15 shlokas
- 1
देवाश्च वा असुराश्चैषु लोकेष्व् अस्पर्धन्त
ते देवाः प्रजापतिम् उपाधावन्
devāśca vā asurāścaiṣu lokeṣv aspardhanta
te devāḥ prajāpatim upādhāvan
- 2
तेभ्य एतान्धुरः प्राणान्प्रायच्छत्
मनः प्रथमम् अथ प्राणम् अथ चक्षुर् अथ श्रोत्रम् अथ वाचम्
tebhya etāndhuraḥ prāṇānprāyacchat
manaḥ prathamam atha prāṇam atha cakṣur atha śrotram atha vācam
- 3
ताभ्यः पञ्चभ्यो धूर्भ्यः पुरुषं च पशूंश्च निरमिमीत
tābhyaḥ pañcabhyo dhūrbhyaḥ puruṣaṃ ca paśūṃśca niramimīta
- 4
तेन पुरुषेणासुरान् अधूर्वन्
यद् अधूर्वंस्तद्धुरां धूस्त्वम्
धूर्वति पाप्मानं भ्रातृव्यं य एवं वेद
tena puruṣeṇāsurān adhūrvan
yad adhūrvaṃstaddhurāṃ dhūstvam
dhūrvati pāpmānaṃ bhrātṛvyaṃ ya evaṃ veda
- 5
यो वै धुरां धूस्त्वं वेद धुरा धुरा भ्रातृव्याद्वसीयान्भवति
एतद्वै धुरां धूस्त्वं यन्नानावीर्या नानारूपा नानाछन्दस्या नानादेवत्याः समानं हिंकारम् अभिसंपद्यन्ते
एतद्वै धुरां धूस्त्वम्
धुरा धुरा भ्रातृव्याद्वसीयान्भवति
य एवं वेद
yo vai dhurāṃ dhūstvaṃ veda dhurā dhurā bhrātṛvyādvasīyānbhavati
etadvai dhurāṃ dhūstvaṃ yannānāvīryā nānārūpā nānāchandasyā nānādevatyāḥ samānaṃ hiṃkāram abhisaṃpadyante
etadvai dhurāṃ dhūstvam
dhurā dhurā bhrātṛvyādvasīyānbhavati
ya evaṃ veda
- 6
यो वै धूर्षु महाव्रतं वेद सर्वा अस्मिन्पुण्या वाचो वदन्ति
yo vai dhūrṣu mahāvrataṃ veda sarvā asminpuṇyā vāco vadanti
- 7
शिरो गायत्र्य् उरस्त्रिष्टुप्मध्यं जगती पादाव् अनुष्टुप्सर्वा अस्मिन्पुण्या वाचो वदन्ति य एवं वेद
śiro gāyatry urastriṣṭupmadhyaṃ jagatī pādāv anuṣṭupsarvā asminpuṇyā vāco vadanti ya evaṃ veda
- 8
यो वा एवं धुरो विद्वान् अथासां व्रतं चरत्य् आगमिष्यतो ऽस्य पूर्वेद्युः पुण्या कीर्तिर् आगच्छति
yo vā evaṃ dhuro vidvān athāsāṃ vrataṃ caraty āgamiṣyato 'sya pūrvedyuḥ puṇyā kīrtir āgacchati
- 9
सुरभिर् एव गन्धो गायत्र्या व्रतम्
दर्शनीयं त्रिष्टुभः
श्रवणीयं जगत्याः
यद् एव वाचा पुण्यं वदति तद् अनुष्टुभः
तद् उ सर्वासां व्रतम्
surabhir eva gandho gāyatryā vratam
darśanīyaṃ triṣṭubhaḥ
śravaṇīyaṃ jagatyāḥ
yad eva vācā puṇyaṃ vadati tad anuṣṭubhaḥ
tad u sarvāsāṃ vratam
- 10
तद् उ विद्वांसम् आहुर् अति नो ऽवादीर् इति तद् अनादृत्यम्
tad u vidvāṃsam āhur ati no 'vādīr iti tad anādṛtyam
- 11
यस्य वै धुरो विगीतास्तस्य संगीताः
yasya vai dhuro vigītāstasya saṃgītāḥ
- 12
यस्य वा एता बहिष्पवमाने विगीयान्तराज्येषु संगायन्ति तस्य वै धुरो विगीतास्तस्य संगीताः
yasya vā etā bahiṣpavamāne vigīyāntarājyeṣu saṃgāyanti tasya vai dhuro vigītāstasya saṃgītāḥ
- 13
यः कामयेतैकधा यजमानं यश ऋच्छेद्यथादिष्टं प्रजाः स्युर् इति होतुर् आज्ये गायेत्
एकधा यजमानं यश ऋच्छति यथादिष्टं प्रजा भवन्ति
yaḥ kāmayetaikadhā yajamānaṃ yaśa ṛcchedyathādiṣṭaṃ prajāḥ syur iti hotur ājye gāyet
ekadhā yajamānaṃ yaśa ṛcchati yathādiṣṭaṃ prajā bhavanti
- 14
यः कामयेत कल्पेरन्प्रजा यथादिष्टं यजमानः स्याद् इति यथाज्यं गायेत्
कल्पन्ते प्रजा यथादिष्टं यजमानो भवति
yaḥ kāmayeta kalperanprajā yathādiṣṭaṃ yajamānaḥ syād iti yathājyaṃ gāyet
kalpante prajā yathādiṣṭaṃ yajamāno bhavati
- 15
यो वा एवं धुरो वेदानपजय्यम् आत्मने च यजमानाय च लोकं जयत्य् अति यजमानम् आत्मानं मृत्युं परं स्वर्गं लोकं हरति
yo vā evaṃ dhuro vedānapajayyam ātmane ca yajamānāya ca lokaṃ jayaty ati yajamānam ātmānaṃ mṛtyuṃ paraṃ svargaṃ lokaṃ harati

