18 shlokas
- 1
पृष्ठस्य द्वितीय एवा ह्य् असि वीरयुर् इति
pṛṣṭhasya dvitīya evā hy asi vīrayur iti
- 2
तृतीय इन्द्रेण सं हि दृक्षसे वयं घ त्वा सुतावन्तस्त्वं न इन्द्रा भरेति
tṛtīya indreṇa saṃ hi dṛkṣase vayaṃ gha tvā sutāvantastvaṃ na indrā bhareti
- 3
दशाहस्याष्टमे यद् इन्द्र प्राग् अपाग् उदग् इति
daśāhasyāṣṭame yad indra prāg apāg udag iti
- 4
नवम एतो न्व् इन्द्रं स्तवामेति
navama eto nv indraṃ stavāmeti
- 5
त्रिककुद्दशाहस्य नवसु शग्ध्य् ऊ षु शचीपते ऽभि प्र गोपतिं गिरा तं वो दस्मम् ऋतीषहं वयम् एनम् इदा ह्य इन्द्रम् इद्गाथिनो बृहच्छ्रायन्त इव सूर्यं क ईं वेद सुते सचा विश्वाः पृतना अभिभूतरं नरं यद् इन्द्र प्राग् अपाग् उदग् इति
trikakuddaśāhasya navasu śagdhy ū ṣu śacīpate 'bhi pra gopatiṃ girā taṃ vo dasmam ṛtīṣahaṃ vayam enam idā hya indram idgāthino bṛhacchrāyanta iva sūryaṃ ka īṃ veda sute sacā viśvāḥ pṛtanā abhibhūtaraṃ naraṃ yad indra prāg apāg udag iti
- 6
अष्टमे महाꣳ इन्द्रो य ओजसेति
aṣṭame mahām̐ indro ya ojaseti
- 7
द्वादशाहस्य छन्दोमप्रथमान्त्ययोस्त्वं न इन्द्रा भर य एक इद्विदयत इति
dvādaśāhasya chandomaprathamāntyayostvaṃ na indrā bhara ya eka idvidayata iti
- 8
स्वरसामसु सं चोदय चित्रम् अर्वाक्प्रणेतारं वस्यो अच्छेति पर्यायेण
अभिप्लवे च
svarasāmasu saṃ codaya citram arvākpraṇetāraṃ vasyo accheti paryāyeṇa
abhiplave ca
- 9
तनूपृष्ठे ऽभि त्वा शूर नोनुमस्त्वाम् इद्धि हवामहे यद्द्याव इन्द्र ते शतं पिबा सोमम् इन्द्र मन्दतु त्वा कया नश्चित्र आ भुवद्रेवतीर्नः सधमाद इति
tanūpṛṣṭhe 'bhi tvā śūra nonumastvām iddhi havāmahe yaddyāva indra te śataṃ pibā somam indra mandatu tvā kayā naścitra ā bhuvadrevatīrnaḥ sadhamāda iti
- 10
एतेषाम् अनन्तरो ऽनुरूपः संभवे
स्तोत्रियनियमश्छन्दसा
eteṣām anantaro 'nurūpaḥ saṃbhave
stotriyaniyamaśchandasā
- 11
गवामयनेन सांवत्सरिकाणि व्याख्यातानि
gavāmayanena sāṃvatsarikāṇi vyākhyātāni
- 12
एतस्माद् एवाहीना रात्रिसत्त्राणि
एकाहा अपि केचित्
etasmād evāhīnā rātrisattrāṇi
ekāhā api kecit
- 13
सर्वत्र कामकॢप्तीः सामवेदात्
sarvatra kāmakḷptīḥ sāmavedāt
- 14
द्व्यहप्रभृतयो ऽहीना आ द्वादशाहात्
अन्यतरतो ऽतिरात्रात्
dvyahaprabhṛtayo 'hīnā ā dvādaśāhāt
anyatarato 'tirātrāt
- 15
द्वादशाहप्रभृतीनि रात्रिसत्त्राण्य् अर्वाञ्चि संवत्सरात्
dvādaśāhaprabhṛtīni rātrisattrāṇy arvāñci saṃvatsarāt
- 16
दशरात्र उभयतोतिरात्रः
daśarātra ubhayatotirātraḥ
- 17
द्वादशाहः पुरस्तादग्निष्टोमो ऽहीनः
dvādaśāhaḥ purastādagniṣṭomo 'hīnaḥ
- 18
सहस्रसंवत्सरपर्यन्तान्य् अयनानि
विश्वजिता सहस्रसंवत्सरप्रतिमेन यजेत
sahasrasaṃvatsaraparyantāny ayanāni
viśvajitā sahasrasaṃvatsarapratimena yajeta

