130 shlokas
- 1
सशैलवनधात्रीणां यथाधारोऽहिनायकः
सर्वेषां योगतन्त्राणां तथाधारो हि कुण्डली
saśailavanadhātrīṇāṃ yathādhāro'hināyakaḥ
sarveṣāṃ yogatantrāṇāṃ tathādhāro hi kuṇḍalī
- 2
सुप्ता गुरुप्रसादेन यदा जागर्ति कुण्डली
तदा सर्वाणि पद्मानि भिद्यन्ते ग्रन्थयोऽपि च
suptā guruprasādena yadā jāgarti kuṇḍalī
tadā sarvāṇi padmāni bhidyante granthayo'pi ca
- 3
प्राणस्य शून्यपदवी तदा राजपथायते
तदा चित्तं निरालम्बं तदा कालस्य वञ्चनम्
prāṇasya śūnyapadavī tadā rājapathāyate
tadā cittaṃ nirālambaṃ tadā kālasya vañcanam
- 4
सुषुम्णा शून्यपदवी ब्रह्मरन्ध्रः महापथः
श्मशानं शाम्भवी मध्यमार्गश्चेत्य् एकवाचकाः
suṣumṇā śūnyapadavī brahmarandhraḥ mahāpathaḥ
śmaśānaṃ śāmbhavī madhyamārgaścety ekavācakāḥ
- 5
तस्मात्सर्वप्रयत्नेन प्रबोधयितुम् ईश्वरीम्
ब्रह्मद्वारमुखे सुप्तां मुद्राभ्यासं समाचरेत्
tasmātsarvaprayatnena prabodhayitum īśvarīm
brahmadvāramukhe suptāṃ mudrābhyāsaṃ samācaret
- 6
महामुद्रा महाबन्धो महावेधश्च खेचरी
उड्डीयानं मूलबन्धश्च बन्धो जालंधराभिधः
mahāmudrā mahābandho mahāvedhaśca khecarī
uḍḍīyānaṃ mūlabandhaśca bandho jālaṃdharābhidhaḥ
- 7
करणी विपरीताख्या वज्रोली शक्तिचालनम्
इदं हि मुद्रादशकं जरामरणनाशनम्
karaṇī viparītākhyā vajrolī śakticālanam
idaṃ hi mudrādaśakaṃ jarāmaraṇanāśanam
- 8
आदिनाथोदितं दिव्यम् अष्टैश्वर्यप्रदायकम्
वल्लभं सर्वसिद्धानां दुर्लभं मरुताम् अपि
ādināthoditaṃ divyam aṣṭaiśvaryapradāyakam
vallabhaṃ sarvasiddhānāṃ durlabhaṃ marutām api
- 9
गोपनीयं प्रयत्नेन यथा रत्नकरण्डकम्
कस्यचिन्नैव वक्तव्यं कुलस्त्रीसुरतं यथा
gopanīyaṃ prayatnena yathā ratnakaraṇḍakam
kasyacinnaiva vaktavyaṃ kulastrīsurataṃ yathā
- 10
पादमूलेन वामेन योनिं संपीड्य दक्षिणाम्
प्रसारितं पदं कृत्वा कराभ्यां धारयेद्दृढम्
pādamūlena vāmena yoniṃ saṃpīḍya dakṣiṇām
prasāritaṃ padaṃ kṛtvā karābhyāṃ dhārayeddṛḍham
- 11
कण्ठे बन्धं समारोप्य धारयेद्वायुम् ऊर्ध्वतः
यथा दण्डहतः सर्पो दण्डाकारः प्रजायते
kaṇṭhe bandhaṃ samāropya dhārayedvāyum ūrdhvataḥ
yathā daṇḍahataḥ sarpo daṇḍākāraḥ prajāyate
- 12
ऋज्वी भूता तथा शक्तिः कुण्डली सहसा भवेत्
तदा सा मरणावस्था जायते द्विपुटाश्रया
ṛjvī bhūtā tathā śaktiḥ kuṇḍalī sahasā bhavet
tadā sā maraṇāvasthā jāyate dvipuṭāśrayā
- 13
ततः शनैः शनैर् एव रेचयेन्नैव वेगतः
महामुद्रां च तेनैव वदन्ति विबुधोत्तमाः
tataḥ śanaiḥ śanair eva recayennaiva vegataḥ
mahāmudrāṃ ca tenaiva vadanti vibudhottamāḥ
- 14
इयं खलु महामुद्रा महासिद्धैः प्रदर्शिता
महाक्लेशादयो दोषाः क्षीयन्ते मरणादयः
महामुद्रां च तेनैव वदन्ति विबुधोत्तमाः
iyaṃ khalu mahāmudrā mahāsiddhaiḥ pradarśitā
mahākleśādayo doṣāḥ kṣīyante maraṇādayaḥ
mahāmudrāṃ ca tenaiva vadanti vibudhottamāḥ
- 15
चन्द्राङ्गे तु समभ्यस्य सूर्याङ्गे पुनर् अभ्यसेत्
यावत्तुल्या भवेत्संख्या ततो मुद्रां विसर्जयेत्
candrāṅge tu samabhyasya sūryāṅge punar abhyaset
yāvattulyā bhavetsaṃkhyā tato mudrāṃ visarjayet
- 16
न हि पथ्यम् अपथ्यं वा रसाः सर्वेऽपि नीरसाः
अपि भुक्तं विषं घोरं पीयूषम् अपि जीर्यति
na hi pathyam apathyaṃ vā rasāḥ sarve'pi nīrasāḥ
api bhuktaṃ viṣaṃ ghoraṃ pīyūṣam api jīryati
- 17
क्षयकुष्ठगुदावर्तगुल्माजीर्णपुरोगमाः
तस्य दोषाः क्षयं यान्ति महामुद्रां तु यो ऽभ्यसेत्
kṣayakuṣṭhagudāvartagulmājīrṇapurogamāḥ
tasya doṣāḥ kṣayaṃ yānti mahāmudrāṃ tu yo 'bhyaset
- 18
कथितेयं महामुद्रा महासिद्धिकरा नॄणाम्
गोपनीया प्रयत्नेन न देया यस्य कस्यचित्
kathiteyaṃ mahāmudrā mahāsiddhikarā nṝṇām
gopanīyā prayatnena na deyā yasya kasyacit
- 19
पार्ष्णिं वामस्य पादस्य योनिस्थाने नियोजयेत्
वामोरूपरि संस्थाप्य दक्षिणं चरणं तथा
pārṣṇiṃ vāmasya pādasya yonisthāne niyojayet
vāmorūpari saṃsthāpya dakṣiṇaṃ caraṇaṃ tathā
- 20
पूरयित्वा ततो वायुं हृदये चुबुकं दृढम्
निष्पीड्यं वायुम् आकुञ्च्य मनोमध्ये नियोजयेत्
pūrayitvā tato vāyuṃ hṛdaye cubukaṃ dṛḍham
niṣpīḍyaṃ vāyum ākuñcya manomadhye niyojayet
- 21
धारयित्वा यथाशक्ति रेचयेद् अनिलं शनैः
सव्याङ्गे तु समभ्यस्य दक्षाङ्गे पुनर् अभ्यसेत्
dhārayitvā yathāśakti recayed anilaṃ śanaiḥ
savyāṅge tu samabhyasya dakṣāṅge punar abhyaset
- 22
मतम् अत्र तु केषांचित्कण्ठबन्धं विवर्जयेत्
राजदन्तस्थजिह्वाया बन्धः शस्तो भवेद् इति
matam atra tu keṣāṃcitkaṇṭhabandhaṃ vivarjayet
rājadantasthajihvāyā bandhaḥ śasto bhaved iti
- 23
अयं तु सर्वनाडीनाम् ऊर्ध्वं गतिनिरोधकः
अयं खलु महाबन्धो महासिद्धिप्रदायकः
ayaṃ tu sarvanāḍīnām ūrdhvaṃ gatinirodhakaḥ
ayaṃ khalu mahābandho mahāsiddhipradāyakaḥ
- 24
कालपाशमहाबन्धविमोचनविचक्षणः
त्रिवेणीसंगमं धत्ते केदारं प्रापयेन्मनः
kālapāśamahābandhavimocanavicakṣaṇaḥ
triveṇīsaṃgamaṃ dhatte kedāraṃ prāpayenmanaḥ
- 25
रूपलावण्यसम्पन्ना यथा स्त्री पुरुषं विना
महामुद्रामहाबन्धौ निष्फलौ वेधवर्जितौ
rūpalāvaṇyasampannā yathā strī puruṣaṃ vinā
mahāmudrāmahābandhau niṣphalau vedhavarjitau
- 26
महाबन्धस्थितो योगी कृत्वा पूरकम् एकधीः
वायूनां गतिम् आवृत्य निभृतं कण्ठमुद्रया
mahābandhasthito yogī kṛtvā pūrakam ekadhīḥ
vāyūnāṃ gatim āvṛtya nibhṛtaṃ kaṇṭhamudrayā
- 27
समहस्तयुगो भूमौ स्फिचौ संताडयेच्छनैः
पुटद्वयम् अतिक्रम्य वायुः स्फुरति मध्यगः
samahastayugo bhūmau sphicau saṃtāḍayecchanaiḥ
puṭadvayam atikramya vāyuḥ sphurati madhyagaḥ
- 28
सोमसूर्याग्निसम्बन्धो जायते चामृताय वै
मृतावस्था समुत्पन्ना ततो वायुं विरेचयेत्
somasūryāgnisambandho jāyate cāmṛtāya vai
mṛtāvasthā samutpannā tato vāyuṃ virecayet
- 29
महावेधोऽयम् अभ्यासान्महासिद्धिप्रदायकः
वलीपलितवेपघ्नः सेव्यते साधकोत्तमैः
mahāvedho'yam abhyāsānmahāsiddhipradāyakaḥ
valīpalitavepaghnaḥ sevyate sādhakottamaiḥ
- 30
एतत्त्रयं महागुह्यं जरामृत्युविनाशनम्
वह्निवृद्धिकरं चैव ह्य् अणिमादिगुणप्रदम्
etattrayaṃ mahāguhyaṃ jarāmṛtyuvināśanam
vahnivṛddhikaraṃ caiva hy aṇimādiguṇapradam

