53 shlokas
- 1
अथातः शौचाधिष्ठानम्
athātaḥ śaucādhiṣṭhānam
- 2
अद्भिः शुध्यन्ति गात्राणि बुद्धिर्ज्ञानेन शुध्यति
अहिंसया च भूतात्मा मनः सत्येन शुध्यति
इति
adbhiḥ śudhyanti gātrāṇi buddhirjñānena śudhyati
ahiṃsayā ca bhūtātmā manaḥ satyena śudhyati
iti
- 3
मनःशुद्धिर् अन्तःशौचम्
manaḥśuddhir antaḥśaucam
- 4
बहिःशौचं व्याख्यास्यामः
bahiḥśaucaṃ vyākhyāsyāmaḥ
- 5
कौशं सौत्रं वा त्रिस्त्रिवृद्यज्ञोपवीतम्
kauśaṃ sautraṃ vā tristrivṛdyajñopavītam
- 6
आ नाभेः
ā nābheḥ
- 7
दक्षिणं बाहुम् उद्धृत्य सव्यम् अवधाय शिरो ऽवदध्यात्
dakṣiṇaṃ bāhum uddhṛtya savyam avadhāya śiro 'vadadhyāt
- 8
विपरीतं पितृभ्यः
viparītaṃ pitṛbhyaḥ
- 9
कण्ठे ऽवसक्तं निवीतम्
kaṇṭhe 'vasaktaṃ nivītam
- 10
अधो ऽवसक्तं अधोवीतम्
adho 'vasaktaṃ adhovītam
- 11
प्राङ्मुख उदङ्मुखो वासीनः शौचम् आरभेत शुचौ देशे दक्षिणम्बाहुं जान्वन्तरा कृत्वा प्रक्षाल्य पादौ पाणी चामणिबन्धात्
prāṅmukha udaṅmukho vāsīnaḥ śaucam ārabheta śucau deśe dakṣiṇambāhuṃ jānvantarā kṛtvā prakṣālya pādau pāṇī cāmaṇibandhāt
- 12
पादप्रक्षालनोच्छेषणेन नाचामेत्
pādaprakṣālanoccheṣaṇena nācāmet
- 13
यद्य् आचामेद्भूमौ स्रावयित्वाचामेत्
yady ācāmedbhūmau srāvayitvācāmet
- 14
ब्राह्मेण तीर्थेनाचामेत्
brāhmeṇa tīrthenācāmet
- 15
अङ्गुष्ठमूलं ब्राह्मं तीर्थम्
aṅguṣṭhamūlaṃ brāhmaṃ tīrtham
- 16
अङ्गुष्ठाग्रं पित्र्यम् अङ्गुल्यग्रं दैवम् अङ्गुलिमूलम् आर्षम्
aṅguṣṭhāgraṃ pitryam aṅgulyagraṃ daivam aṅgulimūlam ārṣam
- 17
नाङ्गुलीभिर्न सबुद्बुदाभिर्न सफेनाभिर्नोष्णाभिर्न क्षाराभिर्न लवणाभिर्न कलुषाभिर्न विवर्णाभिर्न दुर्गन्धरसाभिः
nāṅgulībhirna sabudbudābhirna saphenābhirnoṣṇābhirna kṣārābhirna lavaṇābhirna kaluṣābhirna vivarṇābhirna durgandharasābhiḥ
- 18
न हसन्न जल्पन्न तिष्ठन्न विलोकयन्न प्रह्वो न प्रणतो न मुक्तशिखो न प्रावृतकण्ठो न वेष्टितशिरा न त्वरमाणो नायज्ञोपवीती न प्रसारितपादो न बद्धकक्ष्यो न बहिर्जानुः शब्दम् अकुर्वन्
na hasanna jalpanna tiṣṭhanna vilokayanna prahvo na praṇato na muktaśikho na prāvṛtakaṇṭho na veṣṭitaśirā na tvaramāṇo nāyajñopavītī na prasāritapādo na baddhakakṣyo na bahirjānuḥ śabdam akurvan
- 19
त्रिर् अपो हृदयंगमाः पिबेत्
trir apo hṛdayaṃgamāḥ pibet
- 20
त्रिः परिमृजेत्
triḥ parimṛjet
- 21
द्विर् इत्य् एके
dvir ity eke
- 22
सकृद् उभयं शूद्रस्य स्त्रियाश्च
sakṛd ubhayaṃ śūdrasya striyāśca
- 23
अथाप्य् उदाहरन्ति
गताभिर्हृदयं विप्रः कण्ठ्याभिः क्षत्रियः शुचिः
वैश्यो ऽद्भिः प्राशिताभिः स्यात्स्त्रीशूद्रौ स्पृश्य चान्ततः
इति
athāpy udāharanti
gatābhirhṛdayaṃ vipraḥ kaṇṭhyābhiḥ kṣatriyaḥ śuciḥ
vaiśyo 'dbhiḥ prāśitābhiḥ syātstrīśūdrau spṛśya cāntataḥ
iti
- 24
दन्तवद्दन्तसक्तेषु दन्तवत्तेषु धारणात्
स्रस्तेषु तेषु नाचामेत्तेषां संस्राववच्छुचिः
इति
dantavaddantasakteṣu dantavatteṣu dhāraṇāt
srasteṣu teṣu nācāmetteṣāṃ saṃsrāvavacchuciḥ
iti
- 25
अथाप्य् उदाहरन्ति
दन्तवद्दन्तलग्नेषु यच्चाप्यन्तर्मुखे भवेत्
आचान्तस्यावशिष्टं स्यान्निगिरन्न् एव तच्छुचिः
इति
athāpy udāharanti
dantavaddantalagneṣu yaccāpyantarmukhe bhavet
ācāntasyāvaśiṣṭaṃ syānnigirann eva tacchuciḥ
iti
- 26
खान्य् अद्भिः संस्पृश्य पादौ नाभिं शिरः सव्यं पाणिमन्ततः
khāny adbhiḥ saṃspṛśya pādau nābhiṃ śiraḥ savyaṃ pāṇimantataḥ
- 27
तैजसं चेद् आदायोच्छिष्टी स्यात्तदुदस्याचम्यादास्यन्न् अद्भिः प्रोक्षेत्
taijasaṃ ced ādāyocchiṣṭī syāttadudasyācamyādāsyann adbhiḥ prokṣet
- 28
अथ चेद् अन्नेनोच्छिष्टी स्यात्तद् उदस्याचम्यादास्यन्न् अद्भिः प्रोक्षेत्
atha ced annenocchiṣṭī syāttad udasyācamyādāsyann adbhiḥ prokṣet
- 29
अथ चेद् अद्भिर् उच्छिष्टी स्यात्तद् उदस्याचम्यादास्यन्न् अद्भिः प्रोक्षेत्
atha ced adbhir ucchiṣṭī syāttad udasyācamyādāsyann adbhiḥ prokṣet
- 30
एतद् एव विपरीतम् अमत्रे
etad eva viparītam amatre

