9 shlokas
- 1
अन्तर्धायो हैके निवपन्ति
देवाश्चासुराश्चोभये प्राजापत्या अस्मिंल्लोके ऽस्पर्धन्त
ते देवा असुरान्त्सपत्नान्भ्रातृव्यान् अस्माल्लोकाद् अनुदन्त
तस्माद्या दैव्यः प्रजा अनन्तर्हितानि ताः श्मशानानि कुर्वते ऽथ या आसुर्यः प्राच्यास्त्वद्ये त्वद् अन्तर्हितानि ते चम्वां त्वद्यस्मिंस्त्वत्
antardhāyo haike nivapanti
devāścāsurāścobhaye prājāpatyā asmiṃlloke 'spardhanta
te devā asurāntsapatnānbhrātṛvyān asmāllokād anudanta
tasmādyā daivyaḥ prajā anantarhitāni tāḥ śmaśānāni kurvate 'tha yā āsuryaḥ prācyāstvadye tvad antarhitāni te camvāṃ tvadyasmiṃstvat
- 2
अथैनत्परिश्रिद्भिः परिश्रयति
या एवामूः परिश्रितस्ता एता यजुषा ताः परिश्रयति तूष्णीम् इमाः
दैवं तत्पित्र्यम्च व्याकरोति
अपरिमिताभिः
अपरिमितो ह्य् असौ लोकः
athainatpariśridbhiḥ pariśrayati
yā evāmūḥ pariśritastā etā yajuṣā tāḥ pariśrayati tūṣṇīm imāḥ
daivaṃ tatpitryamca vyākaroti
aparimitābhiḥ
aparimito hy asau lokaḥ
- 3
अथैनत्पलाशशाखया व्युदूहति
यद् एवादो व्युदूहनं तद् एतद् अपेतो यन्तु पणयो ऽसुम्ना देवपीयव इति
पणीनेवैतद् असुम्नान्देवपीयून् असुररक्षसान्य् अस्माल्लोकाद् अपहन्ति
अस्य लोकः सुतावत इति
सुतवान्हि य ईजानः
द्युभिर् अहोभिर् अक्तुभिर्व्यक्तम् इति
तद् एनम् ऋतुभिश्चाहोरात्रैश्च सलोकं करोति
athainatpalāśaśākhayā vyudūhati
yad evādo vyudūhanaṃ tad etad apeto yantu paṇayo 'sumnā devapīyava iti
paṇīnevaitad asumnāndevapīyūn asurarakṣasāny asmāllokād apahanti
asya lokaḥ sutāvata iti
sutavānhi ya ījānaḥ
dyubhir ahobhir aktubhirvyaktam iti
tad enam ṛtubhiścāhorātraiśca salokaṃ karoti
- 4
यमो ददात्व् अवसानम् अस्मा इति
यमो ह वा अस्याम् अवसानस्येष्टे
तम् एवास्मा अस्यामवसानं याचति
तां दक्षिणोदस्यत्य् उदग् इतराम्
दैवं चैव तत्पित्र्यं च व्याकरोति
yamo dadātv avasānam asmā iti
yamo ha vā asyām avasānasyeṣṭe
tam evāsmā asyāmavasānaṃ yācati
tāṃ dakṣiṇodasyaty udag itarām
daivaṃ caiva tatpitryaṃ ca vyākaroti
- 5
अथ दक्षिणतः सीरम्युनक्ति
उत्तरत इत्य् उ हैक आहुः
स यथा कामयेत तथा कुर्यात्
युङ्क्तेति संप्रेष्याभिमन्त्रयते
सविता ते शरीरेभ्यः पृथिव्यां लोकम् इच्छत्व् इति सवितैवास्यैतच्छरीरेभ्यः पृथिव्यां लोकम् इच्छति
तस्मै युज्यन्ताम् उस्रिया इत्य् एतस्मा उ हि कर्मण उस्रिया युज्यन्ते
atha dakṣiṇataḥ sīramyunakti
uttarata ity u haika āhuḥ
sa yathā kāmayeta tathā kuryāt
yuṅkteti saṃpreṣyābhimantrayate
savitā te śarīrebhyaḥ pṛthivyāṃ lokam icchatv iti savitaivāsyaitaccharīrebhyaḥ pṛthivyāṃ lokam icchati
tasmai yujyantām usriyā ity etasmā u hi karmaṇa usriyā yujyante
- 6
षड्गवम्भवति
षड् ऋतवः संवत्सरः
ऋतुष्व् एवैनम् एतत्संवत्सरे प्रतिष्ठायाम्प्रतिष्ठापयति
तद् अपसलवि पर्याहृत्योत्तरतः प्रतीचीम्प्रथमां सीताम्कृषति वायुः पुनात्व् इति सविता पुनात्व् इति जघनार्धेन दक्षिणाग्नेर्भ्राजसेति दक्षिणार्धेन प्राचीं सूर्यस्य वर्चसेत्य् अग्रेणोदीचीम्
ṣaḍgavambhavati
ṣaḍ ṛtavaḥ saṃvatsaraḥ
ṛtuṣv evainam etatsaṃvatsare pratiṣṭhāyāmpratiṣṭhāpayati
tad apasalavi paryāhṛtyottarataḥ pratīcīmprathamāṃ sītāmkṛṣati vāyuḥ punātv iti savitā punātv iti jaghanārdhena dakṣiṇāgnerbhrājaseti dakṣiṇārdhena prācīṃ sūryasya varcasety agreṇodīcīm
- 7
चतस्रः सीता यजुषा कृषति
तद्यच्चतसृषु दिक्ष्व् अन्नं तस्मिन्न् एवैनम् एतत्प्रतिष्ठापयति
तद्वै यजुषाद्धा वै तद्यद्यजुर् अद्धो तद्यद् इमा दिशः
catasraḥ sītā yajuṣā kṛṣati
tadyaccatasṛṣu dikṣv annaṃ tasminn evainam etatpratiṣṭhāpayati
tadvai yajuṣāddhā vai tadyadyajur addho tadyad imā diśaḥ
- 8
अथात्मानम्विकृषति
तद्यद् एव संवत्सरे ऽन्नं तस्मिन्न् एवैनम् एतत्प्रतिष्ठापयति
तूष्णीम् अपरिमिताभिः
अपरिमितो ह्य् असौ लोकः
athātmānamvikṛṣati
tadyad eva saṃvatsare 'nnaṃ tasminn evainam etatpratiṣṭhāpayati
tūṣṇīm aparimitābhiḥ
aparimito hy asau lokaḥ
- 9
अथैनद्विमुञ्चति कृत्वा तत्कर्म यस्मै कर्मण एनद्युङ्क्ते विमुच्यन्ताम् उस्रिया इति
एतस्मा उ हि कर्मण उस्रिया युज्यन्ते
तद्दक्षिणोदस्यत्य् उदग् इतरत्
दैवं चैव तत्पित्र्यम्च व्याकरोति
athainadvimuñcati kṛtvā tatkarma yasmai karmaṇa enadyuṅkte vimucyantām usriyā iti
etasmā u hi karmaṇa usriyā yujyante
taddakṣiṇodasyaty udag itarat
daivaṃ caiva tatpitryamca vyākaroti

