14 shlokas
- 1
इन्द्राग्निभ्यां छागस्य वपाया मेदसो ऽनुब्रूहीति
indrāgnibhyāṃ chāgasya vapāyā medaso 'nubrūhīti
- 2
जुह्वाम् उपस्तीर्य हिरण्यशकलम् अवधाय सर्वां वपाम् अवद्यति
juhvām upastīrya hiraṇyaśakalam avadhāya sarvāṃ vapām avadyati
- 3
उपरिष्टाद्धिरण्यशकलं निधायाभिघारयति
upariṣṭāddhiraṇyaśakalaṃ nidhāyābhighārayati
- 4
सा पञ्चावत्ता भवति
sā pañcāvattā bhavati
- 5
यद्य् अपि चतुरवत्ती यजमानः पञ्चावत्तैव वपा भवति
yady api caturavattī yajamānaḥ pañcāvattaiva vapā bhavati
- 6
यदि हिरण्यं न स्याद् आज्यात्प्रत्यवद्येत्
yadi hiraṇyaṃ na syād ājyātpratyavadyet
- 7
अत्याक्रम्याश्राव्याह इन्द्राग्निभ्यां छागस्य वपाया मेदसः प्रेष्येति
atyākramyāśrāvyāha indrāgnibhyāṃ chāgasya vapāyā medasaḥ preṣyeti
- 8
वषट्कृते जुहोति जातवेदो वपया गच्छ देवान् इत्य् एतया
vaṣaṭkṛte juhoti jātavedo vapayā gaccha devān ity etayā
- 9
तत उत्तरं परिवप्यं जुहोति देवेभ्यः स्वाहेति
tata uttaraṃ parivapyaṃ juhoti devebhyaḥ svāheti
- 10
वपाश्रपणी प्रहरति स्वाहोर्ध्वनभसं मारुतं गच्छतम् इति
प्राचीं द्विशूलां प्रतीचीम् एकशूलाम्
vapāśrapaṇī praharati svāhordhvanabhasaṃ mārutaṃ gacchatam iti
prācīṃ dviśūlāṃ pratīcīm ekaśūlām
- 11
अथैने संस्रावेणाभिजुहोति
athaine saṃsrāveṇābhijuhoti
- 12
पशोश्छिद्रम् अभिघारयति
paśośchidram abhighārayati
- 13
समुत्क्रम्य सहपत्नीकाश्चात्वाले मार्जयन्ते
इदम् आपः प्रवहतावद्यं च मलं च यत्
यच्चाभिदुद्रोहानृतं यच्च शेपे अभीरुणम्
निर्मा मुञ्चामि शपथान्निर्मा वरुणाद् उत
निर्मा यमस्य पड्वीशात्सर्वस्माद्देवकिल्बिषाद् अथो मनुष्यकिल्बिषात्
आपो मा तस्माद् एनसो विश्वान्मुञ्चन्त्व् अंहस इति
samutkramya sahapatnīkāścātvāle mārjayante
idam āpaḥ pravahatāvadyaṃ ca malaṃ ca yat
yaccābhidudrohānṛtaṃ yacca śepe abhīruṇam
nirmā muñcāmi śapathānnirmā varuṇād uta
nirmā yamasya paḍvīśātsarvasmāddevakilbiṣād atho manuṣyakilbiṣāt
āpo mā tasmād enaso viśvānmuñcantv aṃhasa iti
- 14
हुतायां वपायां वरं ददाति कन्याम् अलंकृताम् अनड्वाहं तिस्रो वा वत्सतरीः
hutāyāṃ vapāyāṃ varaṃ dadāti kanyām alaṃkṛtām anaḍvāhaṃ tisro vā vatsatarīḥ

