15 shlokas
- 1
तपः स्वाध्याय इति ब्राह्मणम्
tapaḥ svādhyāya iti brāhmaṇam
- 2
तत्र श्रूयते
स यदि तिष्ठन्न् आसीनः शयानो वा स्वाध्यायम् अधीते तप एव तत्तप्यते तपो हि स्वाध्याय इति
tatra śrūyate
sa yadi tiṣṭhann āsīnaḥ śayāno vā svādhyāyam adhīte tapa eva tattapyate tapo hi svādhyāya iti
- 3
अथापि वाजसनेयिब्राह्मणम्
ब्रह्मयज्ञो ह वा एष यत्स्वाध्यायस्तस्यैते वषट्कारा यत्स्तनयति यद्विद्योतते यदवस्फूर्जति यद्वातो वायति तस्मात्स्तनयति विद्योतमाने ऽवस्फूर्जति वाते वा वायत्य् अधीयीतैव वषट्काराणाम् अच्छम्बट्कारायेति
athāpi vājasaneyibrāhmaṇam
brahmayajño ha vā eṣa yatsvādhyāyastasyaite vaṣaṭkārā yatstanayati yadvidyotate yadavasphūrjati yadvāto vāyati tasmātstanayati vidyotamāne 'vasphūrjati vāte vā vāyaty adhīyītaiva vaṣaṭkārāṇām acchambaṭkārāyeti
- 4
तस्य शाखान्तरे वाक्यसमाप्तिः
tasya śākhāntare vākyasamāptiḥ
- 5
अथ यदि वातो वा वायात्स्तनयेद्वा विद्योतेत वावस्फूर्जेद्वैकां वर्चम् एकं वा यजुर् एकं वा सामाभिव्याहरेद्भूर्भुवः सुवः सत्यं तपः श्रद्धायां जुहोमीति वैतत्
तेनो हैवास्यैतद् अहः स्वाध्याय उपात्तो भवति
atha yadi vāto vā vāyātstanayedvā vidyoteta vāvasphūrjedvaikāṃ varcam ekaṃ vā yajur ekaṃ vā sāmābhivyāharedbhūrbhuvaḥ suvaḥ satyaṃ tapaḥ śraddhāyāṃ juhomīti vaitat
teno haivāsyaitad ahaḥ svādhyāya upātto bhavati
- 6
एवं सत्य् आर्यसमयेनाविप्रतिषिद्धम्
evaṃ saty āryasamayenāvipratiṣiddham
- 7
अध्यायानध्यायं ह्य् उपदिशन्ति
तद् अनर्थकं स्याद्वाजसनेयिब्राह्मणं चेद् अवेक्षेत
adhyāyānadhyāyaṃ hy upadiśanti
tad anarthakaṃ syādvājasaneyibrāhmaṇaṃ ced avekṣeta
- 8
आर्यसमयो ह्य् अगृह्यमानकारणः
āryasamayo hy agṛhyamānakāraṇaḥ
- 9
विद्यां प्रत्य् अनध्यायः श्रूयते न कर्मयोगे मन्त्राणाम्
vidyāṃ praty anadhyāyaḥ śrūyate na karmayoge mantrāṇām
- 10
ब्राह्मणोक्ता विधयस्तेषाम् उत्सन्नाः पाठाः प्रयोगाद् अनुमीयन्ते
brāhmaṇoktā vidhayasteṣām utsannāḥ pāṭhāḥ prayogād anumīyante
- 11
यत्र तु प्रीत्युपलब्धितः प्रवृत्तिर्न तत्र शास्त्रम् अस्ति
yatra tu prītyupalabdhitaḥ pravṛttirna tatra śāstram asti
- 12
तद् अनुवर्तमानो नरकाय राध्यति
tad anuvartamāno narakāya rādhyati
- 13
अथ ब्राह्मणोक्ता विधयः
atha brāhmaṇoktā vidhayaḥ
- 14
तेषां महायज्ञा महासत्त्राणीति संस्तुतिः
teṣāṃ mahāyajñā mahāsattrāṇīti saṃstutiḥ
- 15
अहर् अहर्भूतबलिर्मनुष्येभ्यो यथाशक्ति दानम्
ahar aharbhūtabalirmanuṣyebhyo yathāśakti dānam

