21 shlokas
- 1
यथा कथा च परपरिग्रहम् अभिमन्यते स्तेनो ह भवतीति कौत्सहारीतौ तथा कण्वपुष्करसादी
yathā kathā ca paraparigraham abhimanyate steno ha bhavatīti kautsahārītau tathā kaṇvapuṣkarasādī
- 2
सन्त्य् अपवादाः परिग्रहेष्व् इति वार्ष्यायणिः
santy apavādāḥ parigraheṣv iti vārṣyāyaṇiḥ
- 3
शम्योषा युग्यघासो न स्वामिनः प्रतिषेधयन्ति
śamyoṣā yugyaghāso na svāminaḥ pratiṣedhayanti
- 4
अतिव्यपहारो व्यृद्धो भवति
ativyapahāro vyṛddho bhavati
- 5
सर्वत्रानुमतिपूर्वम् इति हारीतः
sarvatrānumatipūrvam iti hārītaḥ
- 6
न पतितम् आचार्यं ज्ञातिं वा दर्शनार्थो गच्छेत्
na patitam ācāryaṃ jñātiṃ vā darśanārtho gacchet
- 7
न चास्माद्भोगान् उपयुञ्जीत
na cāsmādbhogān upayuñjīta
- 8
यदृच्छासंनिपात उपसंगृह्य तूष्णीं व्यतिव्रजेत्
yadṛcchāsaṃnipāta upasaṃgṛhya tūṣṇīṃ vyativrajet
- 9
माता पुत्रत्वस्य भूयांसि कर्माण्य् आरभते तस्यां शुश्रूषा नित्या पतितायाम् अपि
mātā putratvasya bhūyāṃsi karmāṇy ārabhate tasyāṃ śuśrūṣā nityā patitāyām api
- 10
न तु धर्मसंनिपातः स्यात्
na tu dharmasaṃnipātaḥ syāt
- 11
अधर्माहृतान्भोगान् अनुज्ञाय न वयं चाधर्मश्चेत्य् अभिव्याहृत्याधोनाभ्युपरिजान्व् आच्छाद्य त्रिषवणम् उदकम् उपस्पृशन्न् अक्षीराक्षारालवणं भुञ्जानो द्वादश वर्षाणि नागारं प्रविशेत्
adharmāhṛtānbhogān anujñāya na vayaṃ cādharmaścety abhivyāhṛtyādhonābhyuparijānv ācchādya triṣavaṇam udakam upaspṛśann akṣīrākṣārālavaṇaṃ bhuñjāno dvādaśa varṣāṇi nāgāraṃ praviśet
- 12
ततः सिद्धिः
tataḥ siddhiḥ
- 13
अथ संप्रयोगः स्याद् आर्यैः
atha saṃprayogaḥ syād āryaiḥ
- 14
एतद् एवान्येषाम् अपि पतनीयानाम्
etad evānyeṣām api patanīyānām
- 15
गुरुतल्पगामी तु सुषिरां सूर्मिं प्रविश्योभयत आदीप्याभिदहेद् आत्मानम्
gurutalpagāmī tu suṣirāṃ sūrmiṃ praviśyobhayata ādīpyābhidahed ātmānam
- 16
मिथ्यैतद् इति हारीतः
mithyaitad iti hārītaḥ
- 17
यो ह्य् आत्मानं परं वाभिमन्यते ऽभिशस्त एव स भवति
yo hy ātmānaṃ paraṃ vābhimanyate 'bhiśasta eva sa bhavati
- 18
एतेनैव विधिनोत्तमाद् उच्छ्वासाच्चरेत्
नास्यास्मिंल्लोके प्रत्यापत्तिर्विद्यते
कल्मषं तु निर्हण्यते
etenaiva vidhinottamād ucchvāsāccaret
nāsyāsmiṃlloke pratyāpattirvidyate
kalmaṣaṃ tu nirhaṇyate
- 19
दारव्यतिक्रमी खराजिनं बहिर्लोम परिधाय दारव्यतिक्रमिणे भिक्षाम् इति सप्तागाराणि चरेत्
सा वृत्तिः षण्मासान्
dāravyatikramī kharājinaṃ bahirloma paridhāya dāravyatikramiṇe bhikṣām iti saptāgārāṇi caret
sā vṛttiḥ ṣaṇmāsān
- 20
स्त्रियास्तु भर्तृव्यतिक्रमे कृच्छ्रद्वादशरात्राभ्यासस्तावन्तं कालम्
striyāstu bhartṛvyatikrame kṛcchradvādaśarātrābhyāsastāvantaṃ kālam
- 21
अथ भ्रूणहा श्वाजिनं खराजिनं वा बहिर्लोम परिधाय पुरुषशिरः प्रतीपानार्थम् आदाय
atha bhrūṇahā śvājinaṃ kharājinaṃ vā bahirloma paridhāya puruṣaśiraḥ pratīpānārtham ādāya

