12 shlokas
- 1
तस्य वाक्तन्तिर्नामानि दामानि तद् अस्येदं वाचा तन्त्या नामभिर्दामभिः सर्वं सितं सर्वं हीदं नामानी३ं सर्वं वाचाभिवदति
tasya vāktantirnāmāni dāmāni tad asyedaṃ vācā tantyā nāmabhirdāmabhiḥ sarvaṃ sitaṃ sarvaṃ hīdaṃ nāmānī3ṃ sarvaṃ vācābhivadati
- 2
वहन्ति ह वा एनं तन्तिसम्बद्धा य एवं वेद
vahanti ha vā enaṃ tantisambaddhā ya evaṃ veda
- 3
तस्योष्णिग्लोमानि त्वग्गायत्री त्रिष्टुम्मांसम् अनुष्टुप्स्नावान्य् अस्थि जगती पङ्क्तिर्मज्जा प्राणो बृहती स छन्दोभिश्छन्नो यच्छन्दोभिश्छन्नस्तस्माच्छन्दांसीत्य् आचक्षते
tasyoṣṇiglomāni tvaggāyatrī triṣṭummāṃsam anuṣṭupsnāvāny asthi jagatī paṅktirmajjā prāṇo bṛhatī sa chandobhiśchanno yacchandobhiśchannastasmācchandāṃsīty ācakṣate
- 4
छादयन्ति ह वा एनं छन्दांसि पापात्कर्मणो यस्यां कस्यांचिद्दिशि कामयते य एवम् एतच्छन्दसां छन्दस्त्वं वेद
chādayanti ha vā enaṃ chandāṃsi pāpātkarmaṇo yasyāṃ kasyāṃciddiśi kāmayate ya evam etacchandasāṃ chandastvaṃ veda
- 5
तद् उक्तम् ऋषिणा
tad uktam ṛṣiṇā
- 6
अपश्यं गोपाम् इत्य् एष वै गोपा एष हीदं सर्वं गोपायति
apaśyaṃ gopām ity eṣa vai gopā eṣa hīdaṃ sarvaṃ gopāyati
- 7
अनिपद्यमानम् इति न ह्य् एष कदाचन संविशति
anipadyamānam iti na hy eṣa kadācana saṃviśati
- 8
आ च परा च पथिभिश्चरन्तम् इत्य् आ च ह्य् एष परा च पथिभिश्चरति
ā ca parā ca pathibhiścarantam ity ā ca hy eṣa parā ca pathibhiścarati
- 9
स सध्रीचीः स विषूचीर्वसान इति सध्रीचीश्च ह्य् एष विषूचीश्च वस्त इमा एव दिशः
sa sadhrīcīḥ sa viṣūcīrvasāna iti sadhrīcīśca hy eṣa viṣūcīśca vasta imā eva diśaḥ
- 10
आ वरीवर्ति भुवनेष्व् अन्तर् इत्य् एष ह्य् अन्तर्भुवनेष्व् आवरीवर्ति
ā varīvarti bhuvaneṣv antar ity eṣa hy antarbhuvaneṣv āvarīvarti
- 11
अथो आवृतासो ऽवतासो न कर्तृभिर् इति सर्वं हीदं प्राणेनावृतम्
atho āvṛtāso 'vatāso na kartṛbhir iti sarvaṃ hīdaṃ prāṇenāvṛtam
- 12
सो ऽयम् आकाशः प्राणेन बृहत्या विष्टब्धस्तद्यथायम् आकाशः प्राणेन बृहत्या विष्टब्ध एवं सर्वाणि भूतान्य् आ पिपीलिकाभ्यः प्राणेन बृहत्या विष्टब्धानीत्य् एवं विद्यात्
so 'yam ākāśaḥ prāṇena bṛhatyā viṣṭabdhastadyathāyam ākāśaḥ prāṇena bṛhatyā viṣṭabdha evaṃ sarvāṇi bhūtāny ā pipīlikābhyaḥ prāṇena bṛhatyā viṣṭabdhānīty evaṃ vidyāt

