28 shlokas
- 1
एतेन हेन्द्रोतो दैवापः शौनकः जनमेजयम्पारिक्षितं याजयांचकार तेनेष्ट्वा सर्वाम्पापकृत्यां सर्वां ब्रह्महत्यामपजघान सर्वां ह वै पापकृत्यां सर्वाम्ब्रह्महत्यामपहन्ति योऽश्वमेधेन यजते
etena hendroto daivāpaḥ śaunakaḥ janamejayampārikṣitaṃ yājayāṃcakāra teneṣṭvā sarvāmpāpakṛtyāṃ sarvāṃ brahmahatyāmapajaghāna sarvāṃ ha vai pāpakṛtyāṃ sarvāmbrahmahatyāmapahanti yo'śvamedhena yajate
- 2
तदेतद्गाथयाभिगीतम् आसन्दीवति धान्यादं रुक्मिणं हरितस्रजम् अबध्नादश्वं सारङ्गं देवेभ्यो जनमेजय इति
tadetadgāthayābhigītam āsandīvati dhānyādaṃ rukmiṇaṃ haritasrajam abadhnādaśvaṃ sāraṅgaṃ devebhyo janamejaya iti
- 3
एते एव पूर्वे अहनी ज्योतिर् अतिरात्रस्तेन भीमसेनम् एते एव पूर्वे अहनी गौर् अतिरात्रस्तेनोग्रसेनम् एते एव पूर्वे अहनी आयुर् अतिरात्रस्तेन श्रुतसेनम् इत्य् एते पारिक्षितीयास्तदेतद्गाथयाभिगीतं पारिक्षिता यजमाना अश्वमेधैः परोऽवरम् अजहुः कर्म पापकम्पुण्याः पुण्येन कर्मणेति
ete eva pūrve ahanī jyotir atirātrastena bhīmasenam ete eva pūrve ahanī gaur atirātrastenograsenam ete eva pūrve ahanī āyur atirātrastena śrutasenam ity ete pārikṣitīyāstadetadgāthayābhigītaṃ pārikṣitā yajamānā aśvamedhaiḥ paro'varam ajahuḥ karma pāpakampuṇyāḥ puṇyena karmaṇeti
- 4
एते एव पूर्वे अहनी अभिजिद् अतिरात्रस्तेन ह पर आट्णार ईजे कौसल्यो राजा तद् एतद्गाथयाभिगीतम् अट्णारस्य परः पुत्रोऽश्वम्मेध्यमबन्धयत्हैरण्यनाभः कौसल्यो दिशः पूर्णा अमंहतेति
ete eva pūrve ahanī abhijid atirātrastena ha para āṭṇāra īje kausalyo rājā tad etadgāthayābhigītam aṭṇārasya paraḥ putro'śvammedhyamabandhayathairaṇyanābhaḥ kausalyo diśaḥ pūrṇā amaṃhateti
- 5
एते एव पूर्वे अहनी विश्वजिद् अतिरात्रस्तेन ह पुरुकुत्सो दौर्गहेणेज ऐक्ष्वाको राजा तस्मादेतदृषिणाभ्यनूक्तम् अस्माकम् अत्र पितरस्त आसन्त्सप्त ऋषयो दौर्गहे बध्यमान इति
ete eva pūrve ahanī viśvajid atirātrastena ha purukutso daurgaheṇeja aikṣvāko rājā tasmādetadṛṣiṇābhyanūktam asmākam atra pitarasta āsantsapta ṛṣayo daurgahe badhyamāna iti
- 6
एते एव पूर्वे अहनी महाव्रतम् अतिरात्रस्तेन ह मरुत्त आविक्षित ईज आयोगवो राजा तस्य ह ततो मरुतः परिवेष्टारो ऽग्निः क्षत्ता विश्वे देवाः सभासदो बभूवुस्तद् एतद्गाथयाभिगीतं मरुतः परिवेष्टारो मरुत्तस्यावसन्गृहे आविक्षितस्याग्निः क्षत्ता विश्वे देवाः सभासद इति मरुतो ह वै तस्य परिवेष्टारोऽग्निः क्षत्ता विश्वे देवाः सभासदो भवन्ति यो ऽश्वमेधेन यजते
ete eva pūrve ahanī mahāvratam atirātrastena ha marutta āvikṣita īja āyogavo rājā tasya ha tato marutaḥ pariveṣṭāro 'gniḥ kṣattā viśve devāḥ sabhāsado babhūvustad etadgāthayābhigītaṃ marutaḥ pariveṣṭāro maruttasyāvasangṛhe āvikṣitasyāgniḥ kṣattā viśve devāḥ sabhāsada iti maruto ha vai tasya pariveṣṭāro'gniḥ kṣattā viśve devāḥ sabhāsado bhavanti yo 'śvamedhena yajate
- 7
एते एव पूर्वे अहनी अप्तोर्यामो ऽतिरात्रस्तेन हैतेन क्रैव्य ईजे पाञ्चालो राजा क्रिवय इति ह वै पुरा पञ्चालानाचक्षते तदेतद्गाथयाभिगीतम् अश्वम्मेध्यमालभत क्रिवीणामतिपूरुषः पाञ्चालः परिवक्रायां सहस्रशतदक्षिणमिति
ete eva pūrve ahanī aptoryāmo 'tirātrastena haitena kraivya īje pāñcālo rājā krivaya iti ha vai purā pañcālānācakṣate tadetadgāthayābhigītam aśvammedhyamālabhata krivīṇāmatipūruṣaḥ pāñcālaḥ parivakrāyāṃ sahasraśatadakṣiṇamiti
- 8
अथ द्वितीयया सहस्रम् आसन्नयुता शता च पञ्चविंशतिः दिक्तोदिक्तः पञ्चालानां ब्राह्मणा या विभेजिर इति
atha dvitīyayā sahasram āsannayutā śatā ca pañcaviṃśatiḥ diktodiktaḥ pañcālānāṃ brāhmaṇā yā vibhejira iti
- 9
त्रिवृदग्निष्टोमः पञ्चदश उक्थ्यः सप्तदशं तृतीयमहः सोक्थकम् एकविंशः षोडशी पञ्चदशी रात्रिस्त्रिवृत्सन्धिर् इत्य् एषो ऽनुष्टुप्सम्पन्नस्तेन हैतेन ध्वसा द्वैतवन ईजे मात्स्यो राजा यत्रैतद्द्वैतवनं सरस्तद् एतद्गाथयाभिगीतं चतुर्दश द्वैतवनो राजा सङ्ग्रामजिद्धयान् इन्द्राय वृत्रघ्ने ऽबध्नात्तस्माद्द्वैतवनं सर इति
trivṛdagniṣṭomaḥ pañcadaśa ukthyaḥ saptadaśaṃ tṛtīyamahaḥ sokthakam ekaviṃśaḥ ṣoḍaśī pañcadaśī rātristrivṛtsandhir ity eṣo 'nuṣṭupsampannastena haitena dhvasā dvaitavana īje mātsyo rājā yatraitaddvaitavanaṃ sarastad etadgāthayābhigītaṃ caturdaśa dvaitavano rājā saṅgrāmajiddhayān indrāya vṛtraghne 'badhnāttasmāddvaitavanaṃ sara iti
- 10
चतुर्विंशाः पवमानाः त्रिवृद् अभ्यावर्तं चतुश्चत्वारिंशाः पवमाना एकविंशम् अभ्यावर्तम् अष्टाचत्वारिंशाः पवमानास्त्रयस्त्रिंशम् अभ्यावर्तम् आग्निष्टोमसामाद्द्वात्रिंशान्य् उक्थान्य् एकविंशः षोडशी पञ्चदशी रात्रिस्त्रिवृत्सन्धिर् इति
caturviṃśāḥ pavamānāḥ trivṛd abhyāvartaṃ catuścatvāriṃśāḥ pavamānā ekaviṃśam abhyāvartam aṣṭācatvāriṃśāḥ pavamānāstrayastriṃśam abhyāvartam āgniṣṭomasāmāddvātriṃśāny ukthāny ekaviṃśaḥ ṣoḍaśī pañcadaśī rātristrivṛtsandhir iti
- 11
एतद्विष्णोः क्रान्तम्तेन हैतेन भरतो दौःषन्तिरीजे तेनेष्ट्वेमाम्व्यष्टिम्व्यानशे येयम्भरतानां तद् एतद्गाथयाभिगीतम् अष्टासप्ततिम्भरतो दौःषन्तिर्यमुनाम् अनु गङ्गायाम्वृत्रघ्ने ऽबध्नात्पञ्चपञ्चाशतं हयान् इति
etadviṣṇoḥ krāntamtena haitena bharato dauḥṣantirīje teneṣṭvemāmvyaṣṭimvyānaśe yeyambharatānāṃ tad etadgāthayābhigītam aṣṭāsaptatimbharato dauḥṣantiryamunām anu gaṅgāyāmvṛtraghne 'badhnātpañcapañcāśataṃ hayān iti
- 12
अथ द्वितीयया त्रयस्त्रिंशं शतं राजाश्वान्बद्ध्वाय मेध्यान्सौद्युम्निर् अत्यष्ठाद् अन्यान् अमायान्मायवत्तर इति
atha dvitīyayā trayastriṃśaṃ śataṃ rājāśvānbaddhvāya medhyānsaudyumnir atyaṣṭhād anyān amāyānmāyavattara iti
- 13
अथ तृतीयया शकुन्तला नाडपित्यप्सरा भरतम्दधे परःसहस्रान् इन्द्रायाश्वान्मेध्यान्य आहरद्विजित्य पृथिवीं सर्वामिति
atha tṛtīyayā śakuntalā nāḍapityapsarā bharatamdadhe paraḥsahasrān indrāyāśvānmedhyānya āharadvijitya pṛthivīṃ sarvāmiti
- 14
अथ चतुर्थ्या महद् अद्य भरतस्य न पूर्वे नापरे जनाः दिवम्मर्त्य इव बाहुभ्यां नोदापुः पञ्च मानवा इति
atha caturthyā mahad adya bharatasya na pūrve nāpare janāḥ divammartya iva bāhubhyāṃ nodāpuḥ pañca mānavā iti
- 15
एकविंशस्तोमेन ऋषभो याज्ञतुर ईजे श्विक्नानां राजा तद् एतद्गाथयाभिगीतं याज्ञतुरे यजमाने ब्रह्माण ऋषभे जना अश्वमेधे धनम्लब्ध्वा विभजन्ते स्म दक्षिणा इति
ekaviṃśastomena ṛṣabho yājñatura īje śviknānāṃ rājā tad etadgāthayābhigītaṃ yājñature yajamāne brahmāṇa ṛṣabhe janā aśvamedhe dhanamlabdhvā vibhajante sma dakṣiṇā iti
- 16
त्रयस्त्रिंशस्तोमेन शोणः सात्रासाह ईजे पाञ्चालो राजा तद् एतद्गाथयाभिगीतं सात्रासाहे यजमाने ऽश्वमेधेन तौर्वशाः उदीरते त्रयस्त्रिंशाः षट्सहस्राणि वर्मिणामिति
trayastriṃśastomena śoṇaḥ sātrāsāha īje pāñcālo rājā tad etadgāthayābhigītaṃ sātrāsāhe yajamāne 'śvamedhena taurvaśāḥ udīrate trayastriṃśāḥ ṣaṭsahasrāṇi varmiṇāmiti
- 17
अथ द्वितीयया षट्षट्षड्वा सहस्राणि यज्ञे कोकपितुस्तव उदीरते त्रयस्त्रिंशाः षट्सहस्राणि वर्मिणामिति
atha dvitīyayā ṣaṭṣaṭṣaḍvā sahasrāṇi yajñe kokapitustava udīrate trayastriṃśāḥ ṣaṭsahasrāṇi varmiṇāmiti
- 18
अथ तृतीयया सात्रासाहे यजमाने पाञ्चाले राज्ञि सुस्रजि अमाद्यदिन्द्रः सोमेनातृप्यन्ब्राह्मणा धनैर् इति
atha tṛtīyayā sātrāsāhe yajamāne pāñcāle rājñi susraji amādyadindraḥ somenātṛpyanbrāhmaṇā dhanair iti
- 19
गोविनतेन शतानीकः सात्राजित ईजे काश्यस्याश्वमादाय ततो हैतद् अर्वाक्काशयो ऽग्नीन्नादधत आत्तसोमपीथाः स्म इति वदन्तः
govinatena śatānīkaḥ sātrājita īje kāśyasyāśvamādāya tato haitad arvākkāśayo 'gnīnnādadhata āttasomapīthāḥ sma iti vadantaḥ
- 20
तस्य विधा चतुर्विंशाः पवमानाः त्रिवृदभ्यावर्तम्चतुश्चत्वारिंशाः पवमाना एकविंशान्याज्यानि त्रिणवान्य् उक्थान्य् एकविंशानि पृष्ठानि षट्त्रिंशाः पवमानास्त्रयस्त्रिंशम् अभ्यावर्तम् आग्निष्टोमसामाद् एकविंशान्य् उक्थान्य् एकविंशः षोडशी पञ्चदशी रात्रिस्त्रिवृत्सन्धिः
tasya vidhā caturviṃśāḥ pavamānāḥ trivṛdabhyāvartamcatuścatvāriṃśāḥ pavamānā ekaviṃśānyājyāni triṇavāny ukthāny ekaviṃśāni pṛṣṭhāni ṣaṭtriṃśāḥ pavamānāstrayastriṃśam abhyāvartam āgniṣṭomasāmād ekaviṃśāny ukthāny ekaviṃśaḥ ṣoḍaśī pañcadaśī rātristrivṛtsandhiḥ
- 21
तदेतद्गाथयाभिगीतं शतानीकः समन्तासु मेध्यं सात्राजितो हयम् आदत्त यज्ञं काशीनाम्भरतः सत्वतामिवेति
tadetadgāthayābhigītaṃ śatānīkaḥ samantāsu medhyaṃ sātrājito hayam ādatta yajñaṃ kāśīnāmbharataḥ satvatāmiveti
- 22
अथ द्वितीयया श्वेतं समन्तासु वशं चरन्तं शतानीको धृतराष्ट्रस्य मेध्यम् आदाय सह्वा दशमास्यमश्वं शतानीको गोविनतेन हेज इति
atha dvitīyayā śvetaṃ samantāsu vaśaṃ carantaṃ śatānīko dhṛtarāṣṭrasya medhyam ādāya sahvā daśamāsyamaśvaṃ śatānīko govinatena heja iti
- 23
अथ चतुर्थ्या महदद्य भरतानां न पूर्वे नापरे जनाः दिवम्मर्त्य इव पक्षाभ्यां नोदापुः सप्त मानवा इति
atha caturthyā mahadadya bharatānāṃ na pūrve nāpare janāḥ divammartya iva pakṣābhyāṃ nodāpuḥ sapta mānavā iti
- 24
अथातो दक्षिणानां मध्यम्प्रति राष्ट्रस्य यदन्यद्भूमेश्च पुरुषेभ्यश्च ब्राह्मणस्य च वित्तात्प्राची दिग्घोतुर्दक्षिणा ब्रह्मणः प्रतीच्य् अध्वर्योर् उदीच्य् उद्गातुस्तदेव होतृका अन्वाभक्ताः
athāto dakṣiṇānāṃ madhyamprati rāṣṭrasya yadanyadbhūmeśca puruṣebhyaśca brāhmaṇasya ca vittātprācī digghoturdakṣiṇā brahmaṇaḥ pratīcy adhvaryor udīcy udgātustadeva hotṛkā anvābhaktāḥ
- 25
उदयनीयायां संस्थितायाम् एकविंशतिम्वशा अनूबन्ध्या आलभते मैत्रावरुणीर्वैश्वदेवीर्बार्हस्पत्या एतासां देवतानामाप्त्यै तद्यद्बार्हस्पत्यान्त्या भवन्ति ब्रह्म वै बृहस्पतिस्तद् उ ब्रह्मण्येवान्ततः प्रतितिष्ठति
udayanīyāyāṃ saṃsthitāyām ekaviṃśatimvaśā anūbandhyā ālabhate maitrāvaruṇīrvaiśvadevīrbārhaspatyā etāsāṃ devatānāmāptyai tadyadbārhaspatyāntyā bhavanti brahma vai bṛhaspatistad u brahmaṇyevāntataḥ pratitiṣṭhati
- 26
अथ यदेकविंशतिर्भवन्ति एकविंशो वा एष य एष तपति द्वादश मासाः पञ्चर्तवस्त्रय इमे लोका असावादित्य एकविंश एताम् अभिसम्पदम्
atha yadekaviṃśatirbhavanti ekaviṃśo vā eṣa ya eṣa tapati dvādaśa māsāḥ pañcartavastraya ime lokā asāvāditya ekaviṃśa etām abhisampadam
- 27
उदवसानीयायां संस्थितायाम्चतस्रश्च जायाः कुमारीम्पञ्चमीं चत्वारि च शतान्यनुचरीणां यथासमुदितम्दक्षिणाम्ददति
udavasānīyāyāṃ saṃsthitāyāmcatasraśca jāyāḥ kumārīmpañcamīṃ catvāri ca śatānyanucarīṇāṃ yathāsamuditamdakṣiṇāmdadati
- 28
अथोत्तरं संवत्सरम् ऋतुपशुभिर्यजते षड्भिर् आग्नेयैर्वसन्ते षड्भिर् ऐन्द्रैर्ग्रीष्मे षड्भिः पार्जन्यैर्वा मारुतैर्वा वर्षासु षड्भिर्मैत्रावरुणैः शरदि षड्भिर् ऐन्द्रावैष्णवैर्हेमन्ते षड्भिर् ऐन्द्राबार्हस्पत्यैः शिशिरे षड् ऋतवः संवत्सरः ऋतुष्वेव संवत्सरे प्रतितिष्ठति षट्त्रिंशद् एते पशवो भवन्ति षट्त्रिंशदक्षरा बृहती बृहत्याम् अधि स्वर्गो लोकः प्रतिष्ठितस्तद्व् अन्ततो बृहत्यैव छन्दसा स्वर्गे लोके प्रतितिष्ठति
athottaraṃ saṃvatsaram ṛtupaśubhiryajate ṣaḍbhir āgneyairvasante ṣaḍbhir aindrairgrīṣme ṣaḍbhiḥ pārjanyairvā mārutairvā varṣāsu ṣaḍbhirmaitrāvaruṇaiḥ śaradi ṣaḍbhir aindrāvaiṣṇavairhemante ṣaḍbhir aindrābārhaspatyaiḥ śiśire ṣaḍ ṛtavaḥ saṃvatsaraḥ ṛtuṣveva saṃvatsare pratitiṣṭhati ṣaṭtriṃśad ete paśavo bhavanti ṣaṭtriṃśadakṣarā bṛhatī bṛhatyām adhi svargo lokaḥ pratiṣṭhitastadv antato bṛhatyaiva chandasā svarge loke pratitiṣṭhati

