11 shlokas
- 1
स प्रातःसवने सवनमुखीयेष्व् आहृतेषूपहवम् इच्छते
sa prātaḥsavane savanamukhīyeṣv āhṛteṣūpahavam icchate
- 2
अग्निर्मे होता स मोपह्वयतां होतर् उप मा ह्वयस्वेत्य् उच्चैः
agnirme hotā sa mopahvayatāṃ hotar upa mā hvayasvety uccaiḥ
- 3
आदित्यो मे ऽध्वर्युः स मोपह्वयताम् अध्वर्य उप मा ह्वयस्वेत्य् उच्चैः
ādityo me 'dhvaryuḥ sa mopahvayatām adhvarya upa mā hvayasvety uccaiḥ
- 4
चन्द्रमा मे ब्रह्मा स मोपह्वयतां ब्रह्मन्न् उप मा ह्वयस्वेत्य् उच्चैः
candramā me brahmā sa mopahvayatāṃ brahmann upa mā hvayasvety uccaiḥ
- 5
पर्जन्यो म उद्गाता स मोपह्वयताम् उद्गातर् उप मा ह्वयस्वेत्य् उच्चैः
parjanyo ma udgātā sa mopahvayatām udgātar upa mā hvayasvety uccaiḥ
- 6
आकाशो मे सदस्यः स मोपह्वयतां सदस्योप मा ह्वयस्वेत्य् उच्चैः
ākāśo me sadasyaḥ sa mopahvayatāṃ sadasyopa mā hvayasvety uccaiḥ
- 7
आपो मे होत्राशंसिनस्ते मोपह्वयन्तां होत्राशंसिन उप मा ह्वयध्वम् इत्य् उच्चैः
āpo me hotrāśaṃsinaste mopahvayantāṃ hotrāśaṃsina upa mā hvayadhvam ity uccaiḥ
- 8
रश्मयो मे चमसाध्वर्यवस्ते मोपह्वयन्तां चमसाध्वर्यव उप मा ह्वयध्वम् इत्य् उच्चैः
raśmayo me camasādhvaryavaste mopahvayantāṃ camasādhvaryava upa mā hvayadhvam ity uccaiḥ
- 9
ता वा एता देवता ऋत्विजाम् एव वाग्भिर् उपह्वयन्ते
tā vā etā devatā ṛtvijām eva vāgbhir upahvayante
- 10
स उपहूतो भक्षयति
sa upahūto bhakṣayati
- 11
प्राणो यजमानो ऽथो यत्रैतासां देवतानां लोकस्तद् उपहूतो भवति
prāṇo yajamāno 'tho yatraitāsāṃ devatānāṃ lokastad upahūto bhavati

