16 shlokas
- 1
क्षत्रियवधे गोसहस्रम् ऋषभाधिकं राज्ञ उत्सृजेद्वैरनिर्यातनार्थम्
kṣatriyavadhe gosahasram ṛṣabhādhikaṃ rājña utsṛjedvairaniryātanārtham
- 2
शतं वैश्ये दश शूद्र ऋषभश्चात्राधिकः
śataṃ vaiśye daśa śūdra ṛṣabhaścātrādhikaḥ
- 3
शूद्रवधेन स्त्रीवधो गोवधश्च व्याख्यातो ऽन्यत्रात्रेय्या वधाद्धेन्वनडुहोश्च
śūdravadhena strīvadho govadhaśca vyākhyāto 'nyatrātreyyā vadhāddhenvanaḍuhośca
- 4
वधे धेन्वनडुहोर् अन्ते चान्द्रायणं चरेत्
vadhe dhenvanaḍuhor ante cāndrāyaṇaṃ caret
- 5
आत्रेय्या वधः क्षत्रियवधेन व्याख्यातः
ātreyyā vadhaḥ kṣatriyavadhena vyākhyātaḥ
- 6
हंसभासबर्हिणचक्रवाकप्रचलाककाकोलूकमण्डूकडिड्डिकडेरिकाश्वबभ्रुनकुलादीनां वधे शूद्रवत्
haṃsabhāsabarhiṇacakravākapracalākakākolūkamaṇḍūkaḍiḍḍikaḍerikāśvababhrunakulādīnāṃ vadhe śūdravat
- 7
लोकसंग्रहणार्थं यथा दृष्टं श्रुतं वा साक्षी साक्ष्यं ब्रूयात्
lokasaṃgrahaṇārthaṃ yathā dṛṣṭaṃ śrutaṃ vā sākṣī sākṣyaṃ brūyāt
- 8
पादो ऽधर्मस्य कर्तारं पादो गच्छति साक्षिणम्
पादः सभासदः सर्वान्पादो राजानम् ऋच्छति
राजा भवत्य् अनेनाश्च मुच्यन्ते च सभासदः
एनो गच्छति कर्तारं यत्र निन्द्यो ह निन्द्यते
pādo 'dharmasya kartāraṃ pādo gacchati sākṣiṇam
pādaḥ sabhāsadaḥ sarvānpādo rājānam ṛcchati
rājā bhavaty anenāśca mucyante ca sabhāsadaḥ
eno gacchati kartāraṃ yatra nindyo ha nindyate
- 9
साक्षिणं चैवम् उद्दिष्टं यत्नात्पृच्छेद्विचक्षणः
sākṣiṇaṃ caivam uddiṣṭaṃ yatnātpṛcchedvicakṣaṇaḥ
- 10
यां रात्रिम् अजनिष्ठास्त्वं यां च रात्रिं मरिष्यसि
एतयोर् अन्तरा यत्ते सुकृतं सुकृतं भवेत्
तत्सर्वं राजगामि स्याद् अनृतं ब्रुवतस्तव
yāṃ rātrim ajaniṣṭhāstvaṃ yāṃ ca rātriṃ mariṣyasi
etayor antarā yatte sukṛtaṃ sukṛtaṃ bhavet
tatsarvaṃ rājagāmi syād anṛtaṃ bruvatastava
- 11
त्रीन् एव च पितॄन्हन्ति त्रीन् एव च पितामहान्
सप्त जातान् अजातांश्च साक्षी साक्ष्यं मृषा वदन्
trīn eva ca pitṝnhanti trīn eva ca pitāmahān
sapta jātān ajātāṃśca sākṣī sākṣyaṃ mṛṣā vadan
- 12
हिरण्यार्थे अनृते हन्ति त्रीन् एव च पितामहान्
पञ्च पश्वनृते हन्ति दश हन्ति गवानृते
शतम् अश्वानृते हन्ति सहस्रं पुरुषानृते
सर्वं भूम्यनृते हन्ति साक्षी साक्ष्यं मृषा वदन्
hiraṇyārthe anṛte hanti trīn eva ca pitāmahān
pañca paśvanṛte hanti daśa hanti gavānṛte
śatam aśvānṛte hanti sahasraṃ puruṣānṛte
sarvaṃ bhūmyanṛte hanti sākṣī sākṣyaṃ mṛṣā vadan
- 13
चत्वारो वर्णाः पुत्रिणः साक्षिणः स्युर् अन्यत्र श्रोत्रियराजन्यप्रव्रजितमानुष्यहीनेभ्यः
catvāro varṇāḥ putriṇaḥ sākṣiṇaḥ syur anyatra śrotriyarājanyapravrajitamānuṣyahīnebhyaḥ
- 14
स्मृतौ प्रधानतः प्रतिपत्तिः
smṛtau pradhānataḥ pratipattiḥ
- 15
अतो ऽन्यथा कर्तपत्यम्
ato 'nyathā kartapatyam
- 16
द्वादशरात्रं तप्तं पयः पिबेत्कूश्माण्डैर्वा जुहुयाद् इति
कूश्माण्डैर्वा जुहुयाद् इति
dvādaśarātraṃ taptaṃ payaḥ pibetkūśmāṇḍairvā juhuyād iti
kūśmāṇḍairvā juhuyād iti

