29 shlokas
- 1
तं प्रपदाभ्यां प्रापद्यत ब्रह्मेमं पुरुषं यत्प्रपदाभ्यां प्रापद्यत ब्रह्मेमं पुरुषं तस्मात्प्रपदे तस्मात्प्रपदे इत्य् आचक्षते शफाः खुरा इत्य् अन्येषां पशूनाम्
taṃ prapadābhyāṃ prāpadyata brahmemaṃ puruṣaṃ yatprapadābhyāṃ prāpadyata brahmemaṃ puruṣaṃ tasmātprapade tasmātprapade ity ācakṣate śaphāḥ khurā ity anyeṣāṃ paśūnām
- 2
तद् ऊर्ध्वम् उदसर्पत्ता ऊरू अभवताम्
tad ūrdhvam udasarpattā ūrū abhavatām
- 3
उरु गृणीहीत्य् अब्रवीत्तद् उदरम् अभवत्
uru gṛṇīhīty abravīttad udaram abhavat
- 4
उर्व् एव मे कुर्व् इत्य् अब्रवीत्तद् उरो ऽभवत्
urv eva me kurv ity abravīttad uro 'bhavat
- 5
उदरं ब्रह्मेति शार्कराक्ष्या उपासते हृदयं ब्रह्मेत्य् आरुणयो ब्रह्माहैव ता३इ
udaraṃ brahmeti śārkarākṣyā upāsate hṛdayaṃ brahmety āruṇayo brahmāhaiva tā3i
- 6
ऊर्ध्वं त्व् एवोदसर्पत्तच्छिरो ऽश्रयत यच्छिरो ऽश्रयत तच्छिरो ऽभवत्तच्छिरसः शिरस्त्वम्
ūrdhvaṃ tv evodasarpattacchiro 'śrayata yacchiro 'śrayata tacchiro 'bhavattacchirasaḥ śirastvam
- 7
ता एताः शीर्षञ्छ्रियः श्रिताश्चक्षुः श्रोत्रं मनो वाक्प्राणः
tā etāḥ śīrṣañchriyaḥ śritāścakṣuḥ śrotraṃ mano vākprāṇaḥ
- 8
श्रयन्ते ऽस्मिञ्छ्रियो य एवम् एतच्छिरसः शिरस्त्वं वेद
śrayante 'smiñchriyo ya evam etacchirasaḥ śirastvaṃ veda
- 9
ता अहिंसन्ताहम् उक्थम् अस्म्य् अहम् उक्थम् अस्मीति
tā ahiṃsantāham uktham asmy aham uktham asmīti
- 10
ता अब्रुवन्हन्तास्माच्छरीराद् उत्क्रामाम तद्यस्मिन्न् उत्क्रान्त इदं शरीरं पत्स्यति तद् उक्थं भविष्यतीति
tā abruvanhantāsmāccharīrād utkrāmāma tadyasminn utkrānta idaṃ śarīraṃ patsyati tad ukthaṃ bhaviṣyatīti
- 11
वाग् उदक्रामद् अवदन्न् अश्नन्पिबन्न् आस्तैव
vāg udakrāmad avadann aśnanpibann āstaiva
- 12
चक्षुर् उदक्रामद् अपश्यन्न् अश्नन्पिबन्न् आस्तैव
cakṣur udakrāmad apaśyann aśnanpibann āstaiva
- 13
श्रोत्रम् उदक्रामद् अशृण्वन्न् अश्नन्पिबन्न् आस्तैव
śrotram udakrāmad aśṛṇvann aśnanpibann āstaiva
- 14
मन उदक्रामन्मीलित इवाश्नन्पिबन्न् आस्तैव
mana udakrāmanmīlita ivāśnanpibann āstaiva
- 15
प्राण उदक्रामत्तत्प्राण उत्क्रान्ते ऽपद्यत
prāṇa udakrāmattatprāṇa utkrānte 'padyata
- 16
तद् अशीर्यताशारीती३ं तच्छरीरम् अभवत्तच्छरीरस्य शरीरत्वम्
tad aśīryatāśārītī3ṃ taccharīram abhavattaccharīrasya śarīratvam
- 17
शीर्यते ह वा अस्य द्विषन्पाप्मा भ्रातृव्यः परास्य द्विषन्पाप्मा भ्रातृव्यो भवति य एवं वेद
śīryate ha vā asya dviṣanpāpmā bhrātṛvyaḥ parāsya dviṣanpāpmā bhrātṛvyo bhavati ya evaṃ veda
- 18
ता अहिंसन्तैवाहम् उक्थम् अस्म्य् अहम् उक्थम् अस्मीति
tā ahiṃsantaivāham uktham asmy aham uktham asmīti
- 19
ता अब्रुवन्हन्तेदं पुनः शरीरं प्रविशाम तद्यस्मिन्नः प्रपन्न इदं शरीरम् उत्थास्यति तद् उक्थं भविष्यतीति
tā abruvanhantedaṃ punaḥ śarīraṃ praviśāma tadyasminnaḥ prapanna idaṃ śarīram utthāsyati tad ukthaṃ bhaviṣyatīti
- 20
वाक्प्राविशद् अशयद् एव
vākprāviśad aśayad eva
- 21
चक्षुः प्राविशद् अशयद् एव
cakṣuḥ prāviśad aśayad eva
- 22
श्रोत्रं प्राविशद् अशयद् एव
śrotraṃ prāviśad aśayad eva
- 23
मनः प्राविशद् अशयद् एव
manaḥ prāviśad aśayad eva
- 24
प्राणः प्राविशत्तत्प्राणे प्रपन्न उदतिष्ठत्तद् उक्थम् अभवत्
prāṇaḥ prāviśattatprāṇe prapanna udatiṣṭhattad uktham abhavat
- 25
तद् एतद् उक्था३ं प्राण एव
tad etad ukthā3ṃ prāṇa eva
- 26
प्राण उक्थम् इत्य् एव विद्यात्
prāṇa uktham ity eva vidyāt
- 27
तं देवा अब्रुवंस्त्वम् उक्थम् इति त्वम् इदं सर्वम् असि तव वयं स्मस्त्वम् अस्माकम् असीति
taṃ devā abruvaṃstvam uktham iti tvam idaṃ sarvam asi tava vayaṃ smastvam asmākam asīti
- 28
तद् अप्य् एतद् ऋषिणोक्तम्
tad apy etad ṛṣiṇoktam
- 29
त्वम् अस्माकं तव स्मसीति
tvam asmākaṃ tava smasīti

