13 shlokas
- 1
श्वोभूते यथामनसं तर्पयित्वा संसाधयेत्
śvobhūte yathāmanasaṃ tarpayitvā saṃsādhayet
- 2
यानवन्तम् आ यानात्
yānavantam ā yānāt
- 3
यावन्नानुजानीयाद् इतरः
yāvannānujānīyād itaraḥ
- 4
अप्रतीभायां सीम्नो निवर्तेत
apratībhāyāṃ sīmno nivarteta
- 5
सर्वान्वैश्वदेवे भागिनः कुर्वीता श्वचाण्डालेभ्यः
sarvānvaiśvadeve bhāginaḥ kurvītā śvacāṇḍālebhyaḥ
- 6
नानर्हद्भ्यो दद्याद् इत्य् एके
nānarhadbhyo dadyād ity eke
- 7
उपेतः स्त्रीणाम् अनुपेतस्य चोच्छिष्टं वर्जयेत्
upetaḥ strīṇām anupetasya cocchiṣṭaṃ varjayet
- 8
सर्वाण्य् उदकपूर्वाणि दानानि
sarvāṇy udakapūrvāṇi dānāni
- 9
यथाश्रुति विहारे
yathāśruti vihāre
- 10
ये नित्या भाक्तिकास्तेषाम् अनुपरोधेन संविभागो विहितः
ye nityā bhāktikāsteṣām anuparodhena saṃvibhāgo vihitaḥ
- 11
कामम् आत्मानं भार्यां पुत्रं वोपरुन्ध्यान्न त्वेव दासकर्मकरम्
kāmam ātmānaṃ bhāryāṃ putraṃ voparundhyānna tveva dāsakarmakaram
- 12
तथा चात्मनो ऽनुपरोधं कुर्याद्यथा कर्मस्व् असमर्थः स्यात्
tathā cātmano 'nuparodhaṃ kuryādyathā karmasv asamarthaḥ syāt
- 13
अथाप्य् उदाहरन्ति
अष्टौ ग्रासा मुनेर्भक्षः षोडशारण्यवासिनः
द्वात्रिंशतं गृहस्थस्यापरिमितं ब्रह्मचारिणः
आहिताग्निर् अनड्वांश्च ब्रह्मचारी च ते त्रयः
अश्नन्त एव सिध्यन्ति नैषां सिद्धिर् अनश्नताम् इति
athāpy udāharanti
aṣṭau grāsā munerbhakṣaḥ ṣoḍaśāraṇyavāsinaḥ
dvātriṃśataṃ gṛhasthasyāparimitaṃ brahmacāriṇaḥ
āhitāgnir anaḍvāṃśca brahmacārī ca te trayaḥ
aśnanta eva sidhyanti naiṣāṃ siddhir anaśnatām iti

