14 shlokas
- 1
आपा३ इत्य् आप इति तद् इदम् आप एवेदं वै मूलम् अदस्तूलम् अयं पितैते पुत्रा यत्र ह क्व च पुत्रस्य तत्पितुर्यत्र वा पितुस्तद्वा पुत्रस्येत्य् एतत्तद् उक्तं भवति
āpā3 ity āpa iti tad idam āpa evedaṃ vai mūlam adastūlam ayaṃ pitaite putrā yatra ha kva ca putrasya tatpituryatra vā pitustadvā putrasyety etattad uktaṃ bhavati
- 2
एतद्ध स्म वै तद्विद्वान् आह महिदास ऐतरेय आहं मां देवेभ्यो वेद ओ मद्देवान्वेदेतःप्रदाना ह्य् एत इतः संभृता इति
etaddha sma vai tadvidvān āha mahidāsa aitareya āhaṃ māṃ devebhyo veda o maddevānvedetaḥpradānā hy eta itaḥ saṃbhṛtā iti
- 3
स एष गिरिश्चक्षुः श्रोत्रं मनो वाक्प्राणस्तं ब्रह्मगिरिर् इत्य् आचक्षते
sa eṣa giriścakṣuḥ śrotraṃ mano vākprāṇastaṃ brahmagirir ity ācakṣate
- 4
गिरति ह वै द्विषन्तं पाप्मानं भ्रातृव्यं परास्य द्विषन्पाप्मा भ्रातृव्यो भवति य एवं वेद
girati ha vai dviṣantaṃ pāpmānaṃ bhrātṛvyaṃ parāsya dviṣanpāpmā bhrātṛvyo bhavati ya evaṃ veda
- 5
स एषो ऽसुः स एष प्राणः स एष भूतिश्चाभूतिश्च
sa eṣo 'suḥ sa eṣa prāṇaḥ sa eṣa bhūtiścābhūtiśca
- 6
तं भूतिर् इति देवा उपासांचक्रिरे ते बभूवुस्तस्माद्धाप्येतर्हि सुप्तो भूर्भूर् इत्य् एव प्रश्वसिति
taṃ bhūtir iti devā upāsāṃcakrire te babhūvustasmāddhāpyetarhi supto bhūrbhūr ity eva praśvasiti
- 7
अभूतिर् इत्य् असुरास्ते ह पराबभूवुः
abhūtir ity asurāste ha parābabhūvuḥ
- 8
भवत्य् आत्मना परास्य द्विषन्पाप्मा भ्रातृव्यो भवति य एवम्वेद
bhavaty ātmanā parāsya dviṣanpāpmā bhrātṛvyo bhavati ya evamveda
- 9
स एष मृत्युश्चैवामृतं च
sa eṣa mṛtyuścaivāmṛtaṃ ca
- 10
तद् उक्तम् ऋषिणा
tad uktam ṛṣiṇā
- 11
अपाङ्प्राङ् एति स्वधया गृभीत इत्य् अपानेन ह्य् अयं यतः प्राणो न पराङ्भवति
apāṅprāṅ eti svadhayā gṛbhīta ity apānena hy ayaṃ yataḥ prāṇo na parāṅbhavati
- 12
अमर्त्यो मर्त्येना सयोनिर् इत्य् एतेन हीदं सर्वं सयोनि मर्त्यानि हीमानि शरीराणी३ं अमृतैषा देवता
amartyo martyenā sayonir ity etena hīdaṃ sarvaṃ sayoni martyāni hīmāni śarīrāṇī3ṃ amṛtaiṣā devatā
- 13
ता शश्वन्ता विषूचीना वियन्ता न्य् अन्यं चिक्युर्न नि चिक्युर् अन्यम् इति निचिन्वन्ति हैवेमानि शरीराणी३ं अमृतैवैषा देवता
tā śaśvantā viṣūcīnā viyantā ny anyaṃ cikyurna ni cikyur anyam iti nicinvanti haivemāni śarīrāṇī3ṃ amṛtaivaiṣā devatā
- 14
अमृतो ह वा अमुष्मिंल्लोके सम्भवत्य् अमृतः सर्वेभ्यो भूतेभ्यो ददृशे य एवं वेद य एवं वेद
amṛto ha vā amuṣmiṃlloke sambhavaty amṛtaḥ sarvebhyo bhūtebhyo dadṛśe ya evaṃ veda ya evaṃ veda

