 9
एवंविधे ऽपि यायाद्यदि शुक्रे चन्द्रजो ऽनुकूलस्थः
प्रतिबुधयातस्यान्ये न परित्राणे ग्रहाः शक्ताः
evaṃvidhe 'pi yāyādyadi śukre candrajo 'nukūlasthaḥ
pratibudhayātasyānye na paritrāṇe grahāḥ śaktāḥ
- 10
यो ऽपि पतिर्दिशि यस्यां तस्मिन्तत्स्थे न तां दिशं यायात्
अनुकूले च दिगीशे गतव्यं कण्ठकोपगते
yo 'pi patirdiśi yasyāṃ tasmintatsthe na tāṃ diśaṃ yāyāt
anukūle ca digīśe gatavyaṃ kaṇṭhakopagate

