16 shlokas
- 1
लग्नोपगतैः सौम्यैर् आरोग्यं भवति चित्तसौख्यं च
अर्थस्थैर् अर्थचयो योधविवृद्धिस्तृतीयस्थैः
lagnopagataiḥ saumyair ārogyaṃ bhavati cittasaukhyaṃ ca
arthasthair arthacayo yodhavivṛddhistṛtīyasthaiḥ
- 2
वाहनसुहृदां वृद्धिश्चतुर्थगैः पञ्चगैश्च मन्त्रिबलम्
रिपुनाशः षष्ठस्थैः भृगुवर्जं सप्तमेषु हिताः
vāhanasuhṛdāṃ vṛddhiścaturthagaiḥ pañcagaiśca mantribalam
ripunāśaḥ ṣaṣṭhasthaiḥ bhṛguvarjaṃ saptameṣu hitāḥ
- 3
रक्षन्त्य् आयुर्निधने शशिवर्जं नवमभेषु वसुसम्पत्
कर्मणि सिद्धिर्लाभो बलसम्पातश्च दशमाद्यैः
rakṣanty āyurnidhane śaśivarjaṃ navamabheṣu vasusampat
karmaṇi siddhirlābho balasampātaśca daśamādyaiḥ
- 4
भौमार्कार्किशशाङ्कैर्लग्ने वधबन्धमरणसंत्रासाः
अर्थक्षयो द्वितीयैस्तृतीयसंस्थैर्यशो द्युतिमत्
bhaumārkārkiśaśāṅkairlagne vadhabandhamaraṇasaṃtrāsāḥ
arthakṣayo dvitīyaistṛtīyasaṃsthairyaśo dyutimat
- 5
वाहनबन्धुवियोगो मन्त्रखावो रिपुक्षयश्चेति
हिबुकादिषु सप्तमगैः स्वविषयनाशो भृगुसुते च
vāhanabandhuviyogo mantrakhāvo ripukṣayaśceti
hibukādiṣu saptamagaiḥ svaviṣayanāśo bhṛgusute ca
- 6
मृत्युर्निधनोपगतैः सेनाव्यसनं महन्नवमसंस्थैः
कुजसूर्यौ दशमस्थौ जयदौ भङ्गप्रदः सौरिः
mṛtyurnidhanopagataiḥ senāvyasanaṃ mahannavamasaṃsthaiḥ
kujasūryau daśamasthau jayadau bhaṅgapradaḥ sauriḥ
- 7
जयम् एकादशसंस्थैः क्रूरैर् अन्त्योपगैः स्वबलभेदः
उपचयवर्जं सौम्यैर्यातुः पापैर्विपर्यस्तम्
jayam ekādaśasaṃsthaiḥ krūrair antyopagaiḥ svabalabhedaḥ
upacayavarjaṃ saumyairyātuḥ pāpairviparyastam
- 8
क्रूरो ऽप्य् अनुकूलस्थः शस्तो लग्ने शुभो ऽपि वानिष्टः
वक्री न शुभः केन्द्रे तदहस्तद्वर्गलग्नं च
krūro 'py anukūlasthaḥ śasto lagne śubho 'pi vāniṣṭaḥ
vakrī na śubhaḥ kendre tadahastadvargalagnaṃ ca
- 9
सामपती जीवसितौ भेदस्य तु राहुकेतुबुधसौराः
दण्डस्यार्कक्षितिजाबुध प्रदानस्य शीतांशुः
sāmapatī jīvasitau bhedasya tu rāhuketubudhasaurāḥ
daṇḍasyārkakṣitijābudha pradānasya śītāṃśuḥ
- 10
सूर्यादिभिर् अनुकूलैस्तद् उदयवर्गैश्च तत्सिद्धिः
sūryādibhir anukūlaistad udayavargaiśca tatsiddhiḥ
- 11
नीचस्था ग्रहविजिता रव्यभिभूता विरश्मयो ह्रस्वाः
भुजगा इव मन्त्रहता भवन्त्य् अकार्यक्षमा लग्ने
nīcasthā grahavijitā ravyabhibhūtā viraśmayo hrasvāḥ
bhujagā iva mantrahatā bhavanty akāryakṣamā lagne
- 12
येषां गमे नवमपञ्चमकण्टकस्थाः सौम्यास्तृतीयरिपुलाभगताश्च पापाः
आयान्ति ते स्वभवनानि पुनः कृतार्थाः दत्ता द्विजातिषु तथा विधिवद्यथार्थाः
yeṣāṃ game navamapañcamakaṇṭakasthāḥ saumyāstṛtīyaripulābhagatāśca pāpāḥ
āyānti te svabhavanāni punaḥ kṛtārthāḥ dattā dvijātiṣu tathā vidhivadyathārthāḥ
- 13
एकस्मिन्न् अपि केन्द्रे यदि सौम्यो न ग्रहो ऽस्ति यात्रायाम्
जन्मन्य् अथवा कर्मणि न तच्छुभं प्राहुर् आचार्याः
ekasminn api kendre yadi saumyo na graho 'sti yātrāyām
janmany athavā karmaṇi na tacchubhaṃ prāhur ācāryāḥ
- 14
राह्वर्कारशिखिसिता यायिन इति शर्वरीश आक्रन्दः
गुरुबुधसौराः पौराः पौरः सूर्यो ऽपि पूर्वाह्णे
rāhvarkāraśikhisitā yāyina iti śarvarīśa ākrandaḥ
gurubudhasaurāḥ paurāḥ pauraḥ sūryo 'pi pūrvāhṇe
- 15
यायिभिर् अनुकूलस्थैर्यानं पौरैर्विगृह्य चासीनम्
पौरेतरैर् अपि शुभैर्यायाद् अर्धेन सैन्यस्य
yāyibhir anukūlasthairyānaṃ paurairvigṛhya cāsīnam
pauretarair api śubhairyāyād ardhena sainyasya
- 16
सर्वैर् अप्य् अशुभकरैः शुभदैवं संश्रयेत्प्रधाननृपम्
बलसिद्धिः सौम्यफलैर्बलिभिः क्रूरैर्जयो युद्धे
sarvair apy aśubhakaraiḥ śubhadaivaṃ saṃśrayetpradhānanṛpam
balasiddhiḥ saumyaphalairbalibhiḥ krūrairjayo yuddhe

