18 shlokas
- 1
तद् आहुः कां देवतां दीक्षमाणा अनुनिषीदन्ति काम् अनूत्तिष्ठन्तीति
tad āhuḥ kāṃ devatāṃ dīkṣamāṇā anuniṣīdanti kām anūttiṣṭhantīti
- 2
स ब्रूयाद् अग्निं देवतानां दीक्षमाणा अनुनिषीदन्त्य् आदित्यम् अनूत्तिष्ठन्तीति
sa brūyād agniṃ devatānāṃ dīkṣamāṇā anuniṣīdanty ādityam anūttiṣṭhantīti
- 3
तस्माद्दीक्षितान्सत आहुर् आसत इति यद्य् अपि ते शयीरन्न् अथोत्तिष्ठेयुः
tasmāddīkṣitānsata āhur āsata iti yady api te śayīrann athottiṣṭheyuḥ
- 4
अग्निर्हि देवानाम् आसीनानां श्रेष्ठः
agnirhi devānām āsīnānāṃ śreṣṭhaḥ
- 5
अग्निदेवत्या हि तर्हि भवन्ति
agnidevatyā hi tarhi bhavanti
- 6
तस्माद् उत्थितान्सत आहुर् उदस्थुर् इति यद्य् अपि त आसीरन्न् अथो शयीरन्
tasmād utthitānsata āhur udasthur iti yady api ta āsīrann atho śayīran
- 7
आदित्यो हि देवानाम् उत्थितानां श्रेष्ठः
ādityo hi devānām utthitānāṃ śreṣṭhaḥ
- 8
आदित्यदेवत्या हि तर्हि भवन्ति
ādityadevatyā hi tarhi bhavanti
- 9
तद् आहुः के भूत्वोत्तिष्ठन्तीति
tad āhuḥ ke bhūtvottiṣṭhantīti
- 10
स ब्रूयान्मनुष्या भूता दीक्षन्ते देवा भूत्वोत्तिष्ठन्तीति
sa brūyānmanuṣyā bhūtā dīkṣante devā bhūtvottiṣṭhantīti
- 11
त एतद् ऋग्रेतसं यजूरेतसं ब्रह्मणि योनौ रेतो दधतो यन्ति
ta etad ṛgretasaṃ yajūretasaṃ brahmaṇi yonau reto dadhato yanti
- 12
अग्नाव् एव तद् आहुतीभिर् अभिजुह्वतो यन्ति
agnāv eva tad āhutībhir abhijuhvato yanti
- 13
तस्माद्दीक्षोपसत्सु वीव ग्लायन्ति
tasmāddīkṣopasatsu vīva glāyanti
- 14
तरुणम् इव तर्हि रेतो भवति
taruṇam iva tarhi reto bhavati
- 15
तस्माद् उ स्त्री दुर्हृदिनी वीव ग्लायति
tasmād u strī durhṛdinī vīva glāyati
- 16
तरुणम् इव हि तर्हि रेतो भवति
taruṇam iva hi tarhi reto bhavati
- 17
तान्स्तुतिशस्त्रैस्त्रिर्वर्धयन्तो ऽभिशृण्वन्तो यन्ति
tānstutiśastraistrirvardhayanto 'bhiśṛṇvanto yanti
- 18
तस्माद्गर्भा अनश्नतः सम्भवन्ति
tasmādgarbhā anaśnataḥ sambhavanti

