15 shlokas
- 1
तद् आहुर्नामुष्मिन्लोके सहस्रस्यावकाशो ऽस्ति
tad āhurnāmuṣminloke sahasrasyāvakāśo 'sti
- 2
आत्मने वैव न वात्मने चनेति
ātmane vaiva na vātmane caneti
- 3
तद् आहुः कियद् इत स्वर्गो लोक इति
tad āhuḥ kiyad ita svargo loka iti
- 4
यावत्सहस्रं गौर्गव्य् अधि प्रतिष्ठिता तावद् इति ब्रूयात्
yāvatsahasraṃ gaurgavy adhi pratiṣṭhitā tāvad iti brūyāt
- 5
अथो यावत्सहस्रं प्राणैः सं प्राणन्तीत्य् अथो यावत्सहस्रम् आश्वीनानीत्य् अथो यावत्सहस्रं योजनानीत्य् अथो यावत्सहस्रम् अह्न्यानीति
atho yāvatsahasraṃ prāṇaiḥ saṃ prāṇantīty atho yāvatsahasram āśvīnānīty atho yāvatsahasraṃ yojanānīty atho yāvatsahasram ahnyānīti
- 6
तद्गवा गवैवाप्नोति
tadgavā gavaivāpnoti
- 7
सा यैषा शबली पष्ठौह्य् उपैनम् एषामुष्मिन्लोके कामदुघा भूत्वा तिष्ठते य एवं वेद
sā yaiṣā śabalī paṣṭhauhy upainam eṣāmuṣminloke kāmadughā bhūtvā tiṣṭhate ya evaṃ veda
- 8
तार्प्यं प्रत्यस्य दक्षिणा नयति सहस्रस्य सयोनितायै
tārpyaṃ pratyasya dakṣiṇā nayati sahasrasya sayonitāyai
- 9
सहस्रं वै यद् असृजत तस्य तार्प्यम् एव योनिर् आसीत्
sahasraṃ vai yad asṛjata tasya tārpyam eva yonir āsīt
- 10
तद्यत्तार्प्यं प्रत्यस्य स दक्षिणा नयति सयोन्य् एव तत्सहस्रं करोति
tadyattārpyaṃ pratyasya sa dakṣiṇā nayati sayony eva tatsahasraṃ karoti
- 11
उप हैनं सहस्रं ददिवांसं सयोनिसहस्रं तिष्ठते य एवं वेद
upa hainaṃ sahasraṃ dadivāṃsaṃ sayonisahasraṃ tiṣṭhate ya evaṃ veda
- 12
सा या सहस्रतमी स्यात्तस्यै कर्णम् आजपेद् इडे रन्ते महि विश्रुति शुक्रे चन्द्रे हव्ये काम्ये ऽदिते सरस्वत्य् एतानि ते ऽघ्न्ये नामानि देवेषु नः सुकृतो ब्रूताद् इति
sā yā sahasratamī syāttasyai karṇam ājaped iḍe rante mahi viśruti śukre candre havye kāmye 'dite sarasvaty etāni te 'ghnye nāmāni deveṣu naḥ sukṛto brūtād iti
- 13
सुकृतं ह वा एनं देवेष्व् आह
sukṛtaṃ ha vā enaṃ deveṣv āha
- 14
ताम्कलशम् अपघ्रापयत्य् अपजिघ्र कलशं मह्या त्वा विशन्त्व् इन्दवः सा नो धुक्षः सहस्रम् उरुधारा पयस्वतीति
tāmkalaśam apaghrāpayaty apajighra kalaśaṃ mahyā tvā viśantv indavaḥ sā no dhukṣaḥ sahasram urudhārā payasvatīti
- 15
उप हैनं सहस्रं ददिवांसं सहस्रं तिष्ठते य एवं वेद
upa hainaṃ sahasraṃ dadivāṃsaṃ sahasraṃ tiṣṭhate ya evaṃ veda

