9 shlokas
- 1
स तृतीयसवने सवनमुखीयेष्व् आहृतेषूपहवम् इच्छते
sa tṛtīyasavane savanamukhīyeṣv āhṛteṣūpahavam icchate
- 2
प्राणो मे होता स मोपह्वयतां होतर् उप मा ह्वयस्वेत्य् उच्चैः
अपानो मे ऽध्वर्युः स मोपह्वयताम् अध्वर्य उप मा ह्वयस्वेत्य् उच्चैः
व्यानो मे ब्रह्मा स मोपह्वयतां ब्रह्मन्न् उप मा ह्वयस्वेत्य् उच्चैः
समानो म उद्गाता स मोपह्वयताम् उद्गातर् उप मा ह्वयस्वेत्य् उच्चैः
prāṇo me hotā sa mopahvayatāṃ hotar upa mā hvayasvety uccaiḥ
apāno me 'dhvaryuḥ sa mopahvayatām adhvarya upa mā hvayasvety uccaiḥ
vyāno me brahmā sa mopahvayatāṃ brahmann upa mā hvayasvety uccaiḥ
samāno ma udgātā sa mopahvayatām udgātar upa mā hvayasvety uccaiḥ
- 3
यो ऽयम् अन्तःपुरुष आकाशः स मे सदस्यः स मोपह्वयतां सदस्योप मा ह्वयस्वेत्य् उच्चैः
या इमा अन्तःपुरुष आपस्ते मे होत्राशंसिनस्ते मोपह्वयन्तां होत्राशंसिन उप मा ह्वयध्वम् इत्य् उच्चैः
लोमानि मे चमसाध्वर्यवस्ते मोपह्वयन्तां चमसाध्वर्यव उप मा ह्वयध्वम् इत्य् उच्चैः
yo 'yam antaḥpuruṣa ākāśaḥ sa me sadasyaḥ sa mopahvayatāṃ sadasyopa mā hvayasvety uccaiḥ
yā imā antaḥpuruṣa āpaste me hotrāśaṃsinaste mopahvayantāṃ hotrāśaṃsina upa mā hvayadhvam ity uccaiḥ
lomāni me camasādhvaryavaste mopahvayantāṃ camasādhvaryava upa mā hvayadhvam ity uccaiḥ
- 4
ता वा एता देवता ऋत्विजाम् एव वाग्भिर् उपह्वयन्ते
tā vā etā devatā ṛtvijām eva vāgbhir upahvayante
- 5
स उपहूतो भक्षयति
sa upahūto bhakṣayati
- 6
स उदानो यजमानो ऽथो यत्रैतासां देवतानां लोकस्तद् उपहूतो भवति
sa udāno yajamāno 'tho yatraitāsāṃ devatānāṃ lokastad upahūto bhavati
- 7
सर्वेषां वै वषट्कर्ता चमसं भक्षयेत्
sarveṣāṃ vai vaṣaṭkartā camasaṃ bhakṣayet
- 8
देवानां वा एतद्यज्ञस्य मुखं यद् उद्गातृचमसम्तस्माद् उद्गातृचमसं नान्यो भक्षयेत्
devānāṃ vā etadyajñasya mukhaṃ yad udgātṛcamasamtasmād udgātṛcamasaṃ nānyo bhakṣayet
- 9
एवं विदुषो ह वै यज्ञो न व्यथते
एवं विदुषो ह वै यजमानस्य स्वर्ग्यं पुत्र्यं पशव्यम् इष्टं भवति
एवं विद्वान्ह वै यजमानो द्विषन्तं भ्रातृव्यम् अभिभवति
अथ वा अतो यज्ञे हीनं कुर्यात्
evaṃ viduṣo ha vai yajño na vyathate
evaṃ viduṣo ha vai yajamānasya svargyaṃ putryaṃ paśavyam iṣṭaṃ bhavati
evaṃ vidvānha vai yajamāno dviṣantaṃ bhrātṛvyam abhibhavati
atha vā ato yajñe hīnaṃ kuryāt

