25 shlokas
- 1
खड्गोपस्तरणे खड्गमांसेनानन्त्यं कालम्
khaḍgopastaraṇe khaḍgamāṃsenānantyaṃ kālam
- 2
तथा शतबलेर्मत्स्यस्य मांसेन
tathā śatabalermatsyasya māṃsena
- 3
वार्ध्राणसस्य च
vārdhrāṇasasya ca
- 4
प्रयतः प्रसन्नमनाः सृष्टो भोजयेद्ब्राह्मणान्ब्रह्मविदो योनिगोत्रमन्त्रान्तेवास्यसंबन्धान्
prayataḥ prasannamanāḥ sṛṣṭo bhojayedbrāhmaṇānbrahmavido yonigotramantrāntevāsyasaṃbandhān
- 5
गुणहान्यां तु परेषां समुदेतः सोदर्यो ऽपि भोजयितव्यः
guṇahānyāṃ tu pareṣāṃ samudetaḥ sodaryo 'pi bhojayitavyaḥ
- 6
एतेनान्तेवासिनो व्याख्याताः
etenāntevāsino vyākhyātāḥ
- 7
अथाप्य् उदाहरन्ति
athāpy udāharanti
- 8
संभोजनी नाम पिशाचभिक्षा नैषा पितॄन्गच्छति नोत देवान्
इहैव सा चरति क्षीणपुण्या शालान्तरे गौर् इव नष्टवत्सा
saṃbhojanī nāma piśācabhikṣā naiṣā pitṝngacchati nota devān
ihaiva sā carati kṣīṇapuṇyā śālāntare gaur iva naṣṭavatsā
- 9
इहैव संभुञ्जती दक्षिणा कुलात्कुलं विनश्यतीति
ihaiva saṃbhuñjatī dakṣiṇā kulātkulaṃ vinaśyatīti
- 10
तुल्यगुणेषु वयोवृद्धः श्रेयान्द्रव्यकृशश्चेप्सन्
tulyaguṇeṣu vayovṛddhaḥ śreyāndravyakṛśaścepsan
- 11
पूर्वेद्युर्निवेदनम्
pūrvedyurnivedanam
- 12
अपरेद्युर्द्वितीयम्
aparedyurdvitīyam
- 13
तृतीयम् आमन्त्रणम्
tṛtīyam āmantraṇam
- 14
त्रिःप्रायम् एके श्राद्धम् उपदिशन्ति
triḥprāyam eke śrāddham upadiśanti
- 15
यथा प्रथमम् एवं द्वितीयं तृतीयं च
yathā prathamam evaṃ dvitīyaṃ tṛtīyaṃ ca
- 16
सर्वेषु वृत्तेषु सर्वतः समवदाय शेषस्य ग्रासावरार्घ्यं प्राश्नीयाद्यथोक्तम्
sarveṣu vṛtteṣu sarvataḥ samavadāya śeṣasya grāsāvarārghyaṃ prāśnīyādyathoktam
- 17
उदीच्यवृत्तिस्त्व् आसनगतानां हस्तेषूदपात्रानयनम्
udīcyavṛttistv āsanagatānāṃ hasteṣūdapātrānayanam
- 18
उद्ध्रियताम् अग्नौ च क्रियताम् इत्य् आमन्त्रयते
uddhriyatām agnau ca kriyatām ity āmantrayate
- 19
कामम् उद्ध्रियतां कामम् अग्नौ क्रियताम् इत्य् अतिसृष्ट उद्धरेज्जुहुयाच्च
kāmam uddhriyatāṃ kāmam agnau kriyatām ity atisṛṣṭa uddharejjuhuyācca
- 20
श्वभिर् अपपात्रैश्च श्राद्धस्य दर्शनं परिचक्षते
śvabhir apapātraiśca śrāddhasya darśanaṃ paricakṣate
- 21
श्वित्रः शिपिविष्टः परतल्पगाम्य् आयुधीयपुत्रः शूद्रोत्पन्नो ब्राह्मण्याम् इत्य् एते श्राद्धे भुञ्जानाः पङ्क्तिदूषणा भवन्ति
śvitraḥ śipiviṣṭaḥ paratalpagāmy āyudhīyaputraḥ śūdrotpanno brāhmaṇyām ity ete śrāddhe bhuñjānāḥ paṅktidūṣaṇā bhavanti
- 22
त्रिमधुस्त्रिसुपर्णस्त्रिणाचिकेतश्चतुर्मेधः पञ्चाग्निर्ज्येष्ठसामगो वेदाध्याय्य् अनूचानपुत्रः श्रोत्रिय इत्य् एते श्राद्धे भुञ्जानाः पङ्क्तिपावना भवन्ति
trimadhustrisuparṇastriṇāciketaścaturmedhaḥ pañcāgnirjyeṣṭhasāmago vedādhyāyy anūcānaputraḥ śrotriya ity ete śrāddhe bhuñjānāḥ paṅktipāvanā bhavanti
- 23
न च नक्तं श्राद्धं कुर्वीत
na ca naktaṃ śrāddhaṃ kurvīta
- 24
आरब्धे चाभोजनम् आ समापनात्
ārabdhe cābhojanam ā samāpanāt
- 25
अन्यत्र राहुदर्शनात्
anyatra rāhudarśanāt

