22 shlokas
- 1
पूर्वं नाराशंसं भक्षयित्वाहवनीये प्रस्तोता पृष्ठहोमं जुहुयाद्यत्पृष्ठं स्यात्तद् आदिश्यादः पिबतु सोम्यं मध्व् आयुर्दधद्यज्ञपताव् अविहृतम् इमं यज्ञम् अभिसंवसाना होत्रास्तृप्यन्तु सुमनस्यमानाः स्वाहेति पूर्वाम्
pūrvaṃ nārāśaṃsaṃ bhakṣayitvāhavanīye prastotā pṛṣṭhahomaṃ juhuyādyatpṛṣṭhaṃ syāttad ādiśyādaḥ pibatu somyaṃ madhv āyurdadhadyajñapatāv avihṛtam imaṃ yajñam abhisaṃvasānā hotrāstṛpyantu sumanasyamānāḥ svāheti pūrvām
- 2
स्वाहाकारेणोत्तराम्
svāhākāreṇottarām
- 3
द्वैधं जुहुयाद् इति धानंजय्यः
dvaidhaṃ juhuyād iti dhānaṃjayyaḥ
- 4
अदः पिबतु सोम्यं मध्व् आयुर्दधद्यज्ञपताव् अविहृतं स्वाहेति पूर्वाम्
adaḥ pibatu somyaṃ madhv āyurdadhadyajñapatāv avihṛtaṃ svāheti pūrvām
- 5
इमं यज्ञम् इत्य् उत्तरां होतृकपृष्ठेभ्य इति
imaṃ yajñam ity uttarāṃ hotṛkapṛṣṭhebhya iti
- 6
रेवतीषु वारवन्तीयम् इति षष्ठे पृष्ठादेशं गौतमः
revatīṣu vāravantīyam iti ṣaṣṭhe pṛṣṭhādeśaṃ gautamaḥ
- 7
महाव्रतम् इति व्रते
mahāvratam iti vrate
- 8
रेवत्यश्च वारवन्तीयं चेति धानंजय्यः
revatyaśca vāravantīyaṃ ceti dhānaṃjayyaḥ
- 9
यावन्ति पृष्ठस्थानानि स्युः सर्वाण्य् एव प्रसंचक्षीत
yāvanti pṛṣṭhasthānāni syuḥ sarvāṇy eva prasaṃcakṣīta
- 10
पिबतु दधद् इति च यथार्थम् ऊहेत्
pibatu dadhad iti ca yathārtham ūhet
- 11
बृहता रथन्तरेण वा स्तोष्यमाणः प्राक्स्तोमयोगाद्दश व्याहृतीर्मनसा ध्यायेद् ऐरम् इति
bṛhatā rathantareṇa vā stoṣyamāṇaḥ prākstomayogāddaśa vyāhṛtīrmanasā dhyāyed airam iti
- 12
रथन्तर एवर्चं यस्ते गोष्व् इति
rathantara evarcaṃ yaste goṣv iti
- 13
युक्त्वा स्तोमम् एतद्ब्रूयाद् इति शाण्डिल्य ऋचं पूर्वं व्याहृतिभ्य इति
yuktvā stomam etadbrūyād iti śāṇḍilya ṛcaṃ pūrvaṃ vyāhṛtibhya iti
- 14
इतरद्धानंजय्यः
itaraddhānaṃjayyaḥ
- 15
रथन्तरे प्रस्तूयमाने सर्वत्र संमीलेत्
rathantare prastūyamāne sarvatra saṃmīlet
- 16
एकैकं मनसाक्षरं स्तोभैर्वाचा युगपत्संयुञ्ज्याद्भकारादिभिर् अकारान्तैर् अक्रान्तैः प्रथमस्वरैर् उत्तमो द्वितीयस्वरः प्राक्प्रतिहाराच्चतुरक्षरं शिष्ट्वा
ekaikaṃ manasākṣaraṃ stobhairvācā yugapatsaṃyuñjyādbhakārādibhir akārāntair akrāntaiḥ prathamasvarair uttamo dvitīyasvaraḥ prākpratihārāccaturakṣaraṃ śiṣṭvā
- 17
तत्सर्वत्र प्रतिवीक्षेत
tatsarvatra prativīkṣeta
- 18
स्तुत्वा वरं चोदयेत्
stutvā varaṃ codayet
- 19
तस्यापृष्ठस्य सतो निवर्तेरन्धर्माः सह स्तोभैर् इति गौतमः
tasyāpṛṣṭhasya sato nivarterandharmāḥ saha stobhair iti gautamaḥ
- 20
स्तोभा एवान्वीयुर् इति धानंजय्यः
stobhā evānvīyur iti dhānaṃjayyaḥ
- 21
अग्निष्टोमसामसंधिषाम्नोर् एवापृष्ठं स्तोभेद् इति शाण्डिल्यः
agniṣṭomasāmasaṃdhiṣāmnor evāpṛṣṭhaṃ stobhed iti śāṇḍilyaḥ
- 22
सर्वत्रास्वस्तोत्रीयं न स्तोभेद् इति स्थविरो गौतमः
sarvatrāsvastotrīyaṃ na stobhed iti sthaviro gautamaḥ

