16 shlokas
- 1
अथातः प्रायश्चित्तानाम्
athātaḥ prāyaścittānām
- 2
अनादेशे मन्त्रा बलवन्तस्तपोऽन्विताः पावना भवन्ति
anādeśe mantrā balavantastapo'nvitāḥ pāvanā bhavanti
- 3
आपन्नः प्रायश्चित्तं चरेत्
āpannaḥ prāyaścittaṃ caret
- 4
अभ्यासः साम्नां शतं दशावरम्
abhyāsaḥ sāmnāṃ śataṃ daśāvaram
- 5
काहलम् उक्त्वा दधिक्राव्णो अकारिषम् इत्य् एतद्गायेत्
kāhalam uktvā dadhikrāvṇo akāriṣam ity etadgāyet
- 6
परुषम् उक्त्वेदं विष्णुर्विचक्रम इति
paruṣam uktvedaṃ viṣṇurvicakrama iti
- 7
ब्राह्मणम् उक्त्वा त्रिः
brāhmaṇam uktvā triḥ
- 8
भ्रातरं मातुलं पितृव्यम् इति गुरुजातीयान्प्रसाद्य पक्षिणीं रात्रिम् उपोष्य तवाहं सोम रारणेति प्रथमम् एकविंशतिकृत्वः
bhrātaraṃ mātulaṃ pitṛvyam iti gurujātīyānprasādya pakṣiṇīṃ rātrim upoṣya tavāhaṃ soma rāraṇeti prathamam ekaviṃśatikṛtvaḥ
- 9
उपाध्यायं मातरं पितरम् इत्य् एतेषु त्रिरात्रम् उपवसेन्नेतरस्यैवान्त्यम्
upādhyāyaṃ mātaraṃ pitaram ity eteṣu trirātram upavasennetarasyaivāntyam
- 10
अनध्याप्यम् अध्याप्य सप्तरात्रम् उपवसन्सदा गावः शुचयो विश्वधायस इत्य् एतद्गायेत्
anadhyāpyam adhyāpya saptarātram upavasansadā gāvaḥ śucayo viśvadhāyasa ity etadgāyet
- 11
अयाज्ययाजने दक्षिणास्त्यक्त्वा मासं चतुर्थे काले भुञ्जानः कानीत्य् एतद्गायेत्
ayājyayājane dakṣiṇāstyaktvā māsaṃ caturthe kāle bhuñjānaḥ kānīty etadgāyet
- 12
अमेध्यदर्शने ये ते पन्था अधो दिव इति
तथामेध्यघ्राणे
amedhyadarśane ye te panthā adho diva iti
tathāmedhyaghrāṇe
- 13
अभोज्यभोजने ऽमेध्यप्राशने वा निष्पुरीषीभावस्त्रिरात्रावरं तूपवसन्नेतो न्व् इन्द्रं स्तवाम शुद्धम् इति पूर्वं सदा सहस्रकृत्व आवर्तयन्
abhojyabhojane 'medhyaprāśane vā niṣpurīṣībhāvastrirātrāvaraṃ tūpavasanneto nv indraṃ stavāma śuddham iti pūrvaṃ sadā sahasrakṛtva āvartayan
- 14
बहून्य् अप्य् उपपतनीयानि कृत्वा त्रिभिर् अनश्नत्पारायणैः पूतो भवति
bahūny apy upapatanīyāni kṛtvā tribhir anaśnatpārāyaṇaiḥ pūto bhavati
- 15
सुरां पीत्वा संवत्सरम् अष्टमे काले भुञ्जानो यत्पाण्योः सम्भवेद् अवाङ्नाभ्य् ऊर्ध्वंजानु परिहितस्त्रिर् अह्न उपस्पृशंस्तथा रात्रौ स्थानासनाभ्यां पवित्रं त इत्य् उत्तरेणाहोरात्राणि जपन्ग्रामद्वारे स्थानासनभोजनानि यत्र लभेत्तत्र वसेन्न प्रवसेत्
स्वकर्मणाभिभाषेत
चतुर्णां ब्राह्मणानाम् अग्रतः प्राश्नीयात्
ग्रामद्वारस्यैवाग्रत आवश्यकायाभिक्रामेत्
अतो ऽन्यथा शङ्क्यम्
पूर्णे संवत्सरे तैलं लवणं क्षुरम् अग्निं गां बीजानीत्य् आलब्धवन्तं ब्राह्मणा ब्रूयुश्चरितं तवेत्य् ओम्भो इति ब्रूयात्सप्तावरान्सप्त परान्हन्त्य् अनृतं चरितं तव सुचरितं तवेत्य् ओम्भो इति ब्रूयात्
अत ऊर्ध्वं केशश्मश्रुलोमनखानि वापयित्वाहतं वसनं परिधाय ब्राह्मणान्स्वस्ति वाचयित्वा पूतो भवति
surāṃ pītvā saṃvatsaram aṣṭame kāle bhuñjāno yatpāṇyoḥ sambhaved avāṅnābhy ūrdhvaṃjānu parihitastrir ahna upaspṛśaṃstathā rātrau sthānāsanābhyāṃ pavitraṃ ta ity uttareṇāhorātrāṇi japangrāmadvāre sthānāsanabhojanāni yatra labhettatra vasenna pravaset
svakarmaṇābhibhāṣeta
caturṇāṃ brāhmaṇānām agrataḥ prāśnīyāt
grāmadvārasyaivāgrata āvaśyakāyābhikrāmet
ato 'nyathā śaṅkyam
pūrṇe saṃvatsare tailaṃ lavaṇaṃ kṣuram agniṃ gāṃ bījānīty ālabdhavantaṃ brāhmaṇā brūyuścaritaṃ tavety ombho iti brūyātsaptāvarānsapta parānhanty anṛtaṃ caritaṃ tava sucaritaṃ tavety ombho iti brūyāt
ata ūrdhvaṃ keśaśmaśrulomanakhāni vāpayitvāhataṃ vasanaṃ paridhāya brāhmaṇānsvasti vācayitvā pūto bhavati
- 16
एतेन कल्पेन भ्रूणहा पूर्वम् एतेन ब्रह्महा शुद्धाशुद्धीयम् उत्तरम् एतेन सुवर्णस्तेनो ऽभित्रिपृष्ठम् इत्य् अभि त्रिपृष्ठम् इति
etena kalpena bhrūṇahā pūrvam etena brahmahā śuddhāśuddhīyam uttaram etena suvarṇasteno 'bhitripṛṣṭham ity abhi tripṛṣṭham iti

