11 shlokas
- 1
अथातो वपानां होमः नानैव चरेयुर् आ वैश्वदेवस्य वपायै वैश्वदेवस्य वपायां हुतायां तद् अन्व् इतरा जुहुयुर् इति ह स्माह सत्यकामो जाबालो विश्वे वै सर्वे देवास्तद् एनान्यथादेवतम्प्रीणातीति
athāto vapānāṃ homaḥ nānaiva careyur ā vaiśvadevasya vapāyai vaiśvadevasya vapāyāṃ hutāyāṃ tad anv itarā juhuyur iti ha smāha satyakāmo jābālo viśve vai sarve devāstad enānyathādevatamprīṇātīti
- 2
ऐन्द्राग्नस्य वपायां हुतायाम्तदन्वितरा जुहुयुरिति ह स्माहतुः सौमापौ मानुतन्तव्याविन्द्राग्नी वै सर्वे देवास्तद् एवैनान्यथादेवतम्प्रीणातीति
aindrāgnasya vapāyāṃ hutāyāmtadanvitarā juhuyuriti ha smāhatuḥ saumāpau mānutantavyāvindrāgnī vai sarve devāstad evainānyathādevatamprīṇātīti
- 3
कायस्य वपायां हुतायाम्तदन्वितरा जुहुयुरिति ह स्माह शैलालिः प्रजापतिर्वै कः प्रजापतिम् उ वा अनु सर्वे देवास्तद् एवैनान्यथादेवतम्प्रीणातीति
kāyasya vapāyāṃ hutāyāmtadanvitarā juhuyuriti ha smāha śailāliḥ prajāpatirvai kaḥ prajāpatim u vā anu sarve devāstad evainānyathādevatamprīṇātīti
- 4
एकविंशतिं चातुर्मास्यदेवता अनुद्रुत्य एकविंशतिधा कृत्वा प्रचरेयुरिति ह स्माह भाल्लबेय एतावन्तो वै सर्वे देवा यावत्यश्चातुर्मास्यदेवतास्तद् एवैनान्यथादेवतम्प्रीणातीति
ekaviṃśatiṃ cāturmāsyadevatā anudrutya ekaviṃśatidhā kṛtvā pracareyuriti ha smāha bhāllabeya etāvanto vai sarve devā yāvatyaścāturmāsyadevatāstad evainānyathādevatamprīṇātīti
- 5
नानैव चरेयुः इतीन्द्रोतः शौनकः किमुत त्वरेरंस्तद् एवैनान्यथादेवतम्प्रीणातीत्य् एतद् अह तेषाम्वचो ऽन्या त्वेवात स्थितिः
nānaiva careyuḥ itīndrotaḥ śaunakaḥ kimuta tvareraṃstad evainānyathādevatamprīṇātīty etad aha teṣāmvaco 'nyā tvevāta sthitiḥ
- 6
अथ होवाच याज्ञवल्क्यः सकृदेव प्राजापत्याभिः प्रचरेयुः सकृद्देवदेवत्याभिस्तद् एवैनान्यथादेवतम्प्रीणात्यञ्जसा यज्ञस्य संस्थामुपैति न ह्वलतीति
atha hovāca yājñavalkyaḥ sakṛdeva prājāpatyābhiḥ pracareyuḥ sakṛddevadevatyābhistad evainānyathādevatamprīṇātyañjasā yajñasya saṃsthāmupaiti na hvalatīti
- 7
हुतासु वपासु प्रपद्याध्वर्यू रजतेन पात्रेण प्राजापत्यम्महिमानमुत्तरं ग्रहं गृह्णाति तस्य पुरोरुग्यः प्राणतो निमिषतो महित्वेति विपर्यस्ते याज्यानुवाक्ये अयातयामताया एष एव प्रैषो वषट्कृते जुहोति यस्ते रात्रौ संवत्सरे महिमा संबभूवेति नानुवषट्करोति तस्योक्तम्ब्राह्मणम्
hutāsu vapāsu prapadyādhvaryū rajatena pātreṇa prājāpatyammahimānamuttaraṃ grahaṃ gṛhṇāti tasya purorugyaḥ prāṇato nimiṣato mahitveti viparyaste yājyānuvākye ayātayāmatāyā eṣa eva praiṣo vaṣaṭkṛte juhoti yaste rātrau saṃvatsare mahimā saṃbabhūveti nānuvaṣaṭkaroti tasyoktambrāhmaṇam
- 8
नान्येषाम्पशूनां तेदन्या अवद्यन्ति अवद्यन्त्यश्वस्य दक्षिणतोऽन्येषाम्पशूनामवद्यन्त्युत्तरतोऽश्वस्य प्लक्षशाखास्वन्येषाम्पशूनामवद्यन्ति वेतसशाखास्वश्वस्य
nānyeṣāmpaśūnāṃ tedanyā avadyanti avadyantyaśvasya dakṣiṇato'nyeṣāmpaśūnāmavadyantyuttarato'śvasya plakṣaśākhāsvanyeṣāmpaśūnāmavadyanti vetasaśākhāsvaśvasya
- 9
तद् उ होवाच सात्ययज्ञिर् इतरथैव कुर्युः पथ एव नापोदित्यमिति पूर्वा त्वेव स्थितिर् उक्थ्यो यज्ञस्तेनान्तरिक्षलोकम् ऋध्नोति सर्वस्तोमो ऽतिरात्र उत्तममहर्भवति सर्वम्वै सर्वस्तोमो ऽतिरात्रः सर्वमश्वमेधः सर्वस्याप्त्यै सर्वस्यावरुद्ध्यै
tad u hovāca sātyayajñir itarathaiva kuryuḥ patha eva nāpodityamiti pūrvā tveva sthitir ukthyo yajñastenāntarikṣalokam ṛdhnoti sarvastomo 'tirātra uttamamaharbhavati sarvamvai sarvastomo 'tirātraḥ sarvamaśvamedhaḥ sarvasyāptyai sarvasyāvaruddhyai
- 10
तस्य त्रिवृद्बहिष्पवमानम्पञ्चदशान्याज्यानि सप्तदशो माध्यन्दिनः पवमान एकविंशानि पृष्ठानि त्रिनवस्तृतीयः पवमानस्त्रयस्त्रिंशम् अग्निष्टोमसामैकविंशान्य् उक्थान्य् एकविंशः षोडशी पञ्चदशी रात्रिस्त्रिवृत्सन्धिर्यद्द्वितीयस्याह्नः पृष्ठ्यस्य षडहस्य तच्छस्त्रम् अतिरात्रो यज्ञस्तेनामुं लोकम् ऋध्नोति
tasya trivṛdbahiṣpavamānampañcadaśānyājyāni saptadaśo mādhyandinaḥ pavamāna ekaviṃśāni pṛṣṭhāni trinavastṛtīyaḥ pavamānastrayastriṃśam agniṣṭomasāmaikaviṃśāny ukthāny ekaviṃśaḥ ṣoḍaśī pañcadaśī rātristrivṛtsandhiryaddvitīyasyāhnaḥ pṛṣṭhyasya ṣaḍahasya tacchastram atirātro yajñastenāmuṃ lokam ṛdhnoti
- 11
एकविंशतिः सवनीयाः पशवः सर्व आग्नेयास्तेषां समानं कर्मेत्य् उ हैक आहुश्चतुर्विंशतिम्त्वेवैतान्गव्यान् आलभेत्द्वादशभ्यो देवताभ्यो द्वादश मासाः संवत्सरः सर्वं संवत्सरः सर्वमश्वमेधः सर्वस्याप्त्यै सर्वस्यावरुद्ध्यै
ekaviṃśatiḥ savanīyāḥ paśavaḥ sarva āgneyāsteṣāṃ samānaṃ karmety u haika āhuścaturviṃśatimtvevaitāngavyān ālabhetdvādaśabhyo devatābhyo dvādaśa māsāḥ saṃvatsaraḥ sarvaṃ saṃvatsaraḥ sarvamaśvamedhaḥ sarvasyāptyai sarvasyāvaruddhyai

